"დაკავებულების ნაწილზე პოლიციის მანქანაშიც იძალადეს“ - რას ჰყვებიან იზოლატორიდან გამოსული უფლებადამცველები?
აქციებზე დაკავებულთა დასაცავად შექმნილი არასამთავრობო ორგანიზაციების გაერთიანებული ქსელის იურისტები 19 ნოემბერს ჭავჭავაძესა და მელიქიშვილზე დაკავებულებს შსს - ს წინასწარი დაკავების იზოლატორებში, დოღომსა და ზაჰესში, ხვდებიან.
იურისტები აცხადებენ, რომ დემონსტრანტების უმეტესობა სამართალდამცავების მხრიდან ფიზიკური და სიტყვიერი შეურაცხყოფის შესახებ ლაპარაკობს.
ნესტან ლონდარიძემ, "ადამიანის უფლებათა ცენტრის“ იურისტმა, ზაჰესის წინასწარი დაკავების იზოლატორში უკვე მოინახულა ორი დაკავებული.
მისი თქმით, პოლიციასა და აქციის მონაწილეებს შორის მომხდარი დაპირისპირებისას ადმინისტრაციული წესით დაკავებულ საბა სხვიტარიძეს, ასევე, მანუჩარ ჩაჩანიძეს, რომლებიც "კოალიცია ცვლილებისთვის“ წევრები არიან, დაზიანებები აღენიშნებათ.
მისივე განმარტებით, სხვიტარიძეს დაზიანებები ყელის არეში თვალნათლივ ეტყობა. ასევე, სხეულის სხვადასხვა ადგილას დაჟეჟილობები აქვს, ის სპეციალურ საგამოძიებო სამსახურს ექსპერტიზის ჩატარების მოთხოვნით მიმართავს.
"ძალის გადამეტება ფიქსირდება, დაკავების დროს ფიზიკურ და სიტყვიერ შეურაცხყოფას ჰქონდა ადგილი. სხვიტარიძეს ყელის მიდამოში აქვს ხელის ჩაჭერის კვალი, ასევე, თმით გათრევას ჰქონდა ადგილი“, - განაცხადა ლონდარიძემ.
რაც შეეხება მანუჩარ ჩაჩანიძეს, ის მისმა უფლებადამცველმა ბექა კვინიკაძემ ზაჰესის დროებითი მოთავსების იზოლატორში მოინახულა.
კვინიკაძის თქმით, ჩაჩანიძეს დაზიანება გვერდის არეში აქვს მიყენებული. მას სამართალდამცავები დაკავების მომენტში გაუსწორდნენ. ადვოკატის განმარტებით, დაკავებული იზოლატორის ექიმმა გასინჯა და უთხრა, რომ ექოსკოპიის გადაღებაა საჭირო, რადგან ის ტკივილებს უჩივის.
კვინიკაძის თქმით, ჩაჩანიძეს არანაირი სამართალდარღვევა არ ჩაუდენია, ვინაიდან ის ბორდიურზე მდგომი დააკავეს.
ადვოკატმა ასევე მოინახულა დავით წოწორიაც, მას დაზიანებები არ აღენიშნება.
მელიქიშვილის გამზირზე, პოლიციასა და აქციის მონაწილეებს შორის მომხდარი დაპირისპირებისას სამართალდამცავებმა ადმინისტრაციული წესით 16 პირი დააკავეს. მათგან 3 ადამიანი ხელწერილის საფუძველზე გაათავისუფლეს, 10 პირი ზაჰესის დროებითი მოთავსების იზოლატორშია შესახლებული, 3 კი, დიღმის სამმართველოში.
მელიქიშვილის გამზირზე, პოლიციასა და აქციის მონაწილეებს შორის მომხდარი დაპირისპირებისას ადმინისტრაციული წესით დაკავებულების ერთ-ერთი ადვოკატის, ლაშა ტყეშელაძის განცხადებით, პოლიციელებმა 4 პირზე ფიზიკურად იძალადეს.
როგორც ზაჰესის დროებითი მოთავსების იზოლატორიდან გამოსვლის შემდეგ ტყეშელაძემ განაცხადა, 3 პირი, რომელთაც ფიზიკურად გაუსწორდნენ, მან თავად მოინახულა, კიდევ ერთ ადამიანზე ფიზიკური ძალადობის განხორციელების შესახებ კი მას დაკავებულმა უამბო.
-
ადვოკატის თქმით, სამართალდამცავებმა ნაწილზე დაკავების მომენტში იძალადეს, ნაწილზე კი დაკავების შემდეგ, მანქანაში.
ტყეშელაძემ იზოლატორში ალექსანდრე ბექაური, რეზი დუმბაძე და ალექსანდრე ქავთარაძე მოინახულა.
"ნაცემები არიან, ქავთარაძეს სახეზე აღენიშნება დაზიანებები. მას მანქანაში ჩასმის შემდეგ დაარტყეს სახეში... ასევე არის ავსაჯანიშვილი, რომელსაც ასევე აღენიშნება დაზიანებები.... ეს ყველაფერი დაშინების მცდელობაა, ეს ნიღბიანი პოლიციელები არ არიან სამართალდამცავები, ისინი არიან კრიმინალები. დაკავებულები ამბობენ, რომ მათ სამართალდარღვევა არ ჩაუდენიათ“,- განაცხადა ტყეშელაძემ.
იხილეთ ასევე: