“სირცხვილია, როდესაც აქციის მონაწილეები ამას კადრულობენ - პოლიციას დრონით საღებავს ასხამენ“ - ვაჟა სირაძე
საპატრულო პოლიციის დეპარტამენტის დირექტორმა, ვაჟა სირაძემ დაადასტურა ინფორმაცია იმის შესახებ, რომ აქციის მონაწილეებმა პოლიციის თანამშრომლებს დრონებით საღებავები დაასხეს.
“არაერთ მსგავს შეურაცხმყოფელ საქციელს სჩადიან აქციის მონაწილეები.
ირონიულად არ უნდა მეკითხებოდეთ, თქვენ გული უნდა შეგტკიოდეთ ქართულ პოლიციაზე და ძალიან დიდი სირცხვილია, როდესაც აქციის მონაწილეები ამას კადრულობენ, რომ პოლიციას დრონით საღებავს ასხამენ,“ - მიმართა სირაძემ “ტვ პირველის“ ჟურნალისტს, რომელმაც აღნიშნული ინფორმაციის შესახებ დეტალების გამხელა სთხოვა.
მისი თქმით, სხვა კონკრეტული სამართალდარღვევების განხილვას მოგვიანებით, სასამართლოში გააგრძელებენ.
ამასთან, როგორც ვაჟა სირაძემ “რუსთავი 2“-თან საუბარში განაცხადა, “პოლიცია მაქსიმალურს გააკეთებს, რომ აქციის მონაწილეები ყოველგვარი ძალის გამოყენების გარეშე, მოლაპარაკების გზით გადავიდნენ გზიდან“.
“მაქსიმალურად ვცდილობთ პოლიციის თითოეული თანამშრომელი, რომ განვუმარტოთ მათ სამართალდარღვევის არსი, მოვუწოდებთ, რომ გაათავისუფლონ საავტომობილო გზა, ვინაიდან უნდა აღდგეს მოძრაობა. შესაბამისად, პოლიცია მაქსიმალურს გააკეთებს, რომ ყოველგვარი ძალის გამოყენების გარეშე, მოლაპარაკების გზით გადავიდნენ გზიდან. თუ მოხდა ისე, რომ არ დაემორჩილნენ პოლიციის კანონიერ მოთხოვნას და არ გაითვალისწინეს, შესაბამის ზომებს მივიღებთ“,- აღნიშნა სირაძემ.
იხილეთ ასევე:
- ფიზიკური დაპირისპირება და დაკავებები მელიქიშვილის გამზირზე - ერთ-ერთი საავადმყოფოშია გადაყვანილი: რა ხდება ადგილზე
- დაშლა: რა ხდებოდა ჭავჭავაძის გამზირზე? - ღამის ქრონიკა (ფოტო, ვიდეო)