ნიღბიანი ქურდები უინძორის სასახლის ტერიტორიაზე იმ დროს შეიპარნენ, როდესაც პრინც უილიამს, ქეითსა და მათ შვილებს ახლომდებარე კოტეჯში ეძინათ

ნიღბიანი მძარცველები უინძორის სასახლის ტერიტორიაზე მაშინ შეიპარნენ, როდესაც პრინც უილიამს, ქეითსა და მათ შვილებს - 11 წლის ჯორჯს, 9 წლის შარლოტასა და 6 წლის ლუის, თავიანთ კოტეჯში მშვიდად ეძინათ. ეს ინფორმაცია ახლახან გავრცელდა, თუმცა, როგორც ირკვევა, შემთხვევა 13 ოქტომბერს მოხდა.

ქურდები თითქმის 2-მეტრიან ღობეზე გადაძვრნენ. შემდეგ კი, სასახლის ტერიტორიიდან მოპარული სატვირთო მანქანით გაანადგურეს უსაფრთხოების ჭიშკარი, ასევე სასოფლო-სამეურნეო მანქანები მოიპარეს ამ ტერიტორიაზევე არსებული ფარეხიდან, ადგილი კი ასევე მოპარული პიკაპითა და კვადროციკლით დატოვეს.

მედიის ინფორმაციით, ეს მაშინ მოხდა, როდესაც სამეფო ოჯახი მხოლოდ 5 წუთის სავალ მანძილზე იმყოფებოდა.

ახლა უკვე დანგრეული ჭიშკარი ადელაიდის კოტეჯთან მდებარე ყველაზე ახლო გასასვლელია და ამ გზით მავალ ოჯახს ხშირად ხედავენ.

ამ ცოტა ხნის წინ უინძორის სასახლის საზოგადოებრივი შესასვლელებიდან შეიარაღებული ოფიცრები მოხსნეს, თუმცა, სავარაუდოდ, სასახლის ტერიტორიაზე სამართალდამცავები კვლავ იმყოფებიან და პატრულირებენ.

წყაროს თქმით, ნიღბიანი ქურდები "სავარაუდოდ, დიდი ხნის განმავლობაში აკვირდებოდნენ სასახლეს".

ამ შემთხვევისას მეფე ჩარლზი შოტლანდიაში იმყოფებოდა და კამილა კი - ინდოეთში.

გამოძიება მიმდინარეობს, თუმცა მომხდარის გამო ჯერ არავინ დაუკავებიათ.

სამეფო ოჯახი კენსინგტონის სასახლიდან 2022 წლის ზაფხულში გადავიდა ადელაიდის კოტეჯში, რომელიც უინძორის დიდ პარკში მდებარეობს.

წყარო