"მეორე ტაიმი ჩემი აქ მუშაობის პერიოდში საუკეთესო იყო" - რა თქვა ვილი სანიოლმა მატჩის შემდეგ, რა შეფასებები მიიღეს ქართველმა ფეხბურთელებმა და ვინ იყო მინდორზე საუკეთესო?

ერთა ლიგის მეხუთე ტურში საქართველოს ნაკრებმა უკრაინას უმასპინძლა. მატჩი ფრედ, ანგარიშით 1:1 დასრულდა. მატჩი ბათუმის "აჭარაბეთ არენაზე" გაიმართა.

პირველი ტაიმი ქართველების შეტევით დაიწყო. ჯერ ბუდუ ზივზივაძის დარტყმული მოიგერია მცველმა, შემდეგ კი "კვარას" საჯარიმოს გარედან გასროლილი ბურთი გაჭირვებით მოიგერია მეკარემ. სამწუხაროდ, ამ შეტევების შემდეგ გოლი ჩვენს კარში გავიდა. სწრაფი კონტრშეტევისას, მე-7 წუთზე, მუდრიკის ჩვენს საჯარიმოში ჩაწოდებული ბურთის მოგერიება კვირკველიამ სცადა, თუმცა ბურთი მამარდაშვილის კარის ბადეში გაეხვა.

მთელი ტაიმის განმავლობაში ქართველები უტევდნენ, თუმცა პირველ ტაიმში გოლის გატანა ვერ შეძლეს. საბოლოოდ საქართველოს ნაკრებმა პირველი ტაიმი 0:1 დათმო.

მეორე ტაიმი საქართველოს ნაკრებმა ცვლილებით დაიწყო - გიორგი ჩაკვეტაძის ნაცვლად მოედანზე ზურიკო დავითაშვილი შევიდა და პირველივე წუთზე, "კვარას" კარგი თამაშისა და პასის შემდეგ, გოლამდე ზურიკოს სულ ცოტა დააკლდა. 23-ე წუთზე კი უკვე კვარაცხელიას შორეული, ულამაზესი დარტყმის შემდეგ უკრაინელთა კარი ხარიხამ იხსნა. გოლის გატანის შანსი უკრაინელებსაც ჰქონდათ, თუმცა მამარდაშვილი უშეცდომოდ თამაშობდა. 67-ე წუთზე საქართველოს ნაკრებში სამმაგი ცვლილება მოხდა ზივზივაძის, შენგელიასა და კვირკველიას ნაცვლად, მიქაუტაძე, გოჩოლეიშვილი და წიტაიშვილი გამოვიდნენ.

• ამის შემდეგ ჩვენების თამაში გაცილებით სწრაფი და აქტიური გახდა, რაც ლოგიკურად დასრულდა 76 წუთზე უკრაინელთა კარში გატანილი გოლით.

ქოჩორაშვილის კარგი თამაშის შემდეგ, მისი თავური დარტყმა მეტოქემ მოიგერია, რის მერეც ბურთთან მიქაუტაძე გაჩნდა და გოლიც გაიტანა.

თამაშის მიწურულს, დამატებით დროში უკრაინელებმა სახიფათოდ შეუტიეს მამარდაშვილს კარს, მაგრამ ჩვენი მეკარის ზუსტი და თავგანწირული თამაშის შედეგად გოლს გადავრჩით. გიორგი ზედიზედ, ახლოდან დარტყმული ბურთები მოიგერია.

• რა თქვა ჩვენი ნაკრების მთავარმა მწვრთნელმა, ვილი სანიოლმა მატჩის შემდეგ?

"თამაში კარგად დავიწყეთ, მაგრამ შეცდომის დაშვების შემდეგ გაგვიჭირდა. მეორე ტაიმი ჩემი აქ მუშაობის პერიოდში ერთ-ერთი საუკეთესო იყო. შეცვლაზე შესული ფეხბურთელები კარგად ჩაერთნენ, ეს იმას ადასტურებს, რომ მენტალურად ყველაფერი რიგზეა. რაც არ მომეწონა, პრობლემა მომენტების რეალიზების ნაწილში გახლდათ.

მეტოქის გოლი გუნდმა მძიმედ მიიღო და მისგან გამოსასვლელად შესვენება დაგვჭირდა. ზურიკო ჩაკვეტაძისგან განსხვავებული მოთამაშეა. მას დაცვა და ფლანგი უნდა გაეწელა და ასეც მოიქცა. კვირკველია გამოცდილი ფეხბურთელია, ის ერთ შანსს კიდევ იმსახურებდა და მიიღო კიდეც... გეგმა მქონდა, გოგლიჩიძეს უნდა ეთამაშა, რაც სამწუხაროდ, ვერ მოხერხდა.

ერთა ლიგა შესარჩევი ეტაპის მოსამზადებელი ეტაპიცაა და როტაცია მისი შემადგენელი ნაწილია. სულ რაღაც 5 წლის წინ D ლიგაში ვიყავით, ახლა A-ში დაწინაურებას ვცდილობთ. შრომას შედეგი ყოველთვის მოაქვს".

• როგორი შეფასებები მიიღეს საქართველოს ნაკრების ფეხბურთელებმა უკრაინასთან მატჩში?

Whoscored: მამარდაშვილი 7.0, კაკაბაძე 7.3, კაშია 6.7, კვირკველია 5.6, ლოჩოშვილი 6.7, შენგელია 6.1, ქოჩორაშვილი 6.3, კიტეიშვილი 6.8, ჩაკვეტაძე 6.1, კვარაცხელია 7.9, ზივზივაძე 6.2, მიქაუტაძე 6.9, გოჩოლეიშვილი 6.2, დავითაშვილი 6.1, წიტაიშვილი 6.7

Sofascore: მამარდაშვილი 7.1, კაკაბაძე 7.2, კაშია 7.0, კვირკველია 6.6, ლოჩოშვილი 6.9, შენგელია 6.6, ქოჩორაშვილი 6.9, კიტეიშვილი 7.0, ჩაკვეტაძე 6.5, კვარაცხელია 8.4, ზივზივაძე 6.7, მიქაუტაძე 7.3, გოჩოლეიშვილი 6.5, წიტაიშვილი 7.1, დავითაშვილი 6.4

Flashscore: მამარდაშვილი 6.7, კაკაბაძე 7.4, კაშია 7.1, კვირკველია 6.4, ლოჩოშვილი 7.1, შენგელია 6.9, ქოჩორაშვილი 7.8, კიტეიშვილი 7.1, ჩაკვეტაძე 6.7, კვარაცხელია 7.8, ზივზივაძე 6.8, მიქაუტაძე, 7.6, გოჩოლეიშვილი 6.2, წიტაიშვილი 7.3, დავითაშვილი 6.3

ნახეთ ასევე:

• მიქაუტაძე: ჩეხეთში მოსაგებად უნდა წავიდეთ