"თავისი უყურადღებობის და დაუდევრობის გამო მთელი ჩემი ცხოვრება თავზე დამამხეს..." - რას წერს გარდაცვლილი გოგოს მეუღლე და რას ამბობენ ქუთაისის სამშობიაროში?
28 წლის შორენა ონიანი, რომელსაც რამდენიმე დღის წინ ქუთაისის მეორე სამშობიაროში ნაადრევად ტყუპი შეეძინა, გარდაიცვალა.
ტრაგიკული ამბავი Ambebi.ge-ს შორენას ახლობელმაც დაუდასტურა.
- მშობიარობიდან რამდენიმე საათში შორენას მდგომარეობა დამძიმდა. თბილისში გადმოყვანის შემდეგ, ოჯახს ურჩიეს, რომ სასწრაფოდ თურქეთში გადაეყვანათ. შორენა ტრაპიზონის კლინიკაში გარდაიცვალა.
AMBEBI.GE დაუკავშირდა ქუთაისის მეორე სამშობიაროს, სადაც მოკლე კომენტარით შემოიფარგლნენ. კლინიკის დირექტორმა თქვა, რომ ფაქტს ჯანდაცვის სამინისტროს რეგულირების სააგენტო იკვლევს.
"გოგონას მდგომარეობა კლინიკაში დამძიმდა. აქ დაეწყო დენა, ყველაფერს იკვლევს რეგულირების სააგენტო და ამის მერე გავიგებთ, რა მოხდა" - გვითხრა კლინიკის დირექტორმა ირაკლი მერკვილაძემ.
გარდაცვლილის მეუღლე სოციალურ ქსელში წერს:
"ჩვენი ამბავი აქედან დაიწყო და ჩვენ ყველაზე ბედნიერები ვიყავით, ერთმანეთით ვტკბებოდით და გვიხაროდა ცხოვრება, ჩვენი ტყუპების ამბით ხომ ღრუბლებში დავფრინავდით, ყოველი წინ წასული დღე უფრო გვიტკბობდა ამ სიყვარულს რომ ჩვენი პატარები უნდა დაბადებულიყვნენ, მაგრამ გამოჩნდებიან ხოლმე ბოროტი ზღაპრის დედაბრები, რომლებიც ამ ბედნიერებას ხელს უშლიან და თავისი უყურადღებობის და დაუდევრობის გამო მთელი ჩემი ცხოვრება თავზე დამამხეს. სული მტკივა. ეს ტკივილი უძლიერესია და გული ვერ იტევს" - წერს გარდაცვლილი გოგონას მეუღლე.
წაიკითხეთ ასევე: