დაპირისპირება და კვერცხების სროლა ოკუპირებულ აფხაზეთში - ე.წ. პარლამენტის სხდომა დაძაბული აქციების ფონზე მიმდინარეობს (ფოტო/ვიდეო)

ოკუპირებულ აფხაზეთში ე.წ. პარლამენტის სხდომა რომელზედაც “მრავალფუნქციური კომპლექსების სამართლებრივი სტატუსის მოწესრიგების“ შესახებ კანონპროექტის რატიფიკაცია იგეგმება, ხმაურისა და საპროტესტო აქციის ფონზე მიმდინარეობს.

ე.წ. სხდომას 21 “დეპუტატი“ ესწრება. ე.წ. “პარლამენტის თავმჯდომარემ“ ლაშა აშუბამ აღნიშნა, რომ “ზოგიერთი დეპუტატი უარს ამბობს ასეთ პირობებში მუშაობაზე“.

“პარლამენტის“ სესიის პარალელურად, ე.წ. “საკანონმდებლო ორგანოსთან“ კანონპროექტის რატიფიცირების მოწინააღმდეგეების აქცია მიმდინარეობს.

ე.წ. ოპოზიციის ერთ-ერთი ლიდერის, ადგურ არძინბას განცხადებით, ახლა დეპუტატთა ჯგუფი სპიკერთან იმყოფება და დაჟინებით მოითხოვს საინვესტიციო ხელშეკრულების რატიფიცირების საკითხი დღის წესრიგიდან ამოიღონ.

დეპუტატებს, რომლებიც კანონპროექტს უჭერენ მხარს, შეკრებილებმა კვერცხები ესროლეს.

ცოტა ხნის წინ ვითარება დაიძაბა. ოკუპირებულ აფხაზეთში აქციის მონაწილეები ე.წ. პარლამენტის ტერიტორიაზე შეიჭრნენ. მათივე ინფორმაციით, ე.წ. ძალოვანი სტრუქტურების თანამშრომლებსა და აქციის მონაწილეებს შორის შეხლა-შემოხლა მოხდა.

საპროტესტო ტალღა სოხუმში რამდენიმე დღის წინ, მას შემდეგ დაიწყო, რაც ე.წ. პარლამენტმა მიიღო კანონი “მრავალფუნქციური კომპლექსების სამართლებრივი სტატუსის რეგულირების შესახებ“, რომელიც რუსეთთან ინვესტიციების შესახებ ე.წ. მთავრობათაშორისი შეთანხმების ზოგიერთ კონცეფციას არეგულირებს. ოპოზიცია ამტკიცებს, რომ საუბარია აფხაზეთში ბინების რუსეთისთვის მიყიდვაზე და დოკუმენტის რატიფიცირებას ეწინააღმდეგება.