ყველაზე საშიში და ნაკლებად ცნობილი პოლიტიკურ მოთამაშე - ვინ არის სუზი უაილსი: ტრამპის აპარატის ახალი უფროსი და "ბებია, რომელსაც გზაზე არ უნდა გადაეღობო"
სამშაბათს, როდესაც პრეზიდენტობის კანდიდატი, დონალდ ტრამპი არჩევნებში გამარჯვების აღსანიშნავი სიტყვით გამოვიდა, მან განსაკუთრებული მადლობა ერთ ადამიანს გადაუხადა.
- "ნება მომეცით, გამოვხატო ჩემი უდიდესი მადლიერება სუზისადმი..." - თქვა ღიმილიანმა ტრამპმა პალმ ბიჩში, ფლორიდაში მდებარე საარჩევნო შტაბის სცენაზე და შეკრებილ ოჯახის წევრებსა და თანამშრომლებს მიმართა.
"როგორი სამუშაო შეასრულე. მოდი, სუზი. მოდი აქ, სუზი," - მოუხმო მან, - "სუზის უყვარს უკანა პლანზე ყოფნა... ჩვენ მას ყინულის ქალბატონს ვეძახით."
შემდეგ ღია ფერის ბლუზითა და ოქროსფერი საყურეებით სცენაზე "ჭაღარა ბებია" სუზი უაილსი გამოვიდა.
-
67 წლის ქალმა პრეზიდენტობის კანდიდატს ხელი ჩამოართვა და გაუღიმა, მაგრამ როცა მან "რამდენიმე სიტყვის" თქმა შესთავაზა, სუზის თვალები გაუფართოვდა და უარის ნიშნად თავი ენერგიულად გააქნია .
ეს ქალი, რომელსაც "ყველაზე საშიშ და ნაკლებად ცნობილ პოლიტიკურ მოთამაშეს" უწოდებენ, ყურადღების ცენტრში ყოფნას მაქსიმალურად ერიდება. თუმცა, სავარაუდოდ, ახლა მას უფრო ხშირად ვიხილავთ.
ხუთშაბათს საღამოს ტრამპმა ის თეთრი სახლის აპარატის უფროსად დანიშნა - შესაბამისად, ის პირველი ქალია, ვინც ამ როლზე ოდესმე დასახელებულა.
გავრცელებული ხმების თანახმად, ტრამპის დე-ფაქტო საპრეზიდენტო კამპანიის მენეჯერი და ცნობილი (და სახელგატეხილი) NFL-ის სპორტული კომენტატორის ქალიშვილი - დიდი ხანია, ამ პოზიციას უმიზნებდა.
სხვა სახელებიც ტრიალებდა, როგორიცაა ბრუკ როლინსი, მემარჯვენე იურისტი, რომელიც ტრამპის პირველ ადმინისტრაციაში შიდა პოლიტიკას ხელმძღვანელობდა, და კევინ მაკარტი, წარმომადგენელთა პალატის ყოფილი სპიკერი.
- ამჯერად უაილსმა იმარჯვა, შესაძლოა იმის გამო, რომ მან შეძლო ის, რაც ტრამპის სხვა აპარატის უფროსებმა ვერ შეძლეს - უფროსის მოთოკვა.
ტრამპის 2024 წლის კამპანიაში რამდენიმე უზარმაზარი შეფერხების მიუხედავად (მათ შორის, ვიცე-პრეზიდენტ კამალა ჰარისთან სექტემბრის კატასტროფული დებატები და 9/11-ის მემორიალურ ღონისძიებაზე 9/11-ის კონსპირაციის თეორეტიკოს ლაურა ლუმერთან ერთად გამოჩენა), უაილსს დისციპლინირებული ოპერაციის წარმართვას მიაწერენ.
ეს ტრამპის სამყაროში ბევრს ნიშნავს, მაგრამ დისციპლინა სუზის მოქმედების წესია.
უაილსის მეგობარმა და აშშ-ის ყოფილმა ელჩმა, კარლოს ტრუხილომ განაცხადა, რომ ნიუ-ჯერსელი ქალბატონი, რომელმაც პოლიტიკაში გამოცდილება ლეგენდარული ნიუ-იორკელი რესპუბლიკელი პოლიტიკოსის ასისტენტობიდან მიიღო, საქმეებს დროულად წარმართავს.
-
წლის დასაწყისში Politico-ს მიერ გამოქვეყნებულ პირად პროფილში განხილულია, თუ როგორ შეიძლებოდა, სუზის რთულ აღზრდას ის ამ როლისთვის მოემზადებინა.
როგორც აღინიშნა, ის გარდაცვლილი პეტ სამეროლის ქალიშვილია, NFL-ის მოთამაშის, რომელიც შემდგომში ამერიკის ერთ-ერთი ყველაზე საკულტო სპორტული კომენტატორი გახდა. ის ასევე, ალკოჰოლიკი იყო.
სამეროლმა, რომელიც 2013 წელს გარდაიცვალა, თავის მემუარებში სმისა და ქორწინების მიღმა არსებულ რომანზე დაწერა, რამაც უაილსის დედისგან მისი განქორწინება გამოიწვია. მან აღიარა: "ჩემი შვილები ჩემ გარეშე გაიზარდნენ. როგორც მამამ, მათ იმედები გავუცრუე."
სტატიაში აღნიშნულია, თუ როგორ სწავლობენ ალკოჰოლიკების შვილები ქაოტური სიტუაციებისა და ადამიანების მართვას: "მათ შეუძლიათ ისწავლონ, როგორ გახდნენ შეუცვლელი, ან უხილავი - და როდის იყვნენ პირველი და როდის - მეორე."
პირველი სამუშაოს მიღებაში უაილსს სწორედ მამა, პეტი დაეხმარა, როცა New York Giants-ის ყოფილ თანაგუნდელთან, შემდგომში პოლიტიკოსად ქცეულ ჯეკ კემპთან დაიწყო მუშაობა – იმ დროისთვის, კემპი ხალხის ფავორიტი ნიუ-იორკის კონგრესმენი იყო.
აქედან უაილსი რონალდ რეიგანის საპრეზიდენტო კამპანიაში გადავიდა სამუშაოდ, სანამ ფლორიდაში გააგრძელებდა კარიერას. იქ უაილსმა თავი ნამდვილ პოლიტიკურ ოპერატორად დაიმკვიდრა.
"მე მას პოლიტიკურ ბრძენს ვუწოდებდი - უბრალოდ, არაამქვეყნიური პოლიტიკური ინტუიცია აქვს," - თქვა ჯექსონვილის ყოფილმა მერმა, ჯონ დელეინიმ, ვისთანაც ის მუშაობდა. "სუზი ბრწყინვალე ტაქტიკოსია, ყოვლისშემძლე."
2008 წელს უაილსი სენატორ ჯონ მალკეინის წარუმატებელი საპრეზიდენტო კამპანიის დუვალის ოლქის თანათავმჯდომარე გახდა. შემდეგ ის ბიზნესმენ რიკ სკოტს დაეხმარა კარიერის დაწყებაში – სანამ სახელმწიფო ლობირების მსხვილ ფირმაში გადავიდოდა.
- ისინი, ვინც უაილსს ყველაზე კარგად იცნობენ, ამბობენ, რომ ის პოლიტიკური ნარატივების ჩამოყალიბების ექსპერტია და რეპორტიორებისთვის ინფორმაციის მიწოდებას არ ერიდება, როცა ეს მისი მთავარი ინტერესებისთვის სასარგებლოა. თანამშრომლების თქმით, არის კიდევ რაღაც, რაც უაილსის შესახებ უნდა იცოდეთ: მას გზაზე ნუ გადაეღობებით.
2012 წელს უაილსმა დესანტისის საკონგრესო კამპანია თავის თავზე აიღო, ხოლო 2018 წელს მას ფლორიდის გუბერნატორის არჩევნებში გამარჯვების მოპოვებაში დაეხმარა.
მაგრამ მას შემდეგ, რაც დესანტისი გუბერნატორი გახდა, დიდი განხეთქილება მოხდა. მიზეზები საჯარო არასდროს გამხდარა, მაგრამ არსებობს მოსაზრებები, რომ დესანტისი და მისი მეუღლე, ქეისი თვლიდნენ, თითქოს უაილსს მის პოლიტიკურ აღმასვლაში მეტისმეტად დიდი დამსახურება მიეწერა.
- გადავინაცვლოთ 2024 წლის რესპუბლიკურ პრაიმერზე – უაილსი ტრამპის გუნდში იყო.
ტრამპი და უალსი ერთმანეთს პირველად 2015 წელს შეხვდნენ, შემდეგ, 2020 წელს ხელახლა დაკავშირდნენ მას შემდეგ, რაც ტრამპმი არჩევნებში დამარცხდა და 6 იანვრის კაპიტოლიუმის არეულობა მოხდა.
მაგრამ ახლა ტრამპი დაბრუნდა და უაილსის ყოფილ კლიენტსა და რესპუბლიკელი თეთრი სახლის მაძიებელთა ხალხმრავალ ველს დაუპირისპირდა.
უცებ მედიაში გამოჩნდა ისტორიები, რომლებიც დესანტისს სოციალურად უხერხულ და უცნაურ პიროვნებად წარმოაჩენდა.
2023 წლის მარტში გავრცელდა ინფორმაცია, რომ 2019 წლის მარტში ტალაჰასიდან ვაშინგტონამდე კერძო თვითმფრინავით მგზავრობისას, ფლორიდის გუბერნატორმა პუდინგი სამი თითით შეჭამა.
დესანტისმა უარჰყო, რომ ეს შემთხვევა ოდესმე მოხდა. მაგრამ ნარატივი მაინც დარჩა.
აპრილში ის ისეთ თოჯინას შეადარეს, რომელიც თავს აცანცარებს, მას შემდეგ, რაც ტოკიოში, იაპონიაში მოგზაურობის დროს აგრესიულ რეპორტიორებთან კამათისას ენერგიულად აქნევდა თავს წინ და უკან.
ამ წლის ოქტომბერში პოლიტიკური სამყარო მოიცვა სპეკულაციამ, რომ დესანტისი კოვბოის ჩექმებში სიმაღლის მოსამატებლად დამატებით ამწევებს ატარებდა, რის გამოც მას მეტსახელად "პაწია D" შეარქვეს.
გაურკვეველია, როგორ გამოჩნდა ეს ისტორიები მედიაში, მაგრამ ზოგიერთს თავისი ეჭვები აქვს.
"მან (უაილსმა) იცოდა," - განაცხადა ფლორიდის ყოფილმა რესპუბლიკელმა კონგრესის წევრმა, დევიდ ჯოლიმ Politico-სთან, - "ზუსტად როგორ უნდა დაემარცხებინა რონ დესანტისი თავისი კლიენტის სახელით."
ახლა უაილსი თავის უნარებს ისეთ ადგილას და დროს გამოიყენებს, სადაც ისინი შეიძლება, ყველაზე მეტად იყოს საჭირო.
მან და მისმა უფროსმა ყველა მოწინააღმდეგე დაამარცხეს – მაგრამ შეძლებენ თუ არა ისინი ყველაზე კრიტიკული გამოწვევის დაძლევას: მმართველობას?
წაიკითხეთ ასევე: