ჩრდილოეთ კორეამ გაეროს აცნობა, რომ ბირთვული იარაღის პროგრამას აჩქარებს - რა მიიღო კიმ ჩენ ინიმ პუტინისგან უკრაინასთან ომში კორეელების მონაწილეობის სანაცვლოდ?
ჩრდილოეთ კორეის ელჩმა გაეროში განაცხადა, რომ ფხენიანი ბირთვული იარაღების პროგრამის გაძლიერებას დააჩქარებს. დასავლეთთან დაძაბულობის ზრდის ფონზე, რამდენიმე დღის წინ ჩრდილოეთ კორეამ პირველად გამოცადა კონტინენტთაშორისი ბალისტიკური რაკეტა.
ჩრდილოეთ კორეის ელჩმა გაეროში, კიმ სონგმა, ორშაბათს უშიშროების საბჭოს სხდომაზე აღნიშნა, რომ ფხენიანი პროგრამას "მტრული ბირთვული იარაღის მქონე სახელმწიფოების ნებისმიერი საფრთხის საპასუხოდ" დააჩქარებს.
სამხრეთ კორეის გაერთიანებული შტაბის უფროსის განცხადებით, სამშაბათს დილით, ჩრდილოეთმა კორეის ნახევარკუნძულის აღმოსავლეთით, ზღვისკენ რამდენიმე მოკლე მანძილის ბალისტიკური რაკეტა გაუშვა. იაპონიის სანაპირო დაცვამ ასევე განაცხადა, რომ ჭურვი სავარაუდოდ, ბალისტიკური რაკეტა იყო, ხოლო მაუწყებელმა NHK-მ გადმოსცა, რომ ის, როგორც ჩანს, იაპონიის განსაკუთრებული ეკონომიკური ზონის გარეთ, ოკეანეში ჩავარდა.
უშიშროების საბჭოს სხდომა ხუთშაბათს ფხენიანის მიერ კონტინენტთაშორისი ბალისტიკური რაკეტის გამოცდის განსახილველად მოიწვიეს.
აშშ-სა და უკრაინის განცხადებით, ჩრდილოეთ კორეას რუსეთის კურსკის რეგიონში განლაგებული ჰყავს თითქმის 8 000 ჯარისკაცი, რომლებიც შეიძლება, უახლოეს დღეებში უკრაინაში საბრძოლველად შევიდნენ, და ორივე ქვეყანამ აღნიშნა, რომ თუ ეს ჯარები ბრძოლაში მიიღებენ მონაწილეობას, ლეგიტიმური სამხედრო სამიზნეები გახდებიან.
"აშშ-ის ბირთვული საფრთხე ჩრდილოეთ კორეის წინააღმდეგ უკვე კრიტიკულ წერტილს აღწევს მისი მასშტაბისა და საშიშროების თვალსაზრისით... აშშ-ს დაუფიქრებელი ნაბიჯების გამო, პოტენციური სიტუაცია ომის ზღვარს უახლოვდება", - განაცხადა კიმმა.
უშიშროების საბჭოს შეხვედრის დროს, აშშ-მა ჩინეთი და რუსეთი გაეროში ფხენიანის "სანქციების დამრღვევი საქმიანობის უფრო დეტალური შემოწმებისგან" "უსირცხვილოდ" დაცვაში დაადანაშაულა და განაცხადა, რომ ფხენიანი "უკანონო ბალისტიკური რაკეტების, ბირთვული და მასობრივი განადგურების იარაღის პროგრამების განვითარების გაგრძელების კუთხით გათამამდა".
სავარაუდოდ, ჩრდილოეთ კორეა ცდილობს, უკრაინის წინააღმდეგ რუსეთის ომში ჯარების მიწოდების გარიგების ფარგლებში რუსული სარაკეტო და კოსმოსური ტექნოლოგიები მოიპოვოს. თუმცა აშშ-ს ოფიციალურ პირებს არ უთქვამთ, მათი აზრით, რა მიიღო ჩრდილოეთ კორეამ ვლადიმირ პუტინისგან უკრაინასთან ომში მონაწილეობის სანაცვლოდ.