სტიქიური უბედურება ინდონეზიაში - ვულკანის ამოფრქვევის შედეგად 10 ადამიანი დაიღუპა, მთავრობამ საგანგებო მდგომარეობა გამოაცხადა (ფოტოები)
აღმოსავლეთ ინდონეზიაში ვულკანის ამოფრქვევის შედეგად მინიმუმ 10 ადამიანი დაიღუპა. ინფორმაციას BBC-ი ინდონეზიის ვულკანოლოგიისა და გეოლოგიური კატასტროფების შემცირების ცენტრზე დაყრდნობით ავრცელებს.
არსებული ინფორმაციით, ნუსა ტენგარას პროვინციაში, ლევოტობი ლაკი-ლაკის მთაზე ვულკანის ამოფრქვევის შედეგად წარმოქმნილმა ცეცხლოვანმა ლავამ 4 კილომეტრის რადიუსში მდებარე 7 სოფელი დააზარალა, სადაც რამდენიმე სახლი დაიწვა და დაზიანდა.
სტიქიის გამო ასობით ადამიანი იძულებული გახდა, საკუთარი სახლები დაეტოვებინა და თავი სკოლის შენობებისთვის შეეფარებინა.
როგორც თვითმხილველმა BBC News-ს უამბო, მან საკუთარი თვალით დაინახა ფერფლით დაფარული ადამიანები, ლოდის წვიმები და გადამწვარი სახლები.
ინდონეზიის კატასტროფების სააგენტოს სპიკერის თქმით, უახლოეს დღეებში შესაძლებელია წყალდიდობაც.
ადგილობრივმა მთავრობამ მომდევნო 58 დღის განმავლობაში საგანგებო მდგომარეობა გამოაცხადა.
მთა ლევოტობი ლაკი-ლაკი - ერთ-ერთი ცნობილი ვულკანური მწვერვალია კუნძულ ფლორესზე. მან ამოფრქვევა გასული წლის დეკემბრიდან დაიწყო.