რა წერია ევროკავშირის გაფართოებს ანგარიშში საქართველოს შესახებ და რა განცხადებით მიმართა ბორელმა "ქართულ ოცნებას"
საქართველოს ხელისუფლებამ უნდა შეცვალოს ევროკავშირის საწინააღმდეგო ნარატივები ევროკავშირისა და ქვეყნის მიმართ მისი მხარდაჭერის შესახებ პროაქტიული და ობიექტური კომუნიკაციით , - ამის შესახებ ევროკავშირის გაფართოების ანგარიშშია აღნიშნული, რომელიც დღეს გამოქვეყნდა.
- დოკუმენტის თანახმად, საქართველოში ევროკავშირში ინტეგრაციის პროცესზე პასუხისმგებელი ინსტიტუტები ძირითადად ფუნქციონირებს, თუმცა მიუხედავად იმისა, რომ ევროკავშირში ინტეგრაცია რჩება ქვეყნის პოლიტიკის გაცხადებულ მიზნად, გასული წლის რეფორმები და ზოგიერთი განვითარებული მოვლენა არ შეესაბამებოდა ამ მიზანს და ევროკავშირის დღის წესრიგში პროგრესისთვის მთავრობის მიერ მობილიზებული იყო შეზღუდული პოლიტიკური ყურადღება.
„საქართველოს ხელისუფლებამ უნდა განმარტოს თავისი განზრახვები ამ მოქმედების კურსის შეცვლის გზით. ევროკავშირთან დაკავშირებული რეფორმების უფრო ეფექტიანად გასატარებლად საჭიროა უფრო ძლიერი მრავალპარტიული პოლიტიკური მხარდაჭერა ყველა გადაწყვეტილების მიმღებ სახელმწიფო ინსტიტუტში. უნდა გაძლიერდეს სამინისტრთაშორისო კოორდინაცია და სამოქალაქო მონაწილეობა ევროკავშირის დღის წესრიგის განსახორციელებლად. საქართველოს ხელისუფლებამ უნდა შეცვალოს ევროკავშირის საწინააღმდეგო ნარატივები ევროკავშირისა და ქვეყნის მიმართ მისი მხარდაჭერის შესახებ პროაქტიული და ობიექტური კომუნიკაციით“, - აღნიშნულია დოკუმენტში.
ანგარიშის თანახმად, 2024 წლის ივნისში მიღებული დასკვნების საფუძველზე, 2024 წლის 17 ოქტომბერს ევროპულმა საბჭომ კიდევ ერთხელ გამოხატა თავისი სერიოზული შეშფოთება საქართველოს მთავრობის მიერ განხორციელებული ქმედებების მიმართ, რომელიც ეწინააღმდეგება იმ ღირებულებებსა და პრინციპებს, რომლებსაც ევროკავშირი ეფუძნება.
„ევროპულმა საბჭომ გაიხსენა, რომ ასეთი ქმედება საფრთხეს უქმნის საქართველოს ევროპულ გზას და დე ფაქტო აჩერებს გაწევრიანების პროცესს. ევროკავშირის საერთო საგარეო და უსაფრთხოების პოლიტიკასთან თავსებადობის მაჩვენებელი კვლავ მნიშვნელოვნად დაბალი რჩება, ანუ 49%. საანგარიშო პერიოდში მნიშვნელოვნად გაიზარდა პირდაპირი ფრენების რაოდენობა რუსეთისკენ/ რუსეთიდან სხვადასხვა მიმართულებით“, - აღნიშნულია დოკუმენტში.
ამასთან, ანგარიშში ხაზგასმულია, რომ საქართველო თანამშრომლობდა ევროკავშირთან სანქციების გვერდის ავლის თავიდან აცილების მიზნით.
დოკუმენტის თანახმად, ევროკავშირი მხარს უჭერს საქართველოს სუვერენიტეტს და ტერიტორიულ მთლიანობას მის საერთაშორისოდ აღიარებულ საზღვრებში და 2008 წლიდან არის ჩართული კონფლიქტების მშვიდობიანი მოგვარების მცდელობებში, მათ შორის ევროკავშირის სადამკვირვებლო მისიისა და სამხრეთ კავკასიაში და საქართველოში კრიზისის საკითხებში ევროკავშირის სპეციალური წარმომადგენლის მუშაობით.
- დოკუმენტის თანახმად, სისხლის სამართლის რეფორმამ და პოლიციის რეორგანიზაციამ იმპულსი მოიპოვა, მაგრამ ჯერჯერობით შედეგები შეზღუდულია. ამასთან, სისხლისსამართლებრივი დევნისა და გამოძიების ორგანოებს შორის უფლებამოსილების გამიჯვნის შესახებ გათვალისწინებული ძირითადი კანონმდებლობა ჯერ კიდევ არ არის განხილული.
"კომისიის გასული წლის რეკომენდაციები ნაწილობრივ შესრულდა და ძალაში რჩება. მომავალ წელს საქართველომ უნდა უზრუნველყოს ვიზალიბერალიზაციის კრიტერიუმების უწყვეტი შესრულება და გააძლიეროს ქმედება ევროკავშირის წევრ ქვეყნებში თავშესაფრის უსაფუძვლო განაცხადების მზარდი რაოდენობისა და უკანონი ყოფნის საკითხის მოსაგვარებლად, გააგრძელოს ვიზალიბერალიზაციის კრიტერიუმების შესრულება ფულის გათეთრების საწინააღმდეგო ღონისძიებებთან დაკავშირებით ფულის გათეთრების წინააღმდეგ საბრძოლველად, კორუფციისა და ორგანიზებული დანაშაულის პრევენცია/დაძლევისა და აქტივების აღდგენის მიზნით, შეინარჩუნოს საზღვრის ინტეგრირებული მართვის სტრატეგიისა და მისი თანმხლები სამოქმედო გეგმების განხორციელების ეფექტური დონე“, - აღნიშნულია ანგარიშში.
ამასთან ევროკავშირის უმაღლესმა წარმომადგენელმა საგარეო საქმეთა და უსაფრთხოების საკითხებში, ჯოზეფ ბორელმა გაფართოების შესახებ ანგარიშის წარდგენისას განაცხადა:
"ჩვენი ანგარიში ნათელი გზის წინადადებით გამოდის ხელახლა ჩართულობისთვის. თუ ამის პოლიტიკური ნება იქნება საქართველოს ლიდერებში - ჩვენ ნათელ გზას ვთავაზობთ ევროკავშირისკენ გზაზე ხელახლა ჩართულობისთვის.
“უცხოური გავლენის შესახებ” კანონის გაწვევა, რომელსაც ცუდი გავლენა აქვს სამოქალაქო საზოგადოებასა და მედია ორგანიზაციებზე, და ე.წ. “ოჯახური ღირებულებების” კანონის გაწვევა, ვინაიდან, დისკრიმინაცია ღირებულება არ არის ჩვენს ევროკავშირის ოჯახში”, - განაცხადა ბორელმა.
- ევროკავშირის უმაღლესმა წარმომადგენელმა კიდევ ერთხელ აღნიშნა, რომ დამკვირვებლებს საქართველოში ჩატარებული არჩევნები თავისუფალ და სამართლიანად არ გამოუცხადებიათ.
"რეალობა უნდა გავიგოთ, შესაძლოა პრემიერ-მინისტრ ორბანს განსხვავებული აზრი აქვს, მაგრამ დამკვირვებლებს არჩევნები არ გამოუცხადებიათ, როგორც თავისუფალი და სამართლიანი. ჩვეულებრივ, როდესაც დამკვირვებლები თვლიან, რომ არჩევნები თავისუფალი და სამართლიანია, ისინი ასე ამბობენ. მათ არც საპირისპირო უთქვამთ, მაგრამ არ უთქვამთ რომ იგი თავისუფალი და სამართლიანი იყო. დარღვევების გრძელი სიაა, რომელიც ანალიზსა და განხილვას საჭიროებს. ჩვენ ველით, რომ საქართველოს ორგანოები, რომლებიც პასუხისმგებლები არიან საარჩევნო პროცესის მართვაზე, ამას გამჭვირვალედ გააკეთებენ.
ჩვენ საქართველოს ცენტრალური საარჩევნო კომისიისა და შესაბამისი ორგანოების მიერ დამკვირვებლების მიერ დაფიქსირებული დარღვევების გამოძიებას ველით. დამკვირვებლების თქმით, მთელი პროცესი გამოირჩეოდა დაძაბულობით, პროცედურული შეუსაბამობებით, განსაკუთრებით საჯარო სექტორში დასაქმებულებზე, პირადობის მოწმობის ჩამორთმევითა და დაშინებით. წაიკითხეთ ანგარიში და თქვენი შეფასება გამოიტანეთ. რა თქმა უნდა, ჩემი შეფასება უნგრეთის პრემიერ-მინისტრის შეფასებისგან განსხვავდება, მაგრამ როგორც წესი, ევროკავშირის ყველა წევრს მსგავსი შეხედულება არ აქვს“, - აღნიშნა ჯოზეფ ბორელმა.
წაიკითხეთ ასევე: