ისრაელელთა რეიდი "ჰეზბოლას" სამალავში და მათი ერთ-ერთი ლიდერი საცვლებით - როგორ ჩაბარდნენ ორგანიზაციის წევრები და რა კადრები ვრცელდება
მედიის ცნობით, "ჰეზბოლას" ლიდერი და მისი მებრძოლები მხოლოდ საცვლებში იყვნენ, როდესაც სამხრეთ ლიბანში, მათ სამალავში ისრაელის არმიამ შეაღწია.
- მიმდინარე თვის დასაწყისში ჩატარებული რეიდის ახალ ვიდეო მასალაში ჩან "ჰეზბოლას" მეთაური ჰასან აკილ ჯავადი, რომელსაც ისრაელის თავდაცვის ძალების ჯარისკაცები ბნელ გვირაბში აწყდებიან. ჯავადთან ერთად "ჰეზბოლას" სხვა წევრებიც იმყოფებოდნენ.
კადრებზე ჩანს, როგორ მიდის ბნელ დერეფანში დაჯგუფების გაოცებული ლიდერი, შემდეგ ხელებს სწევს და ებრაელ ჯარისკაცებს ნებდება.
შემდეგ ჯავადი მიწაზე ეცემა და ნელა მიცოცავს მათგან, სანამ ისინი მას დააკავებენ.
ჯავადი და მისი რამდენიმე სხვა მებრძოლი, რომლებიც კომპლექსში იმალებოდნენ და რომლებიც, ასევე, საცვლებში დააკავეს, დაკითხვისთვის ისრაელში გადაიყვანეს.
IDF-ის ოფიციალური პირების განცხადებით, ჯავადმა და მისმა ხალხმა "ჰეზბოლას" ბევრი საიდუმლო გაამჟღავნეს, რაც ისრაელს სამხრეთ ლიბანში რეიდებისას დაეხმარა.
"ტერორისტებმა დაკითხვის დროს, დეტალურად აღწერეს ბევრი ტერორისტული ინფრასტრუქტურა, რომელიც მდებარეობს აიტა აშ შაბის ტერიტორიაზე," - განაცხადეს ისრაელის სამხედრო ძალებში, - "ეს დაეხმარა ადგილზე მყოფ ძალებს, მიზანმიმართულად მოეძებნათ და გაენადგურებინათ ტერორისტული ინფრასტრუქტურა და მომზადებულიყვნენ ამ ტერიტორიაზე არსებული საფრთხეებისთვის."
ისრაელმა განაცხადა, რომ მათ "ჰეზბოლას" რამდენიმე მებრძოლი დააკავეს მას შემდეგ, რაც სამხრეთ ლიბანში, ოქტომბრის დასაწყისში სახმელეთო ოპერაცია დაიწყო, თუმცა დაკავებულთა ზუსტი რიცხვი არ დასახელებულა.