ავღანეთში, ქალებს ერთმანეთს ხმის გაგონება და საუბარი ეკრძალებათ - თალიბანმა ახალი შეზღუდვები შემოიღო: “ყოველდღიურად გვაწამებენ...“
თალიბანმა ავღანეთში ისლამური კანონის მიმდევრებისთვის მორიგი მკაცრი წესები შემოიღო. ქვეყნის “სათნოების ხელშეწყობისა და მანკიერების პრევენციის“ მინისტრმა ქალებისთვის დაწესებული შეზღუდვები ორშაბათს გამოაქვეყნა.
Telegraph-ის ინფორმაციით, ამიერიდან ქალებს ერთმანეთის ხმის გაგონება ეკრძალებათ.
“მიუხედავად იმისა, რომ თალიბანის ახალი გადაწყვეტილების დეტალები გაურკვეველია, ავღანელი უფლებადამცველების თქმით, ეს შეიძლება ნიშნავდეს იმას, რომ ქალებს, ფაქტობრივად, ეკრძალებათ ერთმანეთთან საუბარი,“ - წერს გამოცემა.
როგორც თავის ახალ გზავნილში მინისტრმა ხალიდ ჰანაფიმ აღნიშნა:
“მაშინაც კი, როდესაც ზრდასრული ქალი ლოცულობს და სხვა ქალი გვერდით ჩაუვლის, მან არ უნდა ილოცოს ისე ხმამაღლა, რომ გვერდით მყოფმა გაიგოს“.
მისი თქმით, “ეს არის ახალი წესები, რომელიც ეტაპობრივად განხორციელდება და თითოეულ ნაბიჯში ღმერთი დაგვეხმარება“.
იმის გამო, რომ თალიბანმა ასევე აკრძალა ცოცხალი არსებების ტელევიზიით ჩვენება, სატელევიზიო ეთერში მხოლოდ მინისტრის ხმა გავრცელდა.
“ჩვენთვის ეს ფსიქიკური წამების ფორმაა. ავღანეთში ცხოვრება ჩვენთვის, როგორც ქალებისთვის, წარმოუდგენლად ძნელია - ყოველდღიურად გვაწამებენ. ისინი ამბობენ, რომ ჩვენ არ უნდა გვესმოდეს სხვა ქალების ხმები. ვერ ვხვდები საიდან მოდის ეს შეხედულებები,“ - განუცხადა The Telegraph-ს ქაბულში მცხოვრებმა ავღანელმა ქალმა.
აღსანიშნავია, რომ 2021 წლის აგვისტოში, ხელისუფლებაში მოსვლის შემდეგ, თალიბანი სისტემატურად ზღუდავს ქალთა უფლებებს ავღანეთში.
ქალებს ეკრძალებათ სახის გამოჩენა, ხმამაღლა საუბარი, ქუჩაში მარტო გადაადგილება, უცნობ მამაკაცებთან საუბარი და ა.შ. ქალებს, რომლებიც ეწინააღმდეგებიან ახალ წესებს, პატიმრობა და დასჯა ემუქრებათ.
იხილეთ ასევე:
- თალიბანი უმძიმეს შეზღუდვებს აწესებს: ამიერიდან ქალებს ეკრძალებათ საჯაროდ ხმამაღლა ლაპარაკი და სახლის გარეთ საკუთარი სახის ჩვენება: კიდევ რას გააკონტროლებენ მოჰტასაბინები?
- “ავღანეთში ციყვს უფრო მეტი უფლებები აქვს, ვიდრე ქალს!“ - მერილ სტრიპის შთამბეჭდავი გამოსვლა გაეროს გენერალურ ასამბლეაზე