"ჰეზბოლას" მორიგი ლიდერი ნაიმ ქასემი გახდა - ისრაელი მისი ლიკვიდაციითაც იმუქრება
"ჰეზბოლას" ახალი ლიდერი 71 წლის ნაიმ ჰასემი გახდა. ის ისრაელის მიერ მოკლული ჰასან ნასრალას მოადგილე იყო და ლიბანური ჯგუფის ერთ-ერთ ყველაზე გამორჩეულ ფიგურად მიიჩნევა.
კასემის დანიშვნის შესახებ ცნობების საპასუხოდ, ისრაელის მთავრობა იმუქრება, რომ ახალი ლიდერი წინამორბედების ბედს გაიზიარებს.
"თუ კასემი ჰასან ნასრალასა და ჰაშემ საფიედინის მსგავსად იმოქმედებს, ამ თანამდებობაზე მისი ვადა შეიძლება იყოს ყველაზე ხანმოკლე ტერორისტული ორგანიზაციის ისტორიაში", - ნათქვამია ისრაელის მთავრობის ოფიციალურ განცხადებაში - "ლიბანისთვის სხვა გამოსავალი არ არსებობს, გარდა ამ ორგანიზაციის, როგორც სამხედრო ძალის, დაშლისა“.
- რა არის ცნობილი ქასემის შესახებ
BBC-ის ინფორმაციით, ქასემი 30 წელზე მეტი ხნის განმავლობაში იყო "ჰეზბოლას" გენერალური მდივნის მოადგილე და მისი ერთ-ერთი ყველაზე გავლენიანი ფიგურა.
იგი ბეირუთში დაიბადა და 1982 წელს "ჰეზბოლას" ერთ-ერთი დამფუძნებელი გახდა. ქასემი დაჯგუფების ერთ-ერთი მთავარი საჯარო სპიკერია და ხშირად აძლევს ინტერვიუებს უცხოელ ჟურნალისტებს.
2006 წელს, ისრაელთან სრულმასშტაბიანი ომის დაწყების შემდეგ, ნასრალამ, პრაქტიკულად, შეწყვიტა საჯაროდ გამოჩენა, მის მაგივრად საჯარო განცხადებებს სწორედ ქასემი აკეთებდა. თუმცა, როგორც ჟურნალისტები წერენ, ქასემს არ აქვს ისეთივე ქარიზმა და ორატორული შესაძლებლობები, როგორიც ნასრალას ჰქონდა.
შეგახსენებთ, რომ ჰასან ნასრალა 28 სექტემბერს ბეირუთში ჰეზბოლას მიწისქვეშა შტაბ-ბინაზე ისრაელის საჰაერო თავდასხმის შედეგად დაიღუპა.
იხილეთ ასევე: