რას ასახელებს ეკონომიკის მინისტრი ლარის კურსის არასტაბილურობის მიზეზად და როგორია დღევანდელი კურსი
Bloomberg-ის სავაჭრო პლატფორმაზე 12:00 საათისთვის ერთი დოლარი 2.7375 ლარად ივაჭრება. პლატფორმაზე ვაჭრობა 2.7511 კურსით დაიწყო.
- ეროვნული ბანკის მიერ 25 ოქტომბრის დადგენილი კურსით, ერთი აშშ დოლარის ოფიციალური ღირებულება დღეს 2.7198 ლარია. რაც შეეხება ევროს, მისი კურსი 2.9442 ლარია.
ეკონომიკისა და მდგრადი განვითარების მინისტრი, ლევან დავითაშვილი ლარის კურსის არასტაბილურობას არჩევნებამდე არსებული წნეხითა და გაუგებრობით ხსნის.
- როგორც მან მთავრობის სხდომის დასრულების შემდეგ ჟურნალისტებს განუცხადა, ეროვნული ბანკის ნაბიჯი, კურსის შესანარჩუნებლად რეზერვების გაყიდვასთან დაკავშირებით, არის სწორი.
"ეროვნული ბანკის მიდგომებსა და პოლიტიკას სრულად მინდა მხარი დავუჭირო. ეს გადაწყვეტილებები [რეზერვების გაყიდვა] იყო აუცილებელი იმისთვის, რომ ჩვენ შეგვენარჩუნებინა ეკონომიკური სტაბილურობა იმ პერიოდში, როცა ამის საჭიროება ყველაზე მეტად იდგა. არჩევანის გაკეთებამდე იყო წნეხი, ბუნდოვანება თუ გაურკვევლობა, ხოლო არჩევანის გაკეთების შემდეგ ასეთი ბუნდოვანება და წნეხი მოიხსნა. პირიქით, იქნება სიცხადე და იქნება აბსოლუტურად დადებითი ტენდენციები.
რეზერვებს, რომელიც ეროვნულ ბანკს გააჩნია, სწორედ ასეთი ფუნქცია აქვთ, ასეთი როლის შესრულება შეუძლიათ, რომ შევინარჩუნოთ სტაბილურობა იმ შოკების დროს, ისეთი გამოწვევების დროს, რომელიც ჩვენ გვქონდა. ეს შეიძლება იყოს პოლიტიკური ფაქტორებიდან, ეკონომიკური ფაქტორიდან გამომდინარე. მიზეზის მიუხედავად, ზუსტად ამისთვის უნდა გამოიყენონ რეზერვები, რომ საბოლოოდ გრძელვადიან პერსპექტივაში ეკონომიკის სტაბილური განვითარება შევინარჩუნოთ. შემდეგ პერიოდში ვნახავთ წნეხის მოხსნას. კურსი ნამდვილად შეინარჩუნებს სტაბილურ ნიშნულს, რომელიც ჩვენ კურსს გააჩნია. იმიტომ, რომ ყველა სხვა პარამეტრი არის ჯანსაღი ჩვენს ეკონომიკაში და ჩვენი ეკონომიკა კიდევ უფრო კარგი ტემპით გააგრძელებს წინსვლას. წლის ბოლო კვარტალი იქნება ერთ-ერთი კარგი“, - განაცხადა ლევან დავითაშვილმა.