22
ივნისიდღის ზოგადი ასტროლოგიური პროგნოზი
- ფოტოებო: ვანო გორგიშვილი, ინტერპრესნიუსი
დღეს, 26 ოქტომბერს საქართველო XI მოწვევის პარლამენტს ირჩევს. ამომრჩევლებმა ხმის მიცემა ამ წუთებში, 08:00 საათიდან დაიწყეს.
პირველად საპარლამენტო არჩევნები სრულად პროპორციული სისტემით ჩატარდება - პარლამენტის 150-ვე მანდატი პროპორციული წესით იმ საარჩევნო სუბიექტებს შორის განაწილდება, ვინც 5%-იან საარჩევნო ბარიერს გადალახავს.
ასევე პირველად, 26 ოქტომბრის საპარლამენტო არჩევნები ელექტრონული არჩევნები იქნება, სადაც ამომრჩეველთა დაახლოებით 90% ხმას ელექტრონული მოწყობილობების მეშვეობით მისცემს.
ერთ-ერთი პირველი, ვინც არჩევანი დააფიქსირა, პრეზიდენტია. მან ხმა 67-ე საჯარო სკოლაში განთავსებულ საარჩევნო უბანზე მისცა. როგორც სალომე ზურაბიშვილმა აღნიშნა, მან ხმა მისცა ახალ საქართველოს.
"მთელს საქართველოს მინდა მივულოცო დღევანდელი დღე, რომელიც არის დღე ბედნიერი. მე ხმა მივეცი არა ვის, არამედ რას, ამჯერად. ხმა მივეცი ახალ საქართველოს, იმ საქართველოს, რომლის გულისთვისაც ამ ქვეყანაში 22 წლის წინ ჩამოვედი, რომელზეც ჩემი წინაპრები ლოცულობდნენ. მე მივეცი ხმა იმ საქართველოს, რომელზეც, დარწმუნებული ვარ, ლოცულობს მთელი საქართველო. საღამოს ჩვენ ვიქნებით ყველანი გამარჯვებულები. დამარცხებული არავინ იქნება, იმიტომ, რომ გაიმარჯვებს საქართველო!“, - განაცხადა სალომე ზურაბიშვილმა.
ასევე არჩევანი დააფიქსირა საქართველოს პრემიერ-მინისტრმა, ირაკლი კობახიძემ. მისი თქმით, "ქართული ოცნება" ამომრჩეველს ქვეყნის ნათელ მომავალს, მშვიდობას, ქვეყნის ეკონომიკურ წინსვლას სთავაზობს.
"დღეს კიდევ ერთხელ უნდა შევახსენოთ საკუთარ თავს, რომ ეს არის ძალიან პრინციპული, გადამწყვეტი არჩევნები, რეფერენდუმის ტოლფასი არჩევნები. 2012 წლის არჩევნების ტოლფასი არჩევნები, სადაც კიდევ ერთხელ, საბოლოოდ, უნდა გადაწყდეს ქვეყნის განვითარების მიმართულება. ეს არის რეფერენდუმი ომსა და მშვიდობას შორის;
ეს არის რეფერენდუმი ამორალურ პროპაგანდასა და ტრადიციულ ფასეულობებს შორის; ეს არის რეფერენდუმი ბნელ წარსულსა და ქვეყნის ნათელ მომავალს შორის. თქვენ ხედავთ, რომ არის ორი პოლიტიკური ძალა, რომელიც არსებითად მონაწილეობს ამ არჩევნებში. ერთი მხარე გვთავაზობს იმ ყველაფერს, რაც უნდა დავტოვოთ წარსულში და ჩვენ ვთავაზობთ ამომრჩეველს ქვეყნის ნათელ მომავალს, მშვიდობას, ქვეყნის ეკონომიკურ წინსვლას ყველა მიმართულებით, ჩვენი ქვეყნის განვითარებას. ჩვენ გვაქვს ძალიან ოპტიმისტური პროგნოზი. ჩვენი მოქალაქეებისგან ველოდებით 60%-მდე ხმებს. ეს არის პრინციპულად მნიშვნელოვანი იმისთვის, რომ ქვეყანამ განაგრძოს სტაბილური და მშვიდობიანი განვითარება“,- განაცხადა ირაკლი კობახიძემ.
საკუთარი არჩევანი გააკეთა „ქართული ოცნების“ საპარლამენტო სიის მე-7 ნომერმა, ოლიმპიურმა ჩემპიონმა ლაშა ტალახაძემ. მან არჩევანი საჩხერეში, სოფელ სხვიტორში დააფიქსირა.
ტალახაძის თქმით, ხმა მისცა, მშვიდობას, ერთობას და ქვეყნის ევროპისკენ სვლას. ტალახაძემ ამომრჩევლებს აქტიურობისკენ მოუწოდა. მისი თქმით, ქუდზე კაცი უნდა გამოვიდეს და დააფიქსიროს საკუთარი არჩევანი.
"დღეს ჩემს მშობლიურ საჩხერეში დავაფიქსირე ჩემი აზრი და რა თქმა უნდა, ხმა მივეცი საქართველოში მშვიდობას, ერთობას, ჩვენ და ჩვენი შვილების კეთილ მომავალს. მინდა, საზოგადოებას მოვუწოდო ვიაქტიუროთ. ქუდზე კაცი - ყველა მივიდეთ არჩევნებზე და დავაფიქსიროთ ჩვენი ხმა. წარმატებები საქართველოს და ჩვენს ღირსეულ მომავალს. წინ და წინ, ევროპისკენ! ყველაფერი წესების დაცვითაა. პროცედურა ძალიან ადვილია. ზოგ ადამიანს ჰგონია, რომ რაიმე რთულადაა და შესაძლებელია, რამე გაუთვალისწინებელი მოხდეს. ყველაფერი კარგადაა და როდესაც ადგილზე მიბრძანდებით, დარწმუნდებით, რომ თქვენი ხმა დაცულია“, - განაცხადა ლაშა ტალახაძემ.
"გახარია საქართველოსთვის“ ლიდერმა, გიორგი გახარიამ საკუთარი პოლიტიკური არჩევანი გააკეთა. მან ხმა 42-ე საჯარო სკოლაში განთავსებულ საარჩევნო უბანზე მისცა. გახარია საარჩევნო უბანზე მეუღლესთან, მარიკა ფანცულაიასთან ერთად მივიდა.
გიორგი გახარიამ მოსახლეობას მოუწოდა, რომ არჩევნებზე მივიდნენ და საკუთარი პოზიცია დააფიქსირონ.
"დღეს არის მნიშვნელოვანი დღე. პირველ რიგში, მინდა საქართველოს თითოეულ მოქალაქეს ვთხოვო, რომ აუცილებლად მივიდნენ საარჩევნო უბნებზე. თქვენ უნდა იცოდეთ, რომ ვერავინ ვერასოდეს ვერ გაიგებს, თუ ვის მიეცით ხმა. რაც მთავარია ყველამ ხმა უნდა მივცეთ ქვეყნის დაბრუნებას ნორმალურ მდგომარეობაში. ჩვენ უნდა გავაკეთოთ ყველაფერი იმისთვის, რომ ქვეყანა დაუბრუნდეს ნორმალური, დემოკრატიული, თავისუფალი, სამართლიანი, ევროპული განვითარების გზას, იმიტომ, რომ ეს არ არის მხოლოდ ჩვენი არჩევანი, ეს არის ჩვენი წინაპრების და შვილების არჩევანი”, - განაცხადა გახარიამ.
"ერთიანობა - ნაციონალური მოძრაობის" ერთ-ერთმა ლიდერმა, გიორგი ვაშაძემ საკუთარი არჩევანი დააფიქსირა. საარჩევნო უბანზე ის მეუღლესთან და შვილთან ერთად მივიდა. მან მოქალაქეებს მაქსიმალური აქტიურობისკენ მოუწოდა.
„ვფიქრობ, რომ ჩვენ ყველანი მხარს ვუჭერთ ევროპისკენ სვლას, კეთილდღეობას ევროპაში. რაც მთავარია, უარი ვუთხარი ამ ქვეყნის იზოლაციას. საქართველოს აქვს დიდი პერსპექტივა. მინდა ყველა ჩვენს თანამოქალაქეს, თანამემამულეს ვუთხრა, რომ დღევანდელი დღე არის გადამწყვეტი, რომელიც გადაწყვეტს შემდეგ ათწლეულებს საქართველოში, თუ როგორ ქვეყანაში ვიცხოვრებთ ჩვენ. ამიტომ ყველას გთხოვთ, მიდით არჩევნებზე, მიიღეთ მონაწილეობა, მაქსიმალური აქტიურობა გვჭირდება იმისთვის, რომ ჩვენი დიდი პერსპექტივა მოვიპოვოთ აბსოლუტურად ყველამ. საქართველო არის ღირსეულ ადამიანთა ქვეყანა, რომელიც დარწმუნებული ვარ, ამ ძნელბედობის ჟამს იქნება ერთიანი და საღამოს დიდ გამარჯვებას ვიზეიმებთ ყველა“, - განაცხადა ვაშაძემ.
