იარაღით ვაჭრობასთან დაკავშირებული რუსი ბიზნესმენი და... - ცნობილი ხდება იმ რუსების ვინაობა, რომლებიც სუდანში ჩამოგდებული თვითმფრინავის ბორტზე იმყოფებოდნენ
რამდენიმე დღის წინ სუდანში, დარფურის მხარეში, სადაც ომის ზონაა, ჩამოაგდეს სატვირთო თვითმფრინავი. IL-76. როგორც გაირკვა, ბორტზე რუსები იმყოფებოდნენ. სააგენტო "როიტერსის" ცნობით ბორტზე მყოფებს შორის იყო რუსი ბიზნესმენი, ვიქტორ გრანოვი, რომელიც წარსულში დაკავშირებული იყო იარაღის დილერთან, ვიქტორ ბუტთან და კონგოსთვის იარაღის მიყიდვის საქმეში ფიგურირებდა.
- მაშველებმა სატვირთო თვითმფრინავის ჩამოგდების ადგილზე იპოვეს 67 წლის გრანოვის ვადაგასული პასპორტი.
Amnesty International-ის თანახმად, 2000-იანი წლების დასაწყისში გრანოვი ბიზნესს აწარმოებდა სამხრეთ აფრიკაში და მართავდა ორ ავიაკომპანიას, რომლებიც იარაღს აწვდიდნენ კონგოს.
- თვითმფრინავის ჩამოვარდნის შემდეგ, გავრცელდა ინფორმაცია, რომ ის მანამდე ბაზირებული იყო ბიშკეკის "მანასის" აეროპორტში და რეგისტრირებული იყო ყირგიზეთში - ეკუთვნოდა ყირგიზეთის ავიაკომპანია New Way Cargo Airlines-ს.
როგორც “Real Time”-ის ჟურნალისტებმა გაარკვიეს, ჩამოგდებული თვითმფრინავი ავიაკომპანიის რეესტრიდან მიმდინარე წლის დასაწყისში ამოიღეს. ავიაკომპანია New Way Cargo Airlines-ში კი აცხადებენ, რომ მათ არაფერი აკავშირებთ აღნიშნულ თვითმფრინავთან.
სუდანის სამაშველო ჯგუფის წევრებმა ავიაკატასტროფის ადგილას ასევე იპოვეს მანასის აეროპორტის საშვი, რომელიც გაცემულია გრანოვისთვის. აეროპორტის წარმომადგენლის თქმით, გრანოვი არ იყო მათი თანამშრომელი. ის ასევე განმარტავს, რომ მსგავს საშვებს იღებენ არა მხოლოდ მანასის აეროპორტის თანამშრომლები, არამედ აეროპორტთან მომუშავე კომპანიების პერსონალიც.
- ცნობილი ხდება ისიც, რომ წარსულში გრანოვი იყო არაბეთის გაერთიანებულ საემიროებში რეგისტრირებული ავიაკომპანიის Airline Transport Incorporation-ის მთავარი ინჟინერი.
დაუდასტურებელი ინფორმაციით, IL-76 -ის ბორტზე მყოფი კიდევ ერთი პირი იყო ანტონ სელივანეცი. ჟურნალისტებმა სოციალურ ქსელებში აღმოაჩინეს ფოტოები, რომლებიც ანტონს სწორედ ამ თვითმფრინავის ფონზე ჰქონდა გადაღებული, გაეროს მსოფლიოს სასურსათო პროგრამის ლოგოთი, თუმცა ორგანიზაციაში აცხადებენ, რომ ანტონი მათთან არ მუშაობდა. მისი გარდაცვალების ამბავი ახლობლებმა დაადასტურეს, თუმცა გარდაცვალების მიზეზებზე ღიად არ საუბრობენ.
კიდევ ერთი რუსი, რომელიც ჩამოგდებულ თვითმფრინავში იმყოფებოდა, 61 წლის ალექსანდრე კაბანოვია. ის მსახურობდა საჰაერო სადესანტო ჯარებში და რამდენიმე წელი გაატარა აფრიკაში.