"46 წლის ვარ და მხოლოდ ერთ არჩევნებში მაქვს მონაწილეობა მიღებული, 2012 წელს... წელს გადავწყვიტე, წავიდე არჩევნებში, რადგან ვხედავთ, რამხელა ზეწოლაა ქვეყანაზე" - დეკანოზი შალვა კეკელია

დეკანოზი შალვა კეკელია გავრცელებულ ვიდეომიმართვაში არჩევნებთან დაკავშირებით საუბრობს. ამბობს, რომ ბევრი ადამიანი უსვამს კითხვას, თუ ვის აძლევს ის ხმას.

როგორც დეკანოზი განმარტავს, არჩევნებში მონაწილეობას არასოდეს იღებდა, მხოლოდ ერთხელ 2012 წელს გადაწყვიტა არჩევნებზე წასვლა და ასევე გეგმავს წელსაც. ვიდეომიმართვაში გადაწყვეტილების მიზეზს ხსნის.

"46 წლის ვარ და მხოლოდ ერთ არჩევნებში მაქვს მონაწილეობა მიღებული, 2012 წელს წავედი არჩევნებში, რადგან მაშინ ვხვდებოდი, რომ დიდი ბოროტება ხდებოდა ქვეყანაში და ვერ ვეგუებოდით იმ სიბნელეს, მკვლელობას, ციხეებში ადამიანების გაუპატიურება. ამაზე პროტესტი გამაჩნდა. წავედი და ხმა მივეცი სხვა პარტიას, რადგან დამთავრებულიყო ეს საშინელება, რაც ხდებოდა. იმ დღის მერე არჩევნებში მონაწილეობა არ მიმიღია, რადგან არც ერთ პარტიაზე არ ვთვლიდი, რომ რომელიმე პარტიისთვის ხმა მიმეცა. ამიტომ თავს ვიკავებდი.

წელს გადავწყვიტე, რომ წავიდე არჩევნებში. მივდივარ სამეგრელოში რომ ხმა მივცე, დღესაც იგივე პროცესია, რაც 2012 წელს იყო. ვხედავთ რამხელა ზეწოლაა ქვეყანაზე, როგორი პრობლემები შეუქმნეს ქვეყანას. რაც ჩვენ განცხადებები გვესმის უცხო ქვეყნებიდან, მსგავსი რამე არ ყოფილა მაშინ, როცა ტელევიზია დაიხურა, როცა ეკლესიებს არბევდნენ და მაშინ ხმა არავის ამოუღია.

მე მივმართავ ეკლესიურ ადამიანებს, ვისთვისაც ჩემი აზრი მნიშვნელოვანია. თქვენ დააკვირდით პარტიებს - პარტიებს, ვისი ლიდერებიც ეკლესიის და პატრიარქის მაგინებლები არიან, ვისთვისაც ოჯახის სიწმინდე არაფერს ნიშნავს და ლგბტ პროპაგანდა არაფერს ნიშნავს, როგორ უნდა მისცეთ ხმა? კითხვა მაქვს ეკლესიურ ადამიანებთან, როგორ უნდა მისცეთ ხმა პარტიებს, რომლებიც პატრიარქის და დედა ეკლესიის მაგინებელია. ბუნებრივი ეგეთ პარტიას ხმა არ უნდა მისცე. დანარჩენი ადამიანები თავად გადაწყვეტენ" - ამბობს მამა შალვა კეკელია.