სამი ახალი ავტორი ქართულ ლიტერატურულ სივრცეში - კონკურსის „გახდი ბესტსელერის ავტორი 2024“ გამარჯვებული წიგნების შეძენა უკვე შესაძლებელია

თუ თანამედროვე ქართული ლიტერატურა გაინტერესებთ, მაშინ აუცილებლად უნდა იცოდეთ, რომ კონკურსის „გახდი ბესტსელერის ავტორი 2024“ გამარჯვებული წიგნების შეძენა უკვე შესაძლებელია. მიმდინარე წელს გამარჯვებული ავტორები და წიგნები არიან:

• ელენე კუპრაშვილი - „ფოლადის ფრთები“
• ნათია საგინაშვილი - „ფრთხილად! ცირკში მკვლელია!“
• ნინო ჟვანია - „მეკომოკონები ანუ ძუიჰიცუ“

ახალი გამოცემების შეძენა შესაძლებელია როგორც „ბიბლუსის“ მაღაზიათა ქსელში მთელი საქართველოს მასშტაბით, ისე „პალიტრა L-ის“ ვებგვერდზე. ონლაინ შეძენის შემთხვევაში წიგნებს კურიერი სასურველ მისამართზე მოგიტანთ.

აქვე გაგაცნობთ გამარჯვებულ წიგნებს:

„ფოლადის ფრთები“ - ეს ეპიკური ისტორია ომისა და მითოლოგიის ეპოქაში მიმდინარეობს, სადაც ორი უდიდესი ცივილიზაცია — კართაგენი და რომი — გადამწყვეტი ბრძოლის წინ დგას. მთავარი გმირი, პერისტერი, ღარიბი ბებიაქალის შვილია, რომელიც უმამოდ იზრდება კართაგენში. მისი ცხოვრება თავდაყირა დგება, როდესაც დედას ცნობილი გენერალი ჰამილკარ ბარკა იწვევს, მისი ცოლის გადასარჩენად. სწორედ აქ შეხვდება პერისტერი გენერლის ტყუპ ვაჟებს, ანიჰალს და ჰარტაგოს, და მათი ბედი ერთმანეთში იხლართება.

სიუჟეტი გაჯერებულია მითოლოგიით, სადაც ღმერთები ქედმაღლობით ადევნებენ თვალს ადამიანთა ცხოვრებას, და ადამიანები, ხშირად სასტიკი რიტუალებით, ცდილობენ მათი წყალობის მოპოვებას. გმირებს არაერთი გამოწვევა ელით: ბრძოლები, შეთქმულებები და სამღვდელოების ზეწოლა. მთავარი კითხვა ისაა, თუ როგორ წარიმართება წინასწარმეტყველება და მოახერხებენ თუ არა გმირები მისგან თავის დაღწევას, როცა ერთ მხარეს ადამიანები, ხოლო მეორე მხარეს ღმერთები დგანან.

„ფრთხილად! ცირკში მკვლელია!“ - თბილისის ცირკი იმაზე მეტი საიდუმლოებითაა მოცული, ვიდრე ერთი შეხედვით ჩანს. 9 ოქტომბრის ღამეს ცირკში ჯამბაზს კლავენ. მკვლელობის გამოძიებას თეიმურაზი და მისი სტაჟიორი, ტატო, იწყებენ. ტატოს თავის კარიერაში დებიუტი აქვს. თეიმურაზი კი დეტექტივ-გამომძიებლის თანამდებობის დატოვებას აპირებს და წასვლამდე უკანასკნელი საქმის აღებას თანხმდება.

უდანაშაულო ჯამბაზის მოკვლის მიზეზის გარკვევას მოხუცი დეტექტივი და ახალგაზრდა სტაჟიორი ფართომასშტაბიან დანაშაულთან მიჰყავს. გამოძიების მსვლელობა სახიფათო თავგადასავლის სახეს იღებს, რაც მკვლელობათა ახალი სერიითა და მოულოდნელი აღმოჩენებით სრულდება.

„მეკომოკონები ანუ ძუიჰიცუ“ - მეკომოკონები, ანუ ძუიჰიცუ ” ქმნის ამბისა თუ სამყაროს ერთიანობის განცდას, რომელსაც განსაკუთრებით აძლიერებს თხრობის არაჩვეულებრივი სტილი და ტექნიკა. ჩანაწერების არსი, როგორც თავად იუწყება ავტორი ტექსტში, ქარის მოძრაობაშია. სწორედ ამ მოძრაობაში ირხევა და იკვეთება ხშირად შეუმჩნეველი და თან საოცრად საჭირო წვრილმანები, რომელთა დანახვისკენაც გვიბიძგებს ავტორი. აქ მოთხრობილ უამრავ საინტერესო ამბავს, გარდა მოქნილი ენისა, რომელსაც თან სდევს მელოდიურობისა და მუსიკალურობის შეგრძნება, ამშვენებს ფოტოაპარატით დაფიქსირებული კადრებიც. სწორედ ამგვარი სინთეზით არის გაჯერებული ტექსტი, რომლის მეშვეობითაც ავტორი მკითხველს სხვადასხვა დროსა და სივრცეში ამოგზაურებს.

R