მოლდოვაში რეფერენდუმის შედეგები ისევ შეიცვალა: ბიულეტენების 98,3%-ის დათვლის შემდეგ, ამომრჩეველთა 50%-ზე მეტი მხარს ევროკავშირში გაწევრებას უჭერს
მოლდოვას ცენტრალური საარჩევნო კომისიის ინფორმაციით, ევროკავშირში გაწევრიანების შესახებ საკონსტიტუციო რეფერენდუმის ოქმების 98,3%-ის დამუშავების შემდეგ, ქვეყნის კონსტიტუციაში ევროპული ვექტორის შეტანის მხარდამჭერთა რაოდენობამ მოწინააღმდეგეების რაოდენობას გადააჭარბა.
- ბოლო მონაცემებით, რეფერენდუმში მონაწილეების 50,07%-მა ქვეყნის ევროკავშირში ინტეგრაციის მიზნით კონსტიტუციაში ცვლილების შეტანას მხარი დაუჭირა, 49,93%-მა კი ცვლილების განხორციელების წინააღმდეგ მისცა ხმა.
მოლდოვას მოქალაქეებს უნდა ეპასუხათ "დიახ“ ან "არა“ კითხვაზე: "ემხრობით თუ არა კონსტიტუციაში ცვლილების შეტანას მოლდოვას რესპუბლიკის ევროკავშირში გაწევრიანების მიზნით?“.
ამასთანავე, ოქმების 97%-ის დამუშავების შემდეგ, საპრეზიდენტო არჩევნებში მოქმედი პრეზიდენტი, მაია სანდუ ხმების 41,86%-ით ლიდერობს, მეორე ადგილზე კი ოპოზიციის კანდიდატი ალექსანდრე სტოიანოგლოა, რომელმაც, წინასწარი შედეგებით, ამომრჩევლების ხმების 26,32%-ი მიიღო.
-
მოლდოვაში საპრეზიდენტო არჩევნების მეორე ტური 3 ნოემბერს გაიმართება
მოლდოვაში საპრეზიდენტო არჩევნების მეორე ტური 3 ნოემბერს გაიმართება, რომელშიც ერთმანეთს მოქმედი პრეზიდენტი, მაია სანდუსა და ყოფილი გენერალური პროკურორი, ალექსანდრე სტოიანოგლო დაუპირისპირდებიან, - მედიის ინფორმაციით, ამის შესახებ ქვეყნის ცენტრალური საარჩევნო კომისიის ხელმძღვანელმა ანგელა კარამანმა ჟურნალისტებს განუცხადა.
- მისი თქმით, წინასწარი ინფორმაცია ცხადყოფს, რომ 11 კანდიდატიდან ვერცერთმა ვერ მიიღო ხმების 50%-ზე მეტი, რაც ნიშნავს, რომ ორ კვირაში მეორე ტური ჩატარდება.
“მოლდოვამ როგორც დღეს, ისე ბოლო თვეებში ჩვენი ქვეყნის თავისუფლებასა და დემოკრატიაზე უპრეცედენტო თავდასხმა განიცადა“, - ამის შესახებ მოლდოვას მოქმედმა პრეზიდენტმა, მაია სანდუმ ქვეყანაში არჩევნებისა და რეფერენდუმის ჩატარების შემდეგ გამართულ ბრიფინგზე განაცხადა.
ასევე დაგაინტერესებთ 20:39 / 20-10-2024პრეზიდენტმა მაია სანდუს და ვოლოდიმირ ზელენსკის მიმართა - “ერთად შევალთ ევროპაში!“მისი თქმით, დანაშაულებრივი ჯგუფები გაერთიანდნენ უცხოურ ძალებთან, რათა ქვეყანას ტყუილითა და პროპაგანდით დასხმოდნენ თავს.
“ჩვენ გვაქვს მტკიცებულებები და ინფორმაცია, რომ ეს დანაშაულებრივი ჯგუფები 300 000 ხმის ყიდვას აპირებდნენ. ეს არის უპრეცედენტო მასშტაბის თაღლითობა. მათი მიზანი დემოკრატიული პროცესისთვის ძირის გამოთხრა, საზოგადოებაში შიშის და პანიკის გავრცელება იყო. არ შევწყვეტთ დემოკრატიისა და თავისუფლების დაცვას, ველოდებით საბოლოო შედეგებს და მტკიცე გადაწყვეტილებით ვუპასუხებთ“, - აღნიშნა სანდუმ.
შეგახსენებთ, მოლდოვაში ჩატარებული რეფერენდუმის წინასწარი შედეგების თანახმად, ამომრჩეველთა ნახევარზე მეტმა ხმა ქვეყნის ევროკავშირში გაწევრიანების წინააღმდეგ მისცა. რაც შეეხება საპრეზიდენტო არჩევნების წინასწარ შედეგებს, მასში მოქმედი პრეზიდენტი, მაია სანდუ ხმების 35 პროცენტით ლიდერობს, მეორე ადგილზე კი მისი ოპონენტი, ყოფილი გენერალური პროკურორი ალექსანდრე სტოიანოგლოა რომელსაც მხარს ყველაზე დიდი პრორუსული ოპოზიციური “სოციალისტების“ პარტია უჭერს.
მოლდოვაში ევროინტეგრაციის საკითხზე რეფერენდუმი და საპრეზიდენტო არჩევნები ერთდროულად გუშინ გაიმართა.
იხილეთ ასევე: