"თავისუფლება ვიგრძენი, სუნთქვა შევძელი" - ომიდან გაქცეულმა ექვსმა რუსმა ჯარისკაცმა, საფრანგეთში დროებითი ცხოვრების ვიზა მიიღო
ექვსმა რუსმა ჯარისკაცმა, რომლებიც უკრაინის ომს გაიქცნენ და საფრანგეთს პოლიტიკური თავშესაფარი სთხოვეს. როგორც ირკვევა, დროებითი ცხოვრების ვიზები მიიღეს.
ჯარისკაცები პარიზში ბოლო რამდენიმე თვის განმავლობაში, სხვადასხვა დროს ჩავიდნენ. რუსი ჯარისკაცების მონათხრობის თანახმად, ისინი თავდაპირველად ყაზახეთში, 2022 და 2023 წლებში გაიქცნენ.
- "როდესაც საფრანგეთში ჩავედი, ეს იყო პირველი შემთხვევა, როცა სრულად შევძელი ამოსუნთქვა. სიმშვიდე და თავისუფლება ვიგრძენი... ყველაზე უარესი უკან დარჩა", - უთხრა ინტერვიუში Guardian-ს ალექსანდრემ, ყოფილმა რუსმა კონტრაქტორმა ჯარისკაცმა, რომელიც უკრაინაში გაგზავნეს და იქიდან 2023 წლის ზაფხულში გაიქცა.
უფლებადამცველების ცნობით, რუსეთის მიერ უკრაინაში შეჭრის დაწყების შემდეგ, არაერთი რუსი ჯარისკაცი გაიქცა და უარი თქვა ბრძოლაზე.
- დასავლეთი დიდი ხანია ვერ იღებს გადაწყვეტილებას, მიიღოს თუ არა გაქცეული რუსი ჯარისკაცები. არსებობს კითხვები იმის შესახებ, როგორ მოეპყრონ მათ - როგორც გმირებს, პოტენციურად საფრთხის შემცველ პირებს, თუ ომის დამნაშავეებს. მიუხედავად იმისა, რომ ევროკავშირმა და მისმა წევრმა სახელმწიფოებმა საჯაროდ განიხილეს რუსი დეზერტირებისთვის თავშესაფრის შეთავაზება, გადაწყვეტილება არ მიღებულა და დეზერტირებისთვის თავშესაფრის მიღება რთული აღმოჩნდა.
"ეს არის პირველი შემთხვევა, როდესაც ევროკავშირის ქვეყანამ შეუშვა დეზერტირთა ჯგუფი, რომელსაც არ ჰქონდა არანაირი სამგზავრო დოკუმენტი ან უცხოური პასპორტი", - განაცხადა უფლებადამცველმა ივან ჩუვილიაევმა, რომელიც რუს ჯარისკაცებს ფრონტიდან გაქცევაში დაეხმარა.
- დეზერტირების უმეტესობა რუსეთის მეზობელ ქვეყნებში გაიქცა, ძირითადად სომხეთსა და ყაზახეთში - იქ შესვლა პასპორტის გარეშე შეეძლოთ, მაგრამ ისინი სხვა ქვეყანაში წასვლის შესაძლებლობის გარეშე დარჩნენ.
მოსკოვი მათ დასაჭერად დიდ ძალისხმევას სწევს. იზრდება იმ შემთხვევების რაოდენობა, როდესაც დეზერტირები, რომლებიც პოსტსაბჭოთა ქვეყნებში იმალებიან, მოიტაცეს ან რუსეთში დაადეპორტეს.
"ყაზახეთში ვერასდროს იგრძნობ თავს უსაფრთხოდ; უბრალოდ, თავდახრილმა უნდა იარო," - თქვა ალექსანდრემ, რომელმაც რუსეთის მხრიდან თვალთვალის თავიდან ასაცილებლად SIM ბარათისა და საბანკო ანგარიშის გარეშე ცხოვრება აღწერა. ყაზახეთიდან მან YouTube არხი ანონიმურად შექმნა, რომლითაც სხვა ჯარისკაცებს მოუწოდებდა დეზერტირობისკენ.