"გულშემატკივრების მხრიდან ალბანეთის ჰიმნზე ტაშის დაკვრა ძალიან კარგი ჟესტი იყო, ეს დასაფასებელია" - ალბანელების მთავარი მწვრთნელი

ერთა ლიგის მეოთხე ტურში საქართველოს ნაკრებთან მოგებული მატჩის (1:0) შემდეგ პრესკონფერენციაზე ალბანეთის ეროვნული გუნდის მწვრთნელმა სილვინიომ ისაუბრა:

"თანაბარი ჯგუფია და ნებისმიერს ნებისმიერის დამარცხება შეუძლია. სანიოლი აქამდე გუნდს ხუთმცველიანი დაცვით ათამაშებდა, მაგრამ ჩვენი გამარჯვების მიზეზი არა ტაქტიკა, არამედ ისაა, რომ ჩვენ მათგან განსხვავებით შანსი გამოვიყენეთ. მოგებით გახარებული ვარ და იმედია, ბოლო ორ საშინაო შეხვედრაშიც მივაღწევთ მიზანს.

სანიოლი კარგად მუშაობს, კარგი ფეხბურთელებით დაკომპლექტებული გუნდი ჰყავს. ბოლო ორი ტური დაძაბული იქნება. როგორც ვთქვი, ჯგუფში ფავორიტი არ არის. შანსი ბოლომდე ყველას ექნება. ცვლილებები ფეხბურთელების დაღლილობის გამო გავაკეთე და ამან იმუშავა. გულშემატკივრების მხრიდან ალბანეთის ჰიმნზე ტაშის დაკვრა ძალიან კარგი ჟესტი იყო. ეს დასაფასებელია" - თქვა მწვრთნელმა.

ცნობისთვის, სექტემბერში ალბანეთი-საქართველოს მატჩი ტირანაში გაიმართა. მაშინ ერთადერთი გოლი მატჩში გიორგი ქოჩორაშვილმა გაიტანა. ალბანელი გულშემატკივარი, რომელიც "ჯოჯოხეთის" მოწყობით გვემუქრებოდა, სტადიონზე საკმაოდ არაეთიკურად მოიქცა - ჯერ საქართველოს ჰიმნის შესრულებისას უსტვინეს, მარცხის შემდეგ კი ქართველი გულშემატკივრის მისამართით ნივთების სროლა და შეძახილები დაიწყეს.

წაიკითხეთ ასევე:

• "მადლობა გულშემატკივარს და ბოდიში, რომ გაწბილებულები გავუშვით“ - რა თქვა ბუდუ ზივზივაძემ ალბანეთთან მატჩის შემდეგ
• "საჯარიმოში არასწორ გადაწყვეტილებებს ვიღებდით" - რა თქვა ვილი სანიოლმა ალბანეთთან მარცხის შემდეგ და რატომ ათამაშა ნაკრები განსხვავებული ტაქტიკით