ჩრდ. კორეა აცხადებს, რომ ფხენიანში კიმ ჩენ ინის მადისკრედიტირებელი პროკლამაციები დრონებიდან ჩამოყარეს - მომხდარში სამხრეთელებს ადანაშაულებენ
ჩრდილოეთ კორეამ სამხრეთ კორეა ფხენიანში დრონების გაგზავნაში დაადანაშაულა, რომლებმაც კიმ ჩენ ინის კრიტიკით სავსე პროკლამაციები გადმოყარეს. ჩრდილოეთმა საზღვარზე საარტილერიო დანაყოფების მზადყოფნა გამოაცხადა და ორ ქვეყანას შორის დამაკავშირებელი გზების აფეთქებით დაიმუქრა.
სამხრეთის თავდაცვის მინისტრმა თავდაპირველად უარყო ბრალდებები, თუმცა შეერთებული შტაბების ხელისუფლებამ განაცხადა, რომ ვერ დაადასტურებდნენ, რამდენად შეესაბამება სიმართლეს ჩრდილოეთ კორეის ბრალდებები. ჩრდილოეთ კორეის სახელმწიფო ტელევიზიით გავრცელდა დრონის სავარაუდო გამოსახულება, რომელზეც ჩანს ფრთიანი თეთრი ობიექტი ბნელ ცაზე.
ეს პირველი შემთხვევაა, როდესაც ჩრდილოეთი მეზობელს დრონებით პროკლამაციების გავრცელებაში ადანაშაულებს. ადრე სამხრეთელი აქტივისტები ამ მიზნით ბუშტებს იყენებდნენ. საპასუხოდ, ჩრდილოეთმა ბოლო თვეების განმავლობაში ათასობით ბუშტი გადააფრინა სამხრეთისკენ, რომლებიც სავსე იყო ნაგვით და სავარაუდოდ, ექსკრემენტებით.
ჩრდილოეთის მწვავე რეაქცია განპირობებულია იმით, რომ რეჟიმის ლეგიტიმურობა კიმების დინასტიის დადებით იმიჯზეა დამოკიდებული. კიმის დამ, კიმ იო-ჯონგმა, სამხრეთი გააფრთხილა, რომ დამატებითი დრონების აღმოჩენა "აუცილებლად გამოიწვევს საშინელ კატასტროფას" მათთვის.
დამკვირვებლები ფიქრობენ, რომ ჩრდილოეთი ცდილობს აშშ-ს საპრეზიდენტო კანდიდატებს შეახსენოს თავისი უნარი, გააღვივოს არასტაბილურობა რეგიონში. ეს ინციდენტი ბოლო თვეების განმავლობაში ორ კორეას შორის ურთიერთობების მკვეთრ გაუარესებას ასახავს.