ვინ დაიპყრო ევერესტი პირველად? - 100 წლის წინ დაკარგული ალპინისტის ფეხმა შესაძლოა, დიდი საიდუმლო ამოხსნას

ახალგაზრდა ბრიტანელი ალპინისტის, ენდრიუ კომინ ირვინის ფეხი ევერესტის მწვერვალზე გაუჩინარებიდან 100 წლის შემდეგ იპოვეს. ეს აღმოჩენა ხელს შეუწყობს დედამიწის უმაღლესი მწვერვალის დაპყრობის ისტორიაში ერთ-ერთი ყველაზე დიდი საიდუმლოს ამოხსნას. ფეხი დოკუმენტალისტებმა იპოვეს, რომლებიც National Geographic-ისთვის დოკუმენტურ ფილმს იღებდნენ.

ირვინი 1924 წელს, ჯორჯ მელორისთან ერთად ევერესტზე გაუჩინარდა. მელორის ცხედარი 1999 წელს აღმოაჩინეს, ირვინი კი ამ დრომდე დაკარგულად ითვლებოდა. ოჯახისთვის აღმოჩენა დიდი შვება იყო. როგორც ირვინის დისშვილი ჯული სამერსი აღნიშნავს, ამბის გაგებისას "უბრალოდ გავქვავდი... მისი გვამის პოვნის იმედი დიდი ხნის წინ დავკარგეთ".

ფეხსაცმელში აღმოჩენილ წინდაზე ენდრიუ ირვინის ინიციალები და გვარია დატანილი - A.C. Irvine.

გაუჩინარებისას ირვინი 22 წლის იყო. მისი გაუჩინარება ევერესტის ერთ-ერთ უდიდეს საიდუმლოდ ითვლება. იმის გასარკვევად, თუ ვინ დალაშქრა ევერესტი პირველად, აუცილებელია ირვინის ფოტოაპარატის პოვნა:

ფაქტია, რომ ირვინი ყოველთვის თან ატარებდა კამერას. ამიტომ, ზოგიერთი მკვლევარი იმედოვნებს, რომ მთამსვლელის ცხედრის აღმოჩენის შემთხვევაში, აუცილებლად იპოვიან მის კამერასაც - ფოტოებით, რომლებიც შესაძლოა მწვერვალზე იყოს გადაღებული.

აღსანიშნავია, რომ ევერესტის დალაშქვრის ოფიციალურ თარიღად 1953 წლის 29 მაისი სახელდება - ალპინისტები, ედმუნდ ჰილარი და თენცინგ ნორგეი პირველები არიან, ვინც “ჯომოლუნგმა” დაიპყრეს. მკვლევართა გარკვეული ნაწილი ფიქრობს, რომ ევერესტის უკიდურეს წერტილამდე 1924 წლის ექსპედიციის წევრებმა - ჯორჯ მელორიმ და სენდი ირვინმა მიაღწიეს და უკან დაბრუნებისას დაიღუპნენ.

წყარო