27 წლის უკრაინელი ჟურნალისტი რუსეთის ციხეში გარდაიცვალა - რა დეტალები ხდება ცნობილი?

უკრაინელი ოფიციალური პირების განცხადებით, უკრაინელი ჟურნალისტი, რომელიც მოსკოვმა ოკუპირებული აღმოსავლეთ უკრაინიდან რეპორტაჟის კეთებისას დააკავა, რუსულ პატიმრობაში გარდაიცვალა.

• ვიქტორია როშჩინა, რომელსაც ამ თვეში 28 წელი შეუსრულდებოდა, გასული წლის აგვისტოში გაუჩინარდა, მას შემდეგ, რაც რუსეთის მიერ კონტროლირებად აღმოსავლეთ უკრაინაში რეპორტაჟის გადასაღებად გაემგზავრა.

უკრაინის ჟურნალისტთა კავშირის ცნობით, ის 2024 წლის აპრილამდე დაკარგული იყო, შემდეგ კი მამამისმა მოსკოვის თავდაცვის სამინისტროსგან მიიღო წერილი, სადაც ნათქვამი იყო, რომ ის პატიმრობაში იმყოფებოდა.

მისი დაკავების გარემოებები არ გასაჯაროებულა და არ იყო ნათელი, კონკრეტულად სად, რუსეთის რომელ ციხეში იხდიდა სასჯელს.

"სამწუხაროდ, ინფორმაცია ვიქტორიას გარდაცვალების შესახებ დადასტურდა", - განაცხადა პეტრო იაცენკომ, უკრაინის ტყვეთა კოორდინაციის შტაბის წარმომადგენელმა ხუთშაბათს, - "ნაადრევია საუბარი გარდაცვალების გარემოებებზე – ჩვენ მათ დასადგენად ვმუშაობთ ".

პრესის უფლებების დამცველმა ჯგუფმა, "რეპორტიორები საზღვრებს გარეშე" სოციალურ მედიაში განაცხადა, რომ როშჩინას გარდაცვალებით შოკირებულია და მის ნათესავებს სამძიმარი გამოუცხადა.

რუსული საინფორმაციო საშუალება Mediazona-ს ცნობით, ის ტაგანროგის ციხიდან მოსკოვში გადაყვანისას, უკრაინის საზღვართან ახლოს გარდაიცვალა.

უკრაინამ მაისში განაცხადა, რომ ოცდახუთზე მეტი უკრაინელი მედია ოფიციალური პირი იმყოფებოდა რუსულ ტყვეობაში და მიმდინარეობდა მოლაპარაკებები მათ დაბრუნებაზე.

როშჩინა მუშაობდა ფრილანსერად სხვადასხვა დამოუკიდებელი საინფორმაციო საშუალებებისთვის, მათ შორის Ukrainska Pravda-სთვის და თანამშრომლობდა აშშ-ს დაფინანსებული მედია საშუალების Radio Free Europe-ის უკრაინულ სამსახურთან.

აღმოსავლეთ უკრაინიდან მომზადებული რეპორტაჟებისთვის 2022 წელს მას მიენიჭა "ჟურნალისტიკის სიმამაცის" ჯილდო საერთაშორისო ქალთა მედია ფონდის მიერ.

წყარო