"სააკაშვილმა თქვა, რომ არ ენდობოდა გივი თარგამაძეს და..." - რა მოხდა 2016 წელს, როცა თარგამაძის მანქანა ააფეთქეს: საქმეზე დაკავებული დარჩო ხეჩუაშვილის ჩვენების დეტალები

ოპოზიციონერი პოლიტიკოსის გივი თარგამაძის განზრახ მკვლელობის მცდელობისთვის მსჯავრდებულმა პირმა დარჩო (დავით) ხეჩუაშვილმა, რომელიც ცოტა ხნის წინ საქართველოში შემოსვლისას დააკავეს, გამოძიებას მნიშვნელოვანი ინფორმაცია მიაწოდა.

• ჩვენებიდან ირკვევა, რომ 2016 წელს ყოფილმა პრეზიდენტმა მიხეილ სააკაშვილმა თარგამაძის თვალთვალი დაავალა ვინმე შოთა ჭიჭიაშვილს, თავის მხრივ კი თვალთვალისა და კონტროლის შესახებ დავალება ჭიჭიაშვილმა ხეჩუაშვილს გადააბარა.

"საზოგადოებისთვის ცნობილია, რომ საქართველოს შინაგან საქმეთა სამინისტროს თანამშრომლებმა 19 სექტემბერს დააკავეს 2016 წლის 4 ოქტომბერს დამამძიმებელ გარემოებებში გივი თარგამაძის და სხვა პირების მკვლელობის მცდელობის ფაქტზე ძებნილი დარჩო ხეჩუაშვილი. აღნიშნული სისხლის სამართლის საქმის ფარგლებში გამოიკითხა მსჯავრდებული დარჩო ხეჩუაშვილი, რომელმაც გამოძიებას მნიშვნელოვანი ინფორმაცია მიაწოდა. როგორც მსჯავრდებულის ჩვენებიდან ირკვევა, 2016 წლის აგვისტოს ბოლოს დარჩო ხეჩუაშვილი შეხვდა მისთვის უცნობ პირს, ვინმე „დიმას“ (დიმიტრი), რომელმაც მას შოთა (მევლუდ) ჭიჭიაშვილის დანაბარები გადასცა ჭიჭიაშვილთან შეხვედრის თაობაზე.

მსჯავრდებულის თქმით, მას შოთა ჭიჭიაშვილთან წარსულში ნაცნობობა აკავშირებდა და შესაბამისად, აღნიშნულ შეხვედრას დათანხმდა. შოთა ჭიჭიაშვილმა შეხვედრისას მსჯავრდებულს განუცხადა, რომ იგი ცოტა ხნის წინ შინაგან საქმეთა მინისტრის ყოფილ მოადგილესთან გია ლორთქიფანიძის ერთად, უკრაინაში საქართველოს ყოფილ პრეზიდენტს მიხეილ სააკაშვილს შეხვდა. ჭიჭიაშვილის თქმით, სააკაშვილმა შეხვედრაზე საუბრისას თქვა, რომ არ ენდობოდა მისი პარტიის წევრს გივი თარგამაძეს, რადგან მისი ინფორმაციით, თარგამაძე 2016 წლის საპარლამენტო არჩევნების წინ, იმჟამინდელ საქართველოს ხელისუფლებასთან თანამშრომლობდა და აქედან გამომდინარე, სააკაშვილმა ჭიჭიაშვილს გივი თარგამაძის კონტროლი და თვალთვალი დაავალა.

თავის მხრივ შოთა ჭიჭიაშვილმა გივი თარგამაძის თვალთვალში და მისი გადაადგილების შესახებ ინფორმაციის მიწოდებაში დარჩო ხეჩუაშვილს დახმარება სთხოვა ოდესაში კარგ თანამდებობაზე დანიშვნის სანაცვლოდ, რაზეც მსჯავრდებული დათანხმდა და მათ საერთო ნაცნობ „დიმასთან“ ერთად, გივი თარგამაძის თვალთვალი და გადაადგილების კონტროლი დაიწყო.

დარჩო ხეჩუაშვილის ჩვენებით, ისინი გივი თარგამაძეს თავდაპირველად მისი კუთვნილი „მერსედესის“ მარკის ავტომანქანით უთვალთვალებდნენ, ხოლო შემდეგ "დიმამ" ხეჩუაშვილის კუთვნილი ავტომანქანის იდენტური, ტრანზიტული სანომრე ნიშნების მქონე სხვა ავტომანქანა მიიყვანა და ხეჩუაშვილს განუცხადა, რომ გივი თარგამაძის სათვალთვალოდ ეს კონკრეტული მანქანა გადასცეს, რომელსაც თვალთვალის დროს ძირითადად ხეჩუაშვილი მართავდა.

• მსჯავრდებულის განცხადებით, ერთ-ერთი მორიგი თვალთვალის დღეს, კერძოდ 2016 წლის 4 ოქტომბერს, ქალაქ თბილისში, კოლმეურნეობის მოედანზე არსებულ "ნაციონალური მოძრაობის“ ოფისთან მყოფმა დარჩო ხეჩუაშვილმა ტელეფონის საშუალებით აცნობა შოთა ჭიჭიაშვილს, რომ გივი თარგამაძე "ნაციონალური მოძრაობის“ ოფისში შევიდა. მას შემდგომ, რაც გივი თარგამაძემ დატოვა პარტიის ოფისი და ჩაჯდა ავტომანქანაში, აღნიშნულის შესახებ მსჯავრდებულმა კვლავ მიაწოდა ინფორმაცია შოთა ჭიჭიაშვილს, რის შემდეგაც გივი თარგამაძის ავტომანქანა აფეთქდა.

ავტომანქანის აფეთქების შემდგომ ხეჩუაშვილმა შოთა ჭიჭიაშვილს შეატყობინა გივი თარგამაძის ავტომანქანის აფეთქების თაობაზე, რის შემდგომაც შოთა ჭიჭიაშვილის მითითებით, საქართველოს ტერიტორია დატოვა და საქართველოს სახელმწიფო საზღვრის გვერდის ავლით თურქეთის ტერიტორიაზე უკანონოდ გადავიდა.

საზოგადოებას შევახსენებთ, რომ დარჩო ხეჩუაშვილი დამამძიმებელ გარემოებებში გივი თარგამაძის და სხვა პირების მკვლელობის მცდელობის, სხვისი ნივთის განზრახ დაზიანების, ჯგუფურად ცეცხლსასროლი იარაღის, საბრძოლო მასალის და ასაფეთქებელი მოწყობილობის შეძენა შენახვა ტარების ფაქტებზეა მსჯავრდებული და სასჯელის სახედ და ზომად განსაზღვრული აქვს 18 წლით თავისუფლების აღკვეთა.შინაგან საქმეთა სამინისტროში სისხლის სამართლის საქმეზე გამოძიება გრძელდება საქმესთან შემხებლობაში მყოფი სხვა პირების და გარემოებების დადგენის მიზნით" - ნათქვამია პროკურატურის ინფორმაციაში.

ცნობისთვის, მსჯავრდებულ ხეჩუაშვილზე საერთაშორისო ძებნა იყო გამოცხადებული, მას თბილისის საქალაქო სასამართლოს მიერ 2019 წელს დაუსწრებლად, 18-წლიანი პატიმრობა მიესაჯა. ის სასამართლომ დამნაშავედ ცნო დამამძიმებელ გარემოებებში განზრახ მკვლელობის მცდელობაში, ასევე, ცეცხლსასროლი იარაღის, საბრძოლო მასალის, ფეთქებადი ნივთიერების, ასაფეთქებელი მოწყობილობის მართლსაწინააღმდეგოდ შეძენა-შენახვა-ტარებაში, გასაღებისა და სხვისი ნივთის დაზიანება-განადგურებაში. გამოძიების ინფორმაციით, მსჯავრდებულმა გამოძიებით დაუდგენელ თანამზრახველთან ერთად იმჟამინდელი პარლამენტის წევრის, გივი თარგამაძის მკვლელობა განიზრახა.

ვინ არის დარჩო ხეჩუაშვილი?

დავით ხეჩუაშვილი 2008-დან 2012 წლის სექტემბრამდე კუდ-ის მე-5 სამმართველოში მუშაობდა, უფრო ადრე - თავდაცვის სტრუქტურებში. ერთ-ერთი ინფორმაციით, 2016 წლის 20 მაისიდან 30 ივნისამდე ის უკრაინაში იმყოფებოდა. ხეჩუაშვილს განათლება სანქტ-პეტერბურგში აქვს მიღებული, სამხედრო დაზვერვის ინსტიტუტში სწავლობდა და რუსულ სპეცსამსახურებთან მისი კავშირიც განიხილება.

ბრალდებულის მამა ანზორ ხეჩუაშვილი 2016 წელს გამორიცხავდა დანაშაულში თავისი შვილის მონაწილეობას. ამბობდა, რომ ამ ფაქტამდე 5 დღით ადრე მისი შვილი სამუშაოდ რუსეთში წავიდა. მისივე თქმით, დარჩო შევარდნაძეზე განხორციელებულ ტერაქტშიც ფიგურირებდა, თუმცა მაშინ სასამართლომ უდანაშაულოდ ცნო. წლების წინ დარჩო ხეჩუაშვილის სახელმა ასევე გაიჟღერა მუხროვანის ამბოხების საქმეშიც. თუმცა კონკრეტულად რა როლი შეასრულა, უცნობია.

ბრალდებულმა იმავე დღეს დატოვა საქართველო, როცა გივი თარგამაძის მანქანა ააფეთქეს და ვრცელდებოდა ინფორმაცია, რომ ის ბოლო დროს თავს რუსეთის ფედერაციას აფარებდა.

ცნობილი გახდა მაშინვე, რომ "მერსედესის“ მარკის ფურგონი, სახელმწიფო ნომრით, AA355TA, რომლითაც დარჩო ხეჩუაშვილი მოძრაობდა, მისი საკუთრება იყო, თუმცა, მანქანა ახლო ნათესავზე, ბორის ჩაგუნავაზე ჰქონდა გადაფორმებული. ბორიც ჩაგუნავაც ასევე ბრალდებული იყო ამ საქმეზე და ის ხეჩუაშვილის სიძე იყო.