როგორ უნდა შევარჩიოთ ღვინო? - რჩევები სომელიე თეონა თოხაძისგან

საშემოდგომო ტრადიცია გრძელდება - 12 ოქტომბერს თბილისი უმასპინძლებს რიგით მე-6 ღვინის ფესტივალს, სადაც წარმოდგენილი იქნება ბიო ღვინო, მცირე მარნები და მსხვილი საწარმოები, ქართული ნუგბარი და სხვადასხვა ტრადიციული პროდუქტი. შესაბამისად, კიდევ უფრო აქტუალური ხდება, რა უნდა გავითვალისწინოთ ღვინის შერჩევისას და რა განსაზღვრავს მის ხარისხს?

ამის გარკვევაში დაგვეხმარება სომელიე თეონა თოხაძე, რომელიც ფესტივალზეც გიმასპინძლებთ და ღვინის შესახებ საინტერესო ფაქტებს გაგიზიარებთ. იმისათვის, რომ ღონისძიებას კიდევ უფრო მომზადებულები ესტუმროთ, პროფესიონალი რამდენიმე რჩევას გვიზიარებს:

რა კრიტერიუმებით უნდა ვიხელმძღვანელოთ ღვინის შერჩევისას?

მაშინ როდესაც ღვინის სამყარო დღეს ძალიან ფართო და მრავალფეროვან არჩევანს გვთავაზობს, ღვინის შერჩევა ერთგვარ მოგზაურობას წააგავს, თავისი ძიებითა და აღმოჩენებით. იმისათვის, რომ ეს პროცესი გაგვიადვილდეს, სჯობს თავიდანვე განვსაზღვროთ, თუ რისთვის ვარჩევთ ღვინოს, იქნება ეს დღესასწაული, ვახშამი თუ უბრალოდ პირადი მოხმარებისთვის.

არაფერი ისე არ უხდება დღესასწაულს როგორც ცქრიალა ღვინო. აქაც საკმაოდ დიდი არჩევანია: შამპანური, პროსეკო, კავა, პეტნატები... არჩევანი კი დამოკიდებულია გემოვნებასა და ბიუჯეტზე. ვახშამზე, სადაც ბევრი ხალხია მოწვეული, სჯობს ისეთ ღვინოები შევარჩიოთ, რომელიც კარგად უხდება კერძებს და ამასთანავე ყველას გემოვნებაში ჯდება. ასეთი „უნივერსალური“ და „საყოველთაო სიყვარულით“ მოსარგებლე ღვინოები, მრავლად გვაქვს. ვახშმის დასაწყისისთვის თეთრებიდან ასეთი ღვინოა კახური მწვანე და ძირითადი კერძებისთვის უკვე - საფერავი.

რაც შეეხება პირად მოხმარებას, მნიშვნელოვანია გავითვალისწინოთ, თუ როგორი სტილის ღვინოები მოგვწონს: მსუბუქსხეულიანი, სრულსხეულიანი, ახალგაზრდა, დავარგებული, ქვევრში დავარგებული თუ კასრში ნამყოფი. თუმცა როგორც თავიდანვე აღვნიშნე, ღვინის შერჩევა, მოგზაურობას ჰგავს, სადაც ამხელა არჩევანის პირობებში, ერთ კონკრეტულ სტილზე და მიმდინარეობაზე შეჩერება საზღვრებში ჩაკეტვას ჰგავს. რაც უფრო მეტ სხვადასხვა ტიპის ღვინოს გავსინჯავთ და ღია ვიქნებით ახალი აღმოჩენებისთვის, მით უფრო გაგვეზრდება თვალსაწიერი და ჩამოგვიყალიბდება გემოვნება.

საინტერესოა არომატი, ფერი და ასევე ფასი თუ განსაზღვრავს ღვინის ხარისხს?

მიუხედავად იმისა რომ ინტენსიური ფერი და არომატები წინაპირობას ქმნის გვაფიქრებინოს, რომ საინტერესო ღვინოსთან გვაქვს საქმე, მხოლოდ ეს კომპონენტები არაა საკმარისი ღვინის ხარისხის განსაზღვრისთვის. მაგალითად, მსოფლიოში ერთ-ერთი ყველაზე ძვირადღირებული და ხარისხიანი ბურგუნდიული ღვინო Romanée-Conti ღია ლალისფერი, თითქმის გამჭვირვალეა. ღვინის ხარისხზე მისი კომპლექსურობა, ბალანსი, ინტენსიურობა და გამყოლი გემო არის პასუხისმგებელი. რაც შეეხება ფასისა და ხარისხის შეფარდებას, აქ კავშირი არის, თუმცა იმის თქმა, რომ მაღალფასიანი ღვინო ავტომატურად მაღალ ხარისხს ნიშნავს, ასე არ არის. მაღალი ფასი უფრო დაპირებას ჰგავს, მეღვინეობის მხრიდან განაცხადია, რომ ხარისხიან ღვინოსთან გვექნება საქმე. მაგალითისთვის, 500-ლარიან და 5000-ლარიან ღვინოს შორის ფასის მკვეთრი სხვაობა ხარისხში იმავე განსხვავებას არ იძლევა. აქ უკვე სხვა ფაქტორები ერთვება: ბრენდის სახელი, ტრადიციები და ა.შ.

საინტერესოა, თავად რომელ ღვინოს ანიჭებთ უპირატესობას?

გააჩნია შემთხვევას და ადგილს. თუმცა ხშირად უფრო მსუბუქი, მაღალმჟავიანი, არომატულ ღვინოებს ვირჩევ, თუ ჯიშების მიხედვით ვიმსჯელებთ, ქართული ღვინის შემთხვევაში ცოლიკაურს, ხოლო უცხოურის - რისლინგს.

გასული წლის მსგავსად, 2024 წლის თბილისის ღვინის ფესტივალის სტუმრებსაც უმასპინძლებთ და საინტერესო აქტივობებს შესთავაზებთ. გვიამბეთ მეტი დეტალი ამის შესახებ.

წელს გვექნება ყნოსვის მასტერკლასი, რომელიც ღვინის მოყვარულებისთვის სახალისო და სასარგებლო ვარჯიშია. სტუმრებს შევთავაზებთ ღვინის სხვადასხვა არომატს, გავაცნობთ მათ დასახელებებს და შემდეგ ყნოსვით უნდა ამოიცნონ თითოეული მათგანი. ასევე, აუცილებლად შევეხებით ღვინის შერჩევისა და შეფასების კრიტერიუმებსაც.

ვფიქრობ, ერთი მხრივ ღვინის შესახებ მეტი ინფორმაციის გაცემისა და მეორე მხრივ ქართული ღვინის პოპულარიზაციისთვის ასეთი ფესტივალების ჩატარება უმნიშვნელოვანესია. ქართული ღვინო სულ უფრო ვითარდება და პროგრესს განიცდის, ასევე იზრდება ჩვენი მომხმარებელიც უჩნდება უფრო და უფრო მეტი მოთხოვნები და მოლოდინები. ფესტივალები ორივე მხარეს აძლევს საშუალებას, კარგად გაეცნონ და მოუსმინონ ერთმანეთს.

დაბოლოს, გველოდება თუ არა ფესტივალზე ისეთი აღმოჩენები, რაც ღვინის შესახებ აქამდე არ ვიცოდით?

ღვინის სფეროში ყოველთვის არის აღმოჩენებისა და სიახლეების დრო. არ არსებობს ადამიანი ვინც იტყვის , რომ მან ღვინის წარმოებისა თუ შესწავლის პროცესში ამოწურა თავი და ყველაფერი იცის. ამიტომაც არის ყოველი ახალი ღვინის დაგემოვნება და ახალი მეღვინეობის გამოჩენა სუფთა ფურცელი და შესაძლებლობა, რაღაც ახალი გაიგო.

R