"უნდა ვივარაუდოთ, რომ ეს იქნება მონსტრი” - ფლორიდაში, ქარიშხალ "მილტონის" გამო, მოსახლეობის ევაკუაცია დაიწყო (ფოტოები)

აშშ-ის ფლორიდის შტატს მეხუთე კატეგორიის ქარიშხალი "მილტონი“ უახლოვდება.

მოსალოდნელია, რომ ქარიშხალი ოთხშაბათს მთელი ძალით დაატყდება თავს მჭიდროდ დასახლებულ ქალაქ ტამპა ბეისს. უკვე დაიწყო მოქალაქეების ევაკუაცია.

• ფლორიდელებს მოუწოდებენ საცხოვრებლის დატოვებისკენ. გუბერნატორმა რონ დესანტისმა მოსახლეობა გააფრთხილა, რომ ევაკუაციის დრო სწრაფად იწურება.

"უნდა ვივარაუდოთ, რომ ეს იქნება მონსტრი,” - აღნიშნა გუბერნატორმა დესანტისმა.

აშშ-ის ქარიშხლის ეროვნული ცენტრის ინფორმაციით, 24 საათზე ნაკლებ დროში ევაკუაცია უნდა მოესწროს.

"მილტონი“ კვირას ტროპიკულ ქარიშხლად კლასიფიცირდა, მაგრამ 24 საათზე ნაკლებ დროში ის მე-5 კატეგორიის შტორმად გადაიქცა.

შეგახსენებთ, 10 დღის წინ ფლორიდაში ქარიშხალ "ჰელენს“ ებრძოდნენ და სტიქიამ შტატში, მინიმუმ, 14 ადამიანი შეიწირა.