ისრაელმა ბეირუთზე საჰაერო დარტყმები განახორციელა - ნეთანიაჰუ კი მაკრონის განცხადებას “სამარცხვინოს“ უწოდებს: ბოლო ცნობები კიდევ ერთი ცხელი წერტილიდან
ისრაელის თავდაცვის ძალების ცნობით, საჰაერო ძალებმა გუშინ ღამით, ლიბანის დედაქალაქ ბეირუთზე მორიგი საჰაერო დარტყმები განახორციელა.
“ღამის განმავლობაში, საჰაერო ძალების მოიერიშე თვითმფრინავებმა დაზვერვის სამმართველოს ზუსტი დაზვერვის ხელმძღვანელობით განახორციელეს წერტილოვანი თავდასხმების სერია მთელ ბეირუთში რამდენიმე საბრძოლო მასალის საწყობისა და სხვა ტერორისტული ინფრასტრუქტურის წინააღმდეგ. თავდასხმებამდე მრავალი ნაბიჯი გადაიდგა, რათა შემცირებულიყო ზიანის მიყენების შანსი, მათ შორის წინასწარ იქნა გაფრთხილებული ტერიტორიის მოსახლეობა“, - აღნიშნულია ისრაელის თავდაცვის ძალების განცხადებაში.
- მათი მტკიცებით, “ჰეზბოლა“ თავის იარაღსა და წარმოების ობიექტებს ბეირუთის ცენტრში, საცხოვრებელი კორპუსების ქვეშ ათავსებს და საფრთხეს უქმნის მოსახლეობას.
“ისრაელის თავდაცვის ძალები გააგრძელებს შეტევას და ზიანის მიყენებას ლიბანში, “ჰეზბოლას“ სამხედრო შესაძლებლობებისა და ინფრასტრუქტურისთვის; ძლიერ შეტევას, ზიანის მიყენებას და დეგრადაციას გაუწევს “ჰეზბოლას“ სამხედრო შესაძლებლობებს და ინფრასტრუქტურას ლიბანში“, - აცხადებენ ისრაელის თავდაცვის ძალებში.
ამასთან, გუშინ გავრცელდა ინფორმაცია, რომ ისრაელი “ჰეზბოლას” პოზიციებზე დარტყმებს შემსუბუქებისა და შესვენების გარეშე გააგრძელებს.
“ჰეზბოლას” პოზიციებზე დარტყმები შემსუბუქებისა და შესვენების გარეშე უნდა გავაგრძელოთ, - ამის შესახებ ისრაელის თავდაცვის ძალების შტაბის უფროსმა, ჰერზი ჰალევიმ განაცხადა.
მისი თქმით, ისრაელმა უნდა გააგრძელოს “ჰეზბოლაზე” ზეწოლა და დამატებითი და გრძელვადიანი ზიანის შექმნა.
- ასევე ცნობილია, რომ ჩრდილოეთ ლიბანში “ჰამასის“ ორი მეთაურის ლიკვიდაცია განხორციელდა.
ისრაელის თავდაცვის ძალების ცნობით, პირველი სარაკეტო დარტყმა ღამით, ქალაქ ტრიპოლის მახლობლად მდებარე პალესტინელი ლტოლვილების ბანაკში განხორციელდა და მისი სამიზნე საიდ ატალა ალი იყო. მეორე სარაკეტო იერიშის შედეგად, რომელიც ლიბანის ქალაქ საადნაელთან ახლოს განხორციელდა, მუჰამედ ჰუსეინ ალ-ლავისის ლიკვიდაცია მოხდა.
“ჰამასმა“ ორივე მათგანის სიკვდილი დაადასტურა.
ადგილობრივი მედიის ინფორმაციით, თავდასხმის შედეგად დაშავდა 3 ადამიანი და დაზიანდა “საცხოვრებელი სახლები.
-
“ისრაელზე იარაღის ემბარგოს დაწესების მოთხოვნა სამარცხვინოა“ - ემანუელ მაკრონის განცხადებას პასუხობს ბენიამინ ნეთანიაჰუ
ისრაელის პრემიერ-მინისტრის, ბენიამინ ნეთანიაჰუს განცხადებით, საფრანგეთის პრეზიდენტის, ემანუელ მაკრონის განცხადება ისრაელისთვის იარაღის მიწოდების შესახებ სამარცხვინოა.
“ტერორის ღერძი ერთად დგას. მაგრამ ქვეყნები, რომლებიც სავარაუდოდ ეწინააღმდეგებიან ამ [ღერძს] ითხოვენ ისრაელზე იარაღის ემბარგოს დაწესებას. რა სამარცხვინოა“, - განაცხადა ისრაელის პრემიერმა.
მისი მტკიცებით, ისრაელი გაიმარჯვებს მათი მხარდაჭერით ან მის გარეშე, მაგრამ მათი სირცხვილი ომის გამარჯვების შემდეგაც დიდხანს გაგრძელდება.
ბენიამინ ნეთანიაჰუს ამ განცხადებას ემანუელ მაკრონის ოფისი გამოეხმაურა და ნეთანიაჰუს რეაქცია შეაფასა, როგორც “გადაჭარბებული და საფრანგეთისა და ისრაელის მეგობრობისგან მოწყვეტილი“. საფრანგეთის პრეზიდენტის ოფისის განცხადებაში აღნიშნულია, რომ საფრანგეთი კვლავ ისრაელის მტკიცე მეგობარია.
შეგახსენებთ, ემანუელ მაკრონი ისრაელისთვის ღაზის სექტორში საბრძოლველად იარაღის მიწოდებების შეწყვეტის მოწოდებით გამოვიდა და განაცხადა, რომ ღაზის სექტორში თითქმის ერთწლიანი ომი “პოლიტიკურ მოგვარებას” საჭიროებს.
ამის შესახებ საფრანგეთის პრეზიდენტმა, ემანუელ მაკრონმა ფრანგულ მაუწყებლობა France Inter-თან საუბარში განაცხადა. კერძოდ, მაკრონი ისრაელისთვის იარაღის მიწოდებების შეწყვეტის მოწოდებით გამოვიდა და განაცხადა, რომ ღაზას სექტორში თითქმის ერთწლიანი ომი “პოლიტიკურ მოგვარებას” საჭიროებს.
“ვფიქრობ რომ დღეს პრიორიტეტია, რომ პოლიტიკურ მოგვარებას დავუბრუნდეთ, რომ ღაზაში საბრძოლველად იარაღის მიწოდებები შევწყვიტოთ”, - განაცხადა მაკრონმა და აღნიშნა, რომ საფრანგეთი ისრაელს არანაირ შეიარაღებას არ აწვდის.
- ამასთან, CNN ავრცელებს სტატიას, სადაც წერს, რომ “ისრაელს არანაირი გარანტიები არ მოუცია, რომ ირანის ბირთვულ ობიექტებს არ დაარტყამს“.
ისრაელს არანაირი გარანტიები არ მოუცია, რომ ირანის ბირთვულ ობიექტებს არ დაარტყამს, - ამის შესახებ ინფორმაციას CNN აშშ-ის სახელმწიფო დეპარტამენტში წყაროზე დაყრდნობით ავრცელებს.
წყაროს ცნობით, ისრაელს აშშ-ის პრეზიდენტისთვის, ჯო ბაიდენისთვის პირობა არ მოუცია, რომ ირანი ბირთვულ ობიექტებზე დარტყმებს არ განიხილავს როგორც თეირანის დარტყმებზე პასუხად.
“იმედი გვაქვს და ველით, რომ გარკვეული სიბრძნე, ასევე ძალა დავინახოთ, მაგრამ, როგორც იცით, არანაირი გარანტიები არ არის," - განაცხადა წყარომ.
იხილეთ ასევე:
- სამხრეთ ლიბანში განადგურებულია "ჰეზბოლას" გვირაბი - რა ინფორმაცია ვრცელდება ცხელი წერტილიდან?
- ისრაელი ამჯერად "ჰეზბოლას" მომავალ ლიდერზე "ნადირობს" - ლიბანში კვლავ აფეთქებების ხმა ისმის, არიან დაღუპულები და დაჭრილები