ასტეროიდი, რომელმაც დინოზავრები გაანადგურა, მარტო არ იყო - რა აღმოაჩინეს მკვლევარებმა აფრიკის კონტინენტის მახლობლად
მეცნიერებმა დაადასტურეს, რომ უზარმაზარი ასტეროიდი, რომელიც 66 მილიონი წლის წინ, დედამიწას დაეჯახა და დინოზავრები გაანადგურა, მარტო არ იყო.
- მათი დასკვნებით, ასტეროიდთან ერთად, იმავე ეპოქაში შედარებით მცირე ზომის (თუმცა გიგანტური) კოსმოსური ქვა დასავლეთ აფრიკის სანაპიროზე, ზღვაში ჩავარდა და შექმნა დიდი კრატერი.
“ეს იქნებოდა კატასტროფული მოვლენა, რამაც ატლანტის ოკეანეში სულ მცირე, 800 მეტრის სიმაღლის ცუნამი გამოიწვია", - აცხადებენ მეცნიერები.
დასკვნები მოცემულია Nature Communications Earth & Environment-ში.
პირველად “ნადირის კრატერი“ დოქტორ უისდეან ნიკოლსონმა 2022 წელს იპოვა, მაგრამ გაურკვეველი იყო, თუ როგორ ჩამოყალიბდა ის სინამდვილეში. ახლა დოქტორი ნიკოლსონი და მისი კოლეგები დარწმუნებულნი არიან, რომ 9 კმ-იანი კრატერი ასტეროიდის ჩავარდნამ გამოიწვია.
თუმცა, მათ არ შეუძლიათ მოვლენის ზუსტი დათარიღება. მაგრამ ამბობენ, რომ კოსმოსური ქვის დედამიწაზე დაცემა, რამაც ატმოსფეროში შეჯახებისას ცეცხლოვანი ბურთი წარმოქმნა, ემთხვევა დინოზავრების გადაშენების პერიოდს.
“წარმოიდგინეთ, რომ ასტეროიდი ეჯახება გლაზგოს და თქვენ იმყოფებით დაახლოებით 50 კილომეტრის დაშორებით ედინბურგში. ცეცხლოვანი ბურთის ზომა საკმარისი იქნებოდა ედინბურგში ხეებისა და მცენარეების დასაწვავად“, - ამბობს დოქტორი ნიკოლსონი.
ამას მოჰყვებოდა უკიდურესად ძლიერი ჰაერის ტალღები და დაახლოებით, 7 მაგნიტუდის სეისმური რყევა.
ასტეროიდი, რომელმაც შექმნა “ნადირის კრატერი“, იყო დაახლოებით 450-500 მ სიგანისა და მეცნიერთა აზრით, ის დედამიწას დაახლოებით 72000 კმ/სთ სიჩქარით დაეჯახა.
იხილეთ ასევე: