"დანის დარტყმამდეც, ბავშვმა ბრალდებულს უთხრა, რომ უდანაშაულო იყო..." - 23 წლის ბიჭის მკვლელობის საქმე: პროკურორის თქმით, ის კონფლიქტისას მხარეების გაშველებას ცდილობდა
კონსერვატორიის სტუდენტის, 23 წლის გიორგი საყურაშვილის მკვლელობის საქმის პროკურორის, გია შაიშმელაშვილის განმარტებით, საყურაშვილი მის მეგობრებსა და ბრალდებულს შორის მომხდარ კონფლიქტში მხოლოდ გამშველებელი იყო.
პროკურორის განმარტებითვე, ახალგაზრდა, რომელიც მოკლეს, ჩხუბში არ მონაწილეობდა, კონფლიქტი კი ყოფით ნიადაგზე, ბრალდებულის ინიციატივით მოხდა.
“წინარე გარემოება მომხდარი კონფლიქტი და ჩხუბი იყო, რომლის ინიციატორიც ბრალდებული იყო. საყურაშვილს არანაირი მონაწილეობა ამ ჩხუბში არ მიუღია, ის მხოლოდ გამშველებლის სტატუსით იმყოფებოდა, დანის დარტყმამდეც, ამ ბავშვმა ბრალდებულს უთხრა, რომ მის ცემაში მონაწილეობა არ მიუღია და უდანაშაულო იყო. ამის მიუხედავად, ბრალდებულმა მაინც განახორციელა მის სხეულზე დანით ზემოქმედება, რამაც მისი გარდაცვალება გამოიწვია.
ჩხუბში რამდენიმე პირი იღებდა მონაწილეობას, საყურაშვილი შემთხვევის ადგილზე იმყოფებოდა, მაგრამ მას ჩხუბში მონაწილეობა, როგორც მოჩხუბარს არ მოუღია. იქ მისი მეგობრებიც იმყოფებოდნენ. პირთა წრის გაფართოებასთან დაკავშირებით ვერაფერს გეტყვით, გამოძიება მიმდინარეობს",- განაცხადა შაიშმელაშვილმა.
ცნობისთვის, 23 გიორგი საყურაშვილის მკვლელობაში ბრალდებულ მირიან თოხაძეს აღკვეთის ღონისძიების სახით პატიმრობა შეეფარდა.
მოკლული ახალგაზრდა კონსერვატორიაში სწავლობდა და ნიჭიერ ფლეიტისტად მიიჩნეოდა.
მირიან თოხაძეს ბრალდება საქართველოს სისხლის სამართლის კოდექსის 108-ე მუხლით აქვს წარდგენილი, რაც განზრახ მკვლელობას გულისხმობს.
ბრალდებულს სასჯელის სახედ და ზომად 10-დან 15 წლამდე თავისუფლების აღკვეთა ემუქრება.
იხილეთ ასევე: