რუსუდან ტყემალაძე სადებიუტო რომანით "არქიტექტორი", "საბას" ფინალისტებს შორისაა
„პალიტრა L-ის“ კონკურსში - „გახდი ბესტსელერის ავტორი 2023“ გამარჯვებულის, რუსუდან ტყემალაძის რომანი „არქიტექტორი“ „საბას“ პრემიის წლევანდელ ფინალისტებს შორის მოხვდა ნომინაციაში „საუკეთესო ლიტერატურული დებიუტი“.
რომანი მოგვითხრობს წარმატებული არქიტექტორი ქალის შესახებ, რომელიც ცვლის მთავარი გმირის - აჩის ბედისწერას. პერსონაჟი სამუდამოდ ემშვიდობება უშფოთველ ცხოვრებას, მის გარშემო უჩვეულო მოვლენები ხდება.
წიგნი ერთი წელია, რაც მკითხველისთვის არის ხელმისაწვდომი და როგორც ავტორი აღნიშნავს, დადებითი უკუკავშირიც აქვს.
რას ნიშნავს რუსუდან ტყემალაძისთვის „საბას“ ფინალისტობა და რა გახდა პირველ რომანზე მუშაობის შთაგონება, ამის შესახებ თავად გვიამბობს:
რას ნიშნავს თქვენთვის, როგორც დამწყები ავტორისთვის „საბას“ პრემიის ფინალისტებს შორის მოხვედრა?
საბას ფინალისტობა ჩემთვის დიდი პატივი და სიამოვნებაა, განსაკუთრებით ისეთ მრავალფეროვან ნომინაციაში, როგორიც „საუკეთესო ლიტერატურული დებიუტია,“ სადაც ყოველწლიურად ყველაზე მეტ ნამუშევარს წარადგენენ. ფინალში გასვლა საამაყოცაა და საპასუხისმგებლოც. ძალიან მადლიერი ვარ დაფასებისთვის.
თქვენმა პირველმა რომანმა გაიმარჯვა „პალიტრა L-ის“ ლიტერატურულ კონკურსში „გახდი ბესტსელერის ავტორი“. რამდენად მნიშვნელოვანი აღიარება იყო ეს თქვენთვის და რამდენად მოგცათ მოტივაცია, ამ მიმართულებით გააგრძელოთ მუშაობა?
წერა ყოველთვის ჩემი ცხოვრების მნიშვნელოვანი ნაწილი იყო, მაგრამ კონკურსში გამარჯვებამდე უფრო ჰობად მიმაჩნდა. ახლა, როცა წიგნი გამოცემულია და აღიარებული, მეტ თავდაჯერებასაც ვგრძნობ და პასუხისმგებლობასაც. ამავდროულად, თავადაც ძალიან მაინტერესებს მომავალში რას დავწერ.
არქიტექტურული მიმართულებით ქართულ ენაზე ბევრი ლიტერატურული ნამუშევრით არ ვართ განებივრებულები. როგორ ფიქრობთ, ამ კუთხით რამდენად სიახლე იყო მკითხველისთვის თქვენი რომანი?
გავბედავ ვთქვა, რომ ეს თემა არა მხოლოდ ქართულ, არამედ უცხოურ ლიტერატურაშიც მცირედაა გახსნილი. სწორედ აქედან მოვიდა რომანის ერთ-ერთი მთავარი იდეა, - არქიტექტურა არა დეკორაციად წარმომედგინა, არამედ გმირის თანმდევ პერსონაჟად და მისი სულიერი რეფლექსიის მოპასუხედ. ამავდროულად, რომანში ვხედავთ არა მხოლოდ შენობებს ვიწრო გაგებით, არამედ არქიტექტორის თვალით დანახულ მრავალფეროვან სამყაროს, სიყვარულით, იმედგაცრუებით, ესთეტიკური წარმოდგენებით, სტერეოტიპებითა და მათი დაძლევის ცდით. ვფიქრობ, ჩემს რომანს განსაკუთრებულობას სწორედ ეს მატებს.
რა გახდა „არქიტექტორის“ სიუჟეტის შთაგონება?
არქიტექტურის ფაკულტეტზე ჩაბარების პირველივე წლიდან გამიჩნდა სურვილი დამეწერა ისეთი ტექსტი, რომელიც მაქსიმალურად ზუსტად ასახავდა არქიტექტურის ამ საოცარ, ყოვლისმომცველ და ყოველი ჩვენგანისთვის ასე ნაცნობ სამყაროს, რომელზეც სინამდვილეში თითქმის არაფერი ვიცით ხოლმე. არქიტექტურა, სამწუხაროდ, დღემდე კამერულ სფეროდ რჩება, მეც ბევრი დრო დამჭირდა იმისთვის, რომ დამაინტრიგებელი სიუჟეტის მეშვეობით გამეხსნა კონტექსტი. საამისოდ საკუთარი ბიოგრაფიული ელემენტების გამოყენებაც მომიხდა და ვიმედოვნებ, რომ საინტერესოდ გამომივიდა.
როგორი უკუკავშირი გაქვთ მკითხველისგან?
მკითხველებისგან ძირითადად დადებითი კომენტარები მაქვს, განსაკუთრებით ჩემი სტუდენტებისგან არქიტექტურის ფაკულტეტიდან. რისთვისაც უაღრესად მადლიერი ვარ.
დაბოლოს, უნდა ველოდოთ თუ არა თქვენგან ახალ ლიტერატურულ ნამუშევრებს?
წერა ჩემი ცხოვრების განუყოფელი ნაწილია და ალბათ არასდროს შევწყვეტ. იმედია, ჩემს მომავალ ნაშრომებს გამომცემლები და მკითხველებიც მოიწონებენ და საშუალება მომეცემა, მეტი გავუზიარო სამყაროს.