"მას შემდეგ, რაც ბაიდენის ვახშამი გაუქმდა, წავედით და ვივახშმეთ ქართულად - აშშ არის დიდი სახელმწიფო და გაბუტვა არ არის ის, რაც მას შეშვენის, ეს ბავშვური საქციელია" - პრემიერი
მას შემდეგ, რაც ბაიდენის ვახშამი გაუქმდა, ერთად წავედით, მათ შორის დავით ზალკალიანთან ერთად და ვივახშმეთ ქართულად, - ასე უპასუხა პრემიერ-მინისტრმა, ირაკლი კობახიძემ ჟურნალისტების შეკითხვას, რომელიც საქართველოს მთავრობის მეთაურის აშშ-ის პრეზიდენტთან, ჯო ბაიდენთან მიწვევის გაუქმების შესახებ „ამერიკის ხმის“ მიერ გავრცელებულ ინფორმაციას შეეხებოდა.
„რაც შეეხება გაუქმებულ მიწვევას ვახშამზე, ხელის ჩამორთმევაზე, რომელიც იყო დაგეგმილი, ეს იყო ერთგვარი ბავშვური ნაბიჯი. აშშ არის დიდი სახელმწიფო და გაბუტვა არ არის ის, რაც შეშვენის ამხელა სახელმწიფოს. ეს ბავშვური საქციელია, რაც არ შეშვენის. რაც შეეხება ხელის ჩამორთმევას, საზოგადოებამ უნდა იცოდეს, რომ ამ ხელის ჩამორთმევას თუ ვახშამს რამდენიმე ათეული ავტორიტარული სახელმწიფოს ლიდერი ესწრებოდა. ბაიდენმა მიიწვია ათეულობით ავტორიტარული სახელმწიფოს ლიდერი. იქ მიწვეული იყო 150-ზე მეტი სახელმწიფოს ლიდერი, საიდანაც ნახევარი არის ავტორიტარული, გაფორმებულად ავტორიტარული, კონსტიტუციურად არის ავტორიტარული. ავტორიტარულ ქვეყნებს იწვევენ და შენ გიუქმებენ მიწვევას, ამაზე გამოიტანოს საზოგადოებამ დასკვნები. რამდენიმე ათეული ავტორიტარული სახელმწიფოს ლიდერს რომ იწვევ, უმასპინძლდები და საქართველოს უუქმებ მიწვევას, აქედან ხომ საზოგადოება გამოიტანს დასკვნებს?! მას შემდეგ რაც ბაიდენის ვახშამი გაუქმდა, ერთად წავედით, მათ შორის დავით ზალკალიანთან ერთად და ვივახშმეთ ქართულად“, - განაცხადა ირაკლი კობახიძემ.
ცნობისთვის, შეერთებული შტატების პრეზიდენტი ჯო ბაიდენი, 25 სექტემბერს, ნიუ-იორკში მსოფლიო ლიდერებს და გაეროს მაღალჩინოსნებს ტრადიციულ მიღებაზე უმასპინძლებს. როგორც „ამერიკის ხმისთვის“ გახდა ცნობილი, პრეზიდენტის მიღებაზე მიწვეულთა სიაში, თავდაპირველად, ასევე იყო ირაკლი კობახიძე, თუმცა ბაიდენის ადმინისტრაციამ მიწვევა გააუქმა. პრემიერ-მინისტრის მიწვევის გაუქმებასთან ერთად, ადმინისტრაციამ ასევე უარი თქვა საქართველოს დელეგაციასთან ყველა შეხვედრაზე. პრემიერ-მინისტრ კობახიძესთან შეხვედრაზე, ასევე უარი თქვა ჯეიკ სალივანმა, თეთრი სახლის ეროვნული უსაფრთხოების მრჩეველმა.