"ჩემი თანხმობის შემდეგ კარლომ საქართველოში, მამაჩემთან დარეკა და..." - რა მოხდა ლეგენდარული მსახიობის დაბადების დღეზე: ინტერვიუ სოფი ლორენის სარძლოსთან
ცოტა ხნის წინ, მარიამ შარმანაშვილს კარლო პონტიმ ცოლობა სთხოვა. ქართველი ზუმბას ინსტრუქტორის ცხოვრება მას შემდეგ შეიცვალა, რაც საზოგადოებამ გაიგო, რომ მასზე ცნობილი იტალიელი მსახიობის, სოფი ლორენის შვილი, კარლო იყო შეყვარებული.
თბილისის ერთ-ერთ უბანში მცხოვრები გოგონა, ერთ დღეში გახდა პოპულარული. ალბათ თავიდან ბევრს არ სჯეროდა, რომ ეს ურთიერთობა დიდხანს გაგრძელდებოდა, მაგრამ სიყვარულმა დროს გაუძლო, სამი წლის თავზე, მარიამი ოფიციალურად გახდა პონტის საცოლე. 20 სექტემბერს სოფი ლორენს 90 წელი შეუსრულდა.
იტალიაში მსახიობის იუბილე გრანდიოზულად აღნიშნეს. ღონისძიებას კარლო ქართველ საცოლესთან ერთად დაესწრო. მკითხველების ნაწილს ეგონა, რომ მარიამს მომავალმა ქმარმა ცოლობა დედის იუბილეზე სთხოვა, თუმცა რა მოხდა იტალიაში, ამაზე მარიამი თავად გვესაუბრება:
- მარიამ, როგორ გთხოვათ კარლომ ცოლობა?
- პირველ რიგში უღრმესი მადლობა ყველას მოლოცვისთვის და საუკეთესო სურვილებისთვის, ძალიან ბევრი მისალოცი მესიჯი შემომდის ყოველდღე, რაც ძალიან სასიამოვნოა. მიხარია, რომ უამრავმა ადამიანმა გულწრფელად გაიზიარა ჩემი ბედნიერი ემოციები. რაც შეეხება ხელის თხოვნას, რეალურად კარლომ რამდენიმე თვის წინ მთხოვა ცოლობა. ყველაფერი ძალიან სპონტანურად და დაუგეგმავად (ბეჭდის გარეშე) მოხდა. არა იტალიაში, არამედ თბილისის აეროპორტში, როდესაც ჟენევაში ვაცილებდი.
მაშინ ეს ამბავი საჯაროდ არ გამიზიარებია. რაც შეეხება უკვე ოფიციალურად, 19 სექტემბერს რომში მთხოვა ხელი, რაც ასევე ძალიან ემოციური და მნიშვნელოვანი მომენტი იყო ჩემთვისაც და კარლოსთვისაც. მარტო ვიყავით ოთახში, მუხლი მოიყარა და ტრადიციული მკითხა, უკვე ბეჭდით...რა თქმა უნდა, მე ვთქვი - დიახ...
- ნიშნობა როგორ დაგეგმეთ?
- ოფიციალური ნიშნობა, როგორც უკვე აღვნიშნე, წინასწარ არ ვიცოდი ზუსტად რა ვითარებაში ან რომელ დღეს გვექნებოდა. კარლოს სურდა, რომ ეს ყველაფერი ჩემთვის გარკვეულწილად მოულოდნელი ყოფილიყო. ამიტომ წინასწარ ჩართული არ ვყოფილვარ. ყველაფერმა საკმაოდ ემოციურად ჩაიარა. კარლომ ჩემგან ოფიციალური თანხმობის მიღების შემდეგ, საქართველოში მამაჩემთან დარეკა და ქართულ ენაზე სთხოვა ჩემი ხელი. ეს იყო დაუვიწყარი წუთები.
- ცნობილი სადედამთილო როგორ შეგხვდათ ახალ ამპლუაში?
- ქალბატონ სოფიას ძალიან ვუყვარვარ და საოცრად თბილი ურთიერთობა გვაქვს. შესაბამისად, ჩემს ახალ ამპლუასაც ძალიან პოზიტიურად შეხვდა.
- მარიამ, ქორწილი თუ გაქვთ დაგეგმილი შენ და კარლოს, სად იცხოვრებთ?
- ქორწილს მომავალ წელს ვგეგმავთ. რაც შეეხება საცხოვრებელ ადგილს, ამ ეტაპზე ძირითად საცხოვრებელ ლოკაციად უფრო საქართველო განიხილება. შემდეგ ვნახოთ.
- რა საჩუქარი მიიღეთ ქალბატონი სოფი ლორენისგან?
- მატერიალური საჩუქარი ქალბატონი სოფიასგან არ მიმიღია, მაგრამ ვფიქრობ, მივიღე უფრო მნიშვნელოვანი რამ მისგან, ვიდრე მატერიალური საჩუქარია, და ეს იყო დალოცვა ჩემი და კარლოს ურთიერთობის. და ის სიყვარული, რასაც ყოველ ჯერზე მასთან ყოფნისას ვგრძნობ.
- მარიამ, ხშირად კონკიას გადარებენ, ხომ არ გწყინს ხოლმე მსგავსი შედარება, რადგან შენს სფეროში წარმატებული ქალი ხარ...
- დიახ, ბევრი ადამიანი მწერს ამას. სიმართლე რომ გითხრათ, არც მაღიზიანებს ეს შედარება, რადგან კონკიას მსგავსად მეც ერთი რიგითი უბრალო გოგონა ვარ, მეც ბევრი სირთულის გადატანა მომიწია და ბოლოს ჩემს ზღაპარსაც კეთილი დასასრული აქვს. ასე რომ, თუ ვინმესთვის ვიქნები იმის დასტური, რომ რეალურ სამყაროშიც ხდება ზღაპრული ამბები და ამით გავაბედნიერებ ადამიანებს, რატომაც არა.
წაიკითხეთ ასევე: