27
ივნისიდღის ზოგადი ასტროლოგიური პროგნოზი
ისრაელი-ლიბანის დაპირისპირება სულ უფრო მწვავდება და სულ უფრო ხშირად გამოითქმის ფართომასშტაბიანი ომის საფრთხეზე ვარაუდები. ისრაელი აცხადებს, რომ ოპერაცია "ჩრდლოეთის ისრების" მეოთხე ფაზა დაიწყო.
შედეგად "ჰეზბოლამ" წუხელ მისი ერთ-ერთი უფროსი მეთაურის, იბრაჰიმ ქუბაისის დაღუპვა დაადასტურა.
- "ჰეზბოლას“ ინფორმაციით, ის ასევე ცნობილი იყო როგორც "აბუ მუსა" და დაიბადა ზებდინში, სამხრეთ ლიბანში, 1962 წელს.
მანამდე ისრაელის სამხედროებმა განაცხადეს, რომ ქუბაისი სამხრეთ ბეირუთში ორ სხვა მეთაურთან ერთად, საჰაერო თავდასხმის შედეგად დაიღუპა. ისრაელის თავდაცვის ძალების ცნობით, ქუბაისი "ჰეზბოლას" სხვადასხვა სარაკეტო ქვედანაყოფებს მეთაურობდა.
პარალელურად, წუხელ "ჰეზბოლას“ წარმომადგენლებმა თქვეს, რომ ცენტრალური ისრაელის მიმართულებით რაკეტა გაუშვეს, რომლის სამიზნე მოსადის შტაბ-ბინა იყო.
"ჰეზბოლამ", დღეს დილით, ცენტრალურ ისრაელზე განხორციელებულ სარაკეტო იერიშზე პასუხისმგებლობა აიღო.
"ჰეზბოლას“ განცხადებაში აღნიშნულია, რომ სარაკეტო იერიში პეიჯერებისა და რაციების აფეთქებასა და დაჯგუფების მეთაურების მკვლელობებზე პასუხს წარმოადგენდა. უნდა აღინიშნოს, რომ ეს პირველი შემთხვევაა, როცა "ჰეზბოლას" რაკეტამ თელ-ავივის ტერიტორიამდე მიაღწია.
- ბევრს აოცებს ირანის დაგვიანებული რეაქცია მიმდინარე პროცესებზე და მაინც, რა პოზიცია აქვთ ირანის ოფიციალურ პირებს?
ირანის პოზიცია გასაგები გახდა ქვეყნის პრეზიდენტის, მასუდ პეზეშკიანის ბოლო კომენტარების შემდეგ, რომელიც ნიუ-იორკში გაეროს გენერალურ ასამბლეას ესწრება. ამერიკელ ჟურნალისტებთან შეხვედრისას, პეზეშკიანმა უჩვეულო განცხადება გააკეთა, რომელშიც აღნიშნა, რომ ირანმა შესაძლოა სამხედრო ძალის გამოყენებაზე უარი თქვას, თუ იგივეს გააკეთებს ისრაელიც. ეს მკვეთრად განსხვავდება ირანის იმ პოზიციისგან, რომელიც ამ ქვეყანას ორი თვის წინ ჰქონდა.
მაშინ, როდესაც თეირანში "ჰამასის“ ლიდერი ისმაილ ჰანია მოკლეს, ირანი ისრაელს მკაცრი პასუხით დაემუქრა. ნიუ-იორკში ირანის შემრიგებლური ტონი იმდენად თვალშისაცემი იყო, რომ ირანის საგარეო საქმეთა მინისტრმა აბას არაყჩმა სწრაფად უარყო ინფორმაცია იმის შესახებ, რომ ირანი მზად იყო ისრაელთან ურთიერთობების დეესკალაციისთვის. ყოფილმა საგარეო საქმეთა მინისტრმა და ამჟამინდელმა ირანის ვიცე-პრეზიდენტმა მოჰამედ ჯავად ზარიფმა მხარი დაუჭირა პეზეშკიანს სოციალურ ქსელებში და აღნიშნა, რომ პრეზიდენტმა, ფაქტობრივად, გააკრიტიკა "ისრაელის დანაშაულებები" და ირანი წარმოაჩინა როგორც მშვიდობისთვის მებრძოლი და რეგიონში ბირთვული განიარაღების მხარდამჭერი ქვეყანა.
ზარიფმა ისრაელი დაადანაშაულა "საშიში და ყალბი ნარატივის" გავრცელებაში ირანის განზრახვებთან დაკავშირებით და აღნიშნა, რომ, ისრაელის განცხადებების საწინააღმდეგოდ, ირანს ომი არ სურს. თავად პეზეშკიანმა ამერიკელ ჟურნალისტებთან საუბრისას მკაფიოდ განაცხადა: "ჩვენ არ გვინდა ომი", მან ისრაელი ირანის ომში ჩართვის მცდელობაში დაადანაშაულა და აღნიშნა, რომ მსგავს კონფლიქტს გამარჯვებული არ ეყოლება.
- ბოლო მონაცემებით, ლიბანში ისრაელის ავიაციის მიერ განხორციელებული ავიაიერიშების შედეგად დაღუპულთა რაოდენობა 600-მდე გაიზარდა. ისრაელის შეიარაღებული ძალების მიმდინარე სპეცოპერაციას, სახელად “ჩრდილოეთის ისრები", რომელიც ჯერჯერობით მხოლოდ მასობრივი საჰაერო დარტყმებით შემოიფარგლება, საკმაოდ მძიმე შედეგები მოჰყვა.
ლიბანის ქალაქებში პანიკაა - საჰაერო იერიშების მასშტაბების ფონზე, ლიბანელი მოსახლეობა სამხრეთ რეგიონებიდან ტოტალურად გარბის. ინტერნეტში ვრცელდება კადრები, რომელშიც ჩანს, რომ დასახლებულ პუნქტებში კვლავ მრავალკილომეტრიანი საავტომობილო საცობებია.
