500-მდე გარდაცვლილი და პანიკა ლიბანში - უახლესი ცნობები ისრაელის სამხედრო ოპერაციის “ჩრდილოეთის ისრების“ შესახებ (ფოტო/ვიდეო)
განახლებული ინფორმაციით, ლიბანში ისრაელის ავიაციის მიერ განხორციელებული ავიაიერიშების შედეგად დაღუპულთა რაოდენობა 500-მდე გაიზარდა. ისრაელის შეიარაღებული ძალების მიმდინარე სპეცოპერაციას, სახელად “ჩრდილოეთის ისრები", რომელიც ჯერჯერობით მხოლოდ მასობრივი საჰაერო დარტყმებით შემოიფარგლება, საკმაოდ მძიმე შედეგები მოჰყვა.
ლიბანის ქალაქებში პანიკაა - საჰაერო იერიშების მასშტაბების ფონზე, ლიბანელი მოსახლეობა სამხრეთ რეგიონებიდან ტოტალურად გარბის. ინტერნეტში ვრცელდება კადრები, რომელშიც ჩანს, რომ დასახლებულ პუნქტებში მრავალკილომეტრიანი საავტომობილო საცობებია.
დევნილებს არ იღებენ ბეირუთის ქრისტიანულ გარეუბნებში, სადაც წესრიგის დაცვის მიზნით ლიბანის არმია განლაგდა. საზღვრები ჩაკეტა სირიამაც.
შექმნილ ვითარებას გამოეხმაურა საფრანგეთის საგარეო საქმეთა მინისტრი, ჟან-ნოელ ბარო. როგორც გაერო-ს გენერალურ ასამბლეაზე განაცხადა, ბარო ლიბანში მიმდინარე საჰაერო დარტყმების განხილვის მიზნით, გაერო-ს უშიშროების საბჭოს საგანგებო სხდომას ითხოვს.
მან მხარეებს დეესკალაციისა და რეგიონული კონფლიქტის თავიდან აცილებისკენ მოუწოდა.
- “საფრანგეთი კიდევ ერთხელ მოუწოდებს მხარეებს და მათ, ვინც მათ მხარს უჭერს, მოახდინონ დეესკალაცია და თავიდან აიცილონ რეგიონული კონფლიქტი, რომელიც დამღუპველი იქნება ყველასთვის, უპირველეს ყოვლისა, მშვიდობიანი მოსახლეობისთვის. ამ მიზეზით, მე მოვითხოვე უშიშროების საბჭოს საგანგებო სხდომა ლიბანთან დაკავშირებით ამ კვირაში“, - აღნიშნა ჟან-ნოელ ბარომ.
მისი თქმით, ლიბანში, ისევე როგორც სხვაგან, საფრანგეთი დარჩება სრულად მობილიზებული დიდი კრიზისის გადასაჭრელად, რომელიც არღვევს საერთაშორისო დღის წესრიგს.
-
ავიაიერიშების შედეგად დაღუპულთა შესახებ ინფორმაციას ავრცელებს ლიბანის ჯანდაცვის სამინისტროც. უწყების ცნობით, დაღუპულებს შორის 35 ბავშვი და 58 ქალია. დაშავებულთა რაოდენობა კი 1 645 -ს აღწევს.
ისრაელის თავდაცვის ძალების ინფორმაციით, “ჰეზბოლას“ ინფრასტრუქტურის განადგურების მიზნით მიმდინარე ოპერაციის ფარგლებში დაჯგუფების 1 300 ობიექტს დაარტყეს. ამასთან, მათივე ცნობით, “ჰეზბოლამ“ ლიბანიდან ისრაელის მიმართულებით 200-ზე მეტი რაკეტა გაუშვა.
ოპერაციის დაწყებამდე ისრაელის პრემიერ-მინისტრმა ნეთანიაჰუმ გაავრცელა ვიდეო მესიჯი, რომელშიც ლიბანელ მოსახლეობას მოუწოდებდა, დაეტოვებინათ სახლები, სანამ IDF ოპერაცია არ დასრულდება.
შეგახსენებთ, ისრაელსა და ლიბანს შორის კონფლიქტი მნიშვნელოვნად დაიძაბა. ისრაელი, გუშინ დილიდან, ლიბანის წინააღმდეგ საჰაერო იერიშებს ახორციელებს. ისრაელის თავდაცვის ძალების ინფორმაციით, “ჰეზბოლას“ ინფრასტრუქტურის განადგურების მიზნით მიმდინარე ოპერაციის ფარგლებში დაჯგუფების 1 300 ობიექტს დაარტყეს. ამასთან, მათივე ცნობით, “ჰეზბოლამ“ ლიბანიდან ისრაელის მიმართულებით 200-ზე მეტი რაკეტა გაუშვა. ექსპერტთა ნაწილის მოსაზრებით, არ არის გამორიცხული ისრაელმა სამხრეთ ლიბანში სახმელეთო ოპერაციაც დაიწყოს.
იხილეთ ასევე: