100-ზე მეტი დაღუპული და ასობით დაშავებული - ისრაელის თავდასხმა ლიბანში, უკიდურესად დაძაბული ვითარება ახლო აღმოსავლეთში: ისრაელის მთავრობა საკუთარ მოქალაქეებს მიმართავს

ლიბანზე ისრაელის საჰაერო თავდასხმების შედეგად დღეს 100-ზე მეტი ადამიანი დაიღუპა და 400 დაიჭრა, - მედიის ინფორმაციით, ამის შესახებ ლიბანის ჯანდაცვის სამინისტრომ განაცხადა.

• უწყების ცნობით, დაღუპულებს შორის ქალები, ბავშვები და მედიკოსებიც არიან.

ცნობისთვის, მანამდე ისრაელის თავდაცვის ძალებმა გაავრცელა ინფორმაცია, რომ დღეს დილიდან ლიბანში "ჰეზბოლას“ 300 ობიექტს დაარტყეს.

ლიბანური მედიის ცნობით, საჰაერო თავდასხმები რამდენიმე ლოკაციაზე მოხდა, დაჭრილები საავადმყოფოებში გადაიყვანეს.

დაგეგმილი იერიშის შესახებ ისრაელმა განცხადება წინასწარ გაავრცელა. არაბულენოვან განცხადებაში მოსახლეობას, ავიაიერიშის წინ, თავიანთი სახლების დატოვებისკენ მოუწოდებდა. ამასთან, 60 000-მდე ავტომატური სატელეფონო ზარი განხორციელდა ლიბანის მცხოვრებლებთან და მათ ევაკუაციისკენ მოუწოდეს.

სოციალურ მედიაში ვრცელდება ვიდეო მასალა, რომელშიც ასახულია აფეთქებები.

• ამასთან, ისრაელმა საკუთარ მოსახლეობას სიმშვიდისკენ მოუწოდა.

"ვაღრმავებთ თავდასხმებს ლიბანში, ქმედებები გაგრძელდება მანამ, სანამ არ მივაღწევთ ჩვენს მიზანს, რომ უსაფრთხოდ დავიბრუნოთ ჩრდილოეთის მოსახლეობა საკუთარ სახლებში. ეს ის დღეებია, როდესაც ისრაელის საზოგადოებას მოუწევს სიმშვიდის გამოვლენა“, - განაცხადა ისრაელის თავდაცვის მინისტრმა, იოავ გალანტმა.