"ამ ადამიანებს, რომლებიც თავს დაგვესხნენ, ზუგდიდში საარჩევნოდ ჩაბარებული აქვთ კრიმინალების მობილიზაცია" - რა ფოტოებს აქვეყნებს ანა წითლიძე?

ზუგდიდში, ბარამიას დასახლებაში, ბუკლეტების დარიგებისას „ქართული ოცნების“ აქტივისტები თავს დაგვესხნენ. 20- ლარიანი სუს-ის აგენტი თეონა ქარდავა ჰყავდათ წინამძღოლად, - ამის შესახებ „ერთიანობა - ნაციონალური მოძრაობის“ ზუგდიდის ორგანიზაციის თავმჯდომარე ანა წითლიძე FACEBOOK-ზე წერს.

ამასთან, როგორც ანა წითლიძემ "ინტერპრესნიუსთან" საუბრისას განაცხადა, თავდასხმაში 50-მდე ადამიანი მონაწილეობდა.

"საარჩევნო კამპანიას ვატარებდი, დევნილების დასახლებაში ვარიგებდი ბუკლეტებს და ფლაერებს, როდესაც თავს დაგვესხნენ „ქართული ოცნების“ წევრები, აქედან ერთ-ერთი არის თეონა ქარდავა, რომელსაც „ქართული ოცნება“ 12 წლის განმავლობაში მსგავსი პროვოკაციებისთვის იყენებს. ეს არის ადამიანი, რომელიც წინა წლებში „ნაციონალური მოძრაობის“ ოფისს რომ არბევდნენ, მონაწილეობდა. 50-მდე ადამიანი დაგვესხა თავს. მცდელობა ჰქონდათ ცემის“, - განაცხადა ანა წითლიძემ.

ანა წითლიძის თქმით, მასზე მოგვიანებით კვლავ მოხდა თავდასხმა, მათ შორის ფიზიკური დაპირისპირებაც. ადგილზე მობილიზებული იყო პოლიცია.

"ზუგდიდში, ბარამიას დასახლებაში ჩვენზე თავდასხმაში მონაწილე პირები: შოთა ბაჯალაძე - შსს გენინსპექციის თანამშრომელი. საარჩევნოდ ჩაბარებული აქვთ ზუგდიდში კრიმინალების მობილიზაცია. ვახტანგ გომელაურთან აკავშირებს მირონი. აორგანიზებს კრიმინალებს, არიგებს ნარკოტიკულ ნივთიერებებს და ხელმძღვანელობს კრიმინალურ დაჯგუფებებს ზუგდიდში.

გოგა მოსია - ააიპ ზუგდიდის ხელოვნებისა და კულტურის ცენტრის დორექტორის მოადგილე. დიმა გოგოხია. ზონდერი. ჩასარიცხი აპარატის ქურდობისთვის ნასამართლევი. აქვს პირობითი. რამაზ ბაღბაია - ქართული ოცნების ტიტუშკა. ვითომ ძველი ბიჭი, სინამდვილეში - ნასედკა. დათა დარსანია - ტიტუშკა. ნასედკა.

ზვიად მალაზონია - საჯარო მოხელე. ზუგდიდის მუნიციპალიტეტის მერიაში მუშაობს. თეონა ქარდავა - აფხაზეთის მთავრობის წარმომადგნელობის ზუგდიდში, თანამშრომელი. ირაკლი კობახიძის სიძის, დავით ფაცაციასთან დაკავშირებული ადამიანი" - წერს წითლიძე.