პოზიტიური მოლოდინი პარლამენტში თანაშრომლობაზე - გახარიასა და ხაზარაძეს შორის შეთანხმება ვერ შედგა: რას აცხადებენ გიორგი გახარიას პარტიაში, მაშინ როცა ხაზარაძეს კვლავ პრეზიდენტთან ელოდებიან
უკვე რამდენიმე დღეა, რაც პრეზიდენტ სალომე ზურაბიშვილის მედიაციით, გიორგი გახარიას პარტიასა და "ძლიერ საქართველოს" შორის კონსულტაციები მიმდინარეობდა - მიზანი წინასაარჩევნოდ ახალი პოლიტიკური ცენტრის შექმნა იყო.
- "გახარია საქართველოსთვის“ ავრცელებს განცხადებას, სადაც ნათქვმია, რომ "ძლიერ საქართველოსთან“ ამ ეტაპზე შეთანხმების მიღწევა ვერ მოხერხდა.
როგორც განცხადებაშია აღნიშნული, მათ პარტიასა და "ლელოს“ შორის დაწყებული დისკუსია აჩენს პოზიტიურ მოლოდინებს, მომდევნო მოწვევის პარლამენტში თანაშრომლობასთან დაკავშირებით.
"მადლობას ვუხდით და კიდევ ერთხელ ვუდასტურებთ პატივისცემას საქართველოს პრეზიდენტს, რომელსაც მნიშვნელოვანი როლი აქვს დღეს ქვეყანაში მიმდინარე პოლიტიკურ პროცესებში. სწორედ მისი ინიციატივითა და მოწვევით ვიყავით ჩართული ამ რამდენიმე დღის განმავლობაში მიმდინარე პოლიტიკურ დისკუსიაში.
ასევე, მადლობას ვუხდით "ლელოს“ დისკუსიაში მონაწილეობისთვის.
- ჩვენი პოლიტიკური გუნდისთვის სახელმწიფოსა და ჩვენი მოქალაქეების საერთო ეროვნული ინტერესები ყოველთვის იდგა უფრო მაღლა, ვიდრე რაიმე სახის პარტიული ან/და პერსონალური ინტერესი.
ასე იყო წარსულში - ჩვენი ხელისუფლებაში ყოფნის დროს, ასეა დღეს - ოპოზიციაში, ასე იქნება მომავალში.
აქედან გამომდინარე, ჩვენ გვერდზე გადავდეთ ჩვენი პარტიული ინტერესები და ყველაფერი დავთმეთ, სანაცვლოდ მეორე მხარემ ითხოვა ვადა შიდა კოალიციური შეთანხმებისთვის. ჩვენდა სამწუხაროდ, როგორც ჩანს, მეორე მხარემ შიდა კონსესუსს ვერ მიაღწია.
საარჩევნო დრო კონკრეტული გადაწყვეტილებების მისაღებად უკვე შეზღუდულია, შესაბამისად, ამ ეტაპზე შეთანხმების მიღწევა ვერ მოხერხდა.
ჩვენსა და "ლელოს" შორის დაწყებული დისკუსია გვიჩენს პოზიტიურ მოლოდინებს, მომდევნო მოწვევის პარლამენტში თანაშრომლობასთან დაკავშირებით.
ჩვენი პოლიტიკური მიზანია "ოცნების“ ხელისუფლებიდან გაშვება "ნაციონალური მოძრაობის“ დაბრუნების გარეშე, ქვეყანაში მშვიდობის უზრუნველყოფა და პოლარიზაციის დასრულება“, - ნათქვამია განცხადებაში.
- აღნიშნული განცხადების შემდეგ ცნობილი ხდება, რომ მამუკა ხაზარაძე პრეზიდენტს შეხვდება.
სავარაუდოდ, ის სალომე ზურაბიშვილს იმ დეტალებზე გაესაუბრება, რის გამოც, კოალიციასა და პარტია "გახარია საქართველოსთვის“ შორის შეთანხმება ვერ მოხდა.
მამუკა ხაზარაძის პრეზიდენტთან შეხვედრას კოალიციის პრესსამსახურიც ადასტურებს.
იხილეთ ასევე: