დიდი დავა ალენ დელონის შვილებს შორის: რატომ უჩივლეს ძმებმა ანუშკას, რომელმაც მამისგან სოლიდური მემკვიდრეობა მიიღო -  "აქ ფული არაფერ შუაშია"

ლეგენდარული ფრანგი მსახიობის, ალენ დელონის 33 წლის ქალიშვილმა, ანუშკამ, მამის ხსოვნას პატივი მიაგო, რომელიც ზუსტად ერთი თვის წინ გარდაიცვალა. ქალმა მამასთან ცხოვრებაზე ისაუბრა და მათი ერთობლივი ფოტოები გამოაქვეყნა.

Instagram-ზე ანუშკამ აღიარა, რომ მამის დაკარგვას ძალიან განიცდის. მსახიობი მისთვის მხოლოდ მამა კი არა, ახლო მეგობარიც იყო. კინოვარსკვლავის ქალიშვილმა სოციალურ ქსელში მამას პოსტი მიუძღვნა და გულწრფელად მიმართა მას.

"ერთი თვე შენ გარეშე, და ეს ჩემში შფოთვას იწვევს. ერთი თვე ჩვენი ერთად ყოფნის გარეშე, ჩვენი ხელის ჩაკიდების გარეშე, და ასე გაგრძელდება... უკვე ერთი თვეა, რაც შენს შვილიშვილს ენატრები. მეკითხება: "დედა, გენატრება ბაბუა? ყველაფერი კარგად იქნება. დედა, შეხედე მის ფოტოს". უკვე ერთი თვეა, ყოველდღე, შუადღისას ვფიქრობ, რომ მინდა დაგირეკო, როგორც ყოველდღე ადრე... მაგრამ ეს ადრე იყო...“ - წერს ქალიშვილი.

„მთელი ცხოვრება მომენატრები... შენ ხარ პირველი კაცი ჩემს ცხოვრებაში, რომელმაც ყველაფერი მასწავლა. და ის, ვინც კვლავაც მასწავლის. ის, ვინც დიდხანს იცოცხლებს. რა ლამაზად თქვეს 18 აგვისტოს: "დელონი არ მომკვდარა. ის მარადიული გახდა“, - წერს ანუშკა.

შეგახსენებთ, რომ ალენ დელონი 2024 წლის 18 აგვისტოს გარდაიცვალა. გარდაცვალების დროს ის 88 წლის იყო. მსახიობი საფრანგეთში, დუშეს მის მემკვიდრეობით აკლდამაში დაკრძალეს. გამოსამშვიდობებელი ცერემონია 24 აგვისტოს გაიმართა. ალენ დელონის ქალიშვილის გარდა, მას ორი ვაჟი დარჩა - ენტონი და ალენ ფაბიენი.

გარდაცვალებამდე დელონმა ანდერძი შეადგინა, რომელიც Le Figaro-ს ცნობით, დელონის შვილებმა უკვე მიიღეს. დოკუმენტი ასევე გადაეცა მსახიობის ადვოკატსა და ქონების მმართველს. მსახიობმა ოთხ გვერდზე დეტალურად აღწერა, თუ როგორ უნდა განაწილებულიყო მისი ქონება ვაჟებს, ენტონისა და ალენ-ფაბიენსა და ქალიშვილ ანუშკას შორის.

ყველაზე დიდი მემკვიდრეობა 33 წლის ანუშკას დარჩა - 50%, ხოლო ვაჟები დანარჩენ 50%-ს გაიყოფენ და თითოეულს 25% შეხვდება.

ცნობილია, რომ ვარსკვლავის შვილები ერთმანეთთან კარგ ურთიერთობაში არ იყვნენ. როდესაც მსახიობის ჯანმრთელობის მდგომარეობა კრიტიკული იყო, უფროსმა ვაჟმა ენტონიმ ანუშკას სასამართლოში უჩივლა. ენტონიმ განაცხადა, რომ სარჩელის მიზეზი ფული არ ყოფილა, არამედ ადგილი, სადაც დელონი თავის ბოლო დღეებს გაატარებდა.

„მინდა სიმართლე ვთქვა. მინდა ავხსნა, რატომ ვეწინააღმდეგებით ერთმანეთს. მემკვიდრეობა უკვე გარკვეულია, ფულის მხრივ პრობლემა არ გვაქვს. ჩემი და მამის მემკვიდრეობის 50%-ს მიიღებს, ხოლო მე და ალენ-ფაბიენი თითო 25%-ს. კონფლიქტი ან ომი მემკვიდრეობაზე არ არსებობს. გაუგებრობის მიზეზი ის არის, რომ მე და ჩემ ძმას, გვსურს, რომ მან ბოლო დღეები საფრანგეთში გაატაროს, ხოლო ჩემს დას სურს, შვეიცარიაში წაიყვანოს“, – აღნიშნა მაშინ ენტონიმ.