პეიჯერების შემდეგ, ლიბანში რაციები ააფეთქეს - მორიგი თავდასხმა და უახლესი ცნობები დაშავებულებზე

სამი ადამიანი დაიღუპა და ათობით დაშავდა მას შემდეგ, რაც ლიბანის შეიარაღებული დაჯგუფების "ჰეზბოლას" მიერ გამოყენებული რაციები ააფეთქეს - ინფორმაციას Reuters-ი ავრცელებს.

დღევანდელი აფეთქებები მოხდა ქვეყნის სამხრეთით და დედაქალაქ ბეირუთის სამხრეთ გარეუბანში - გუშინდელი აფეთქებების ოთხი მსხვერპლის, მათ შორის ახალგაზრდა ბიჭისა და ჰეზბოლას პარლამენტის წევრის შვილის დაკრძალვაზე. ლიბანის ჯანდაცვის სამინისტრომ განაცხადა, რომ დაშავებულია 100-ზე მეტი ადამიანი. ადგილობრივი მედიის ინფორმაციით, სამხრეთ ქალაქ ტიროსში ხელის რადიო აფეთქდა ერთ-ერთ სახლში, რამაც ხანძარი გამოიწვია.

ქალაქ ბაალბეკში აფეთქების შედეგად 15 ადამიანი დაიჭრა. წითელი ჯვრის თქმით, სულ მცირე 30 სასწრაფო დახმარების მანქანაა მობილიზებული.

შეგახსენებთ, რომ ისრაელის სავარაუდო ოპერაციის ფარგლებში, ლიბანში "ჰეზბოლას" რამდენიმე ასეული წევრის პეიჯერები აფეთქდა. გავრცელებული ინფორმაციით, პორტატული პეიჯერების გატეხა და მათი აფეთქება ისრაელმა მოახერხა. ლიბანის ოფიციალურმა პირებმა განაცხადეს, რომ დაიღუპა სულ მცირე 12 ადამიანი, მათ შორის ორი ბავშვი. დაშავებულია დაახლოებით 2800.