"ივანიშვილის განცხადების მოულოდნელი ტონი დიდ ინტერესს იწვევს" - რას წერს გრიგორი კარასინი
რუსეთის ფედერაციის საბჭოს საერთაშორისო საქმეთა კომიტეტის თავმჯდომარე გრიგორი კარასინი პარტია "ქართული ოცნების“ საპატიო თავმჯდომარის, ბიძინა ივანიშვილის განცხადებას გამოეხმაურა ბოდიშის მოხდასთან დაკავშირებით.
- "ბიძინა ივანიშვილის და სხვა ქართველი პოლიტიკოსების განცხადებების მოულოდნელ ტონს სამხრეთ ოსეთთან ურთიერთობებში ახალი ატმოსფეროს შექმნის შესაძლებლობის შესახებ, კავკასიაში და ზოგადად, მსოფლიოში დიდი ინტერესით შეხვდნენ.
ამის მრავალი მიზეზი არსებობს. სულ უფრო მეტად აცნობიერებენ, რომ 2008 წელს სააკაშვილის ავანტიურის შემდეგ არსებულმა მტრობამ და დაპირისპირებამ გზა უნდა დაუთმოს გონიერებას და სტაბილურობას.
ბოლო 16 წლის განმავლობაში საქართველო პოლიტიკურად მომწიფდა. მარადიული დაპირისპირების უაზრობა ბევრისთვის ნათელი გახდა", - წერს კარასინი "ტელეგრამის" არხზე.
ცნობისთვის, გორში, "ქართული ოცნების“ რეგიონულ შეხვედრაზე ბიძინა ივანიშვილმა განაცხადა: - "26 ოქტომბრის არჩევნების დასრულებისთანავე, ჩვენ აუცილებლად გამოვძებნით საკუთარ თავში ძალას, რათა ბოდიში მოვიხადოთ იმის გამო, რომ დავალების შესაბამისად, მოღალატე "ნაციონალურმა მოძრაობამ“ 2008 წელს ცეცხლის ალში გახვია ჩვენი ოსი დები და ძმები“.
როგორც ივანიშვილმა აღნიშნა, 2008 წლის აგვისტოს ომი არ ყოფილა არც ქართველი და არც ოსი ხალხის სურვილი.