შტორმი "ბორისი" და "წარღვნა" ევროპაში - რა ხდება ამჟამად და რატომ აღმოჩნდა შტორმი ასეთი დამანგრეველი?

სტიქიურ წვიმებს, რომელიც შტორმმა "ბორისმა“ გამოიწვია, ცენტრალურ და აღმოსავლეთ ევროპაში მსხვერპლი მოჰყვა. საგანგებო სამსახურები წყალდიდობებთან საბრძოლველად დამცავ ნაგებობებს ამაგრებენ. ბოლო მონაცემებით, დაღუპულია რვა ადამიანი, ათასობით სახლი კი წყლის ქვეშ აღმოჩნდა.

• გარდაცვლილები არიან რუმინეთში, პოლონეთსა და ავსტრიაში

ავსტრიაში, მოქალაქეთა წყალდიდობისგან გადარჩენის ოპერაციის დროს, ერთი მეხანძრე დაიღუპა, - წერს Reuters-ი. ვენის მიმდებარე ტერიტორია კატასტროფის ზონად გამოცხადდა, ადგილობრივი ხელისუფლება "უპრეცედენტო ექსტრემალურ სიტუაციაზე“ საუბრობს.

ერთი ადამიანი პოლონეთში დაიღუპა, რის შესახებაც პრემიერ-მინისტრმა დონალდ ტუსკმა კვირას განაცხადა.

ყველაზე მეტი მსხვერპლი რუმინეთშია. შაბათს, გალააცის რაიონში, რომელიც ქვეყნის სამხრეთ-აღმოსავლეთით, უკრაინის საზღვართან ახლოს მდებარეობს, ოთხი ადამიანი დაიღუპა, ხოლო კვირას - კიდევ ორი.

გარდა ამისა, Reuters-ის ცნობით, ჩეხი მაშველები ქვეყნის აღმოსავლეთ ნაწილში ეძებენ სამ ადამიანს, რომლებიც მდინარეში ჩავარდნილ მანქანაში იმყოფებოდნენ.

ჩეხეთში წყალდიდობის გამო ზოგიერთ რაიონში ევაკუაცია გამოცხადდა. ქვეყნის ჩრდილოეთით 51 ათასამდე ოჯახი ელექტროენერგიის გარეშე დარჩა, - იუწყება ჩეხური ენერგეტიკული კომპანია CEZ.

პრაღაში წყალდიდობისგან დამცავი ნაგებობები აღმართეს

"ჩვენ კვლავ ვეჯახებით კლიმატის ცვლილების შედეგებს, რაც ევროპის კონტინენტზე სულ უფრო მეტად დრამატული ხდება,“ - განაცხადა რუმინეთის პრეზიდენტმა კლაუს იოჰანისმა.

რუმინეთის გალააცის რეგიონის სოფელ სლობოზია-კონაკის მერმა, ემილ დრაგომირმა განაცხადა, რომ 700 სახლი დაიტბორა. "ეს წარმოუდგენელი მასშტაბის კატასტროფაა", - თქვა დრაგომირმა.

პოლონეთის სამხრეთ-დასავლეთით, ქალაქ გლუხოლაზიში, ხელისუფლებამ აღნიშნა, რომ მდინარე ნაპირებიდან გადავიდა და ქუჩები დატბორა. კვირას კი მოსახლეობას სთხოვეს სახლები დაეტოვებინათ. ერთ-ერთი ადგილობრივის თქმით, ყველა შეშინებულია და "არანაირი იმედი არ არსებობს, რომ წვიმა შეწყდება".

პოლონეთის მეორე უდიდეს ქალაქ კრაკოვში ხელისუფლებამ მოსახლეობას სილით სავსე ტომრების გამოყენება შესთავაზა, რათა წყალდიდობისგან საკუთარი სახლები დაეცვათ.

ჩეხეთში შაბათს, ქვეყნის სამხრეთ ნაწილში კაშხალი გაირღვა. გარემოს დაცვის მინისტრმა, პეტრ ხლადიკმა ყველაზე მეტად დაზარალებული რაიონების მცხოვრებლებს მოუწოდა, რომ მზად იყვნენ თავიანთი სახლების დასატოვებლად.

ხლადიკის თქმით, მიწა წყლითაა გაჟღენთილი, ხოლო წვიმის წყალი ზედაპირზე რჩება, რაც მოულოდნელი წყალდიდობების რისკს ზრდის. ჩეხეთში წვიმები სამშაბათამდეა მოსალოდნელი.

ქვეყანაში ორი უმაღლესი საფეხბურთო ლიგის მატჩები, რომლებიც ამ შაბათ-კვირას იყო დაგეგმილი, გაუქმდა.

უკრაინული სარკინიგზო კომპანიის "უკრზალიზნიცას“ წარმომადგენლების ცნობით, პოლონეთსა და ჩეხეთში წყალდიდობების გამო უკრაინისკენ მიმავალი მატარებლის რამდენიმე რეისი გაუქმდა. უკრაინიდან პრაღისკენ მიმავალ მგზავრებს ურჩევენ, დაუკავშირდნენ ჩეხურ ან პოლონურ სარკინიგზო კომპანიებს, გაარკვიონ რეისების განრიგი და, საჭიროების შემთხვევაში, ღამის გასათევი მოძებნონ.

ოდესაში რამდენიმე ქუჩა დაიტბორა... ქუჩებში 48 ერთეული ტექნიკა და 95 გზის სამსახურის თანამშრომელი მორიგეობს.

• რატომ აღმოჩნდა შტორმი ასეთი დამანგრეველი

შტორმმა "ბორისმა“ დიდი რაოდენობით ნალექი გამოიწვია ცენტრალურ და აღმოსავლეთ ევროპაში.

ყველაზე მეტი ნალექი ჩეხეთში დაფიქსირდა. ქვეყნის დასავლეთით, მთებში, ხუთშაბათიდან 288 მმ ნალექი მოვიდა, რაც დაახლოებით სამი თვის ნორმას შეესაბამება.

შტორმის დამანგრეველი შედეგები ორ ძირითად მიზეზს უკავშირდება.

პირველი მიზეზი ისაა, რომ შტორმი თავისი მდებარეობის გამო ჩრდილოეთიდან უფრო ცივ ჰაერს იზიდავს, რომელიც შერეულია ხმელთაშუაზღვის თბილ და შავი ზღვის წყლებისგან წარმოქმნილ ტენიანობასთან.

მეორე მიზეზი არის ის, რომ ამავე ტერიტორიებზე დაბალი წნევის ზონა ნელა გადაადგილდება, ხოლო შტორმი ჩაკეტილია დასავლეთისა და აღმოსავლეთის მაღალი წნევის ზონებს შორის.

ჩეხეთის გარემოს დაცვის სამინისტრომ განაცხადა, რომ "ბორისის“ მსგავსი შტორმები, დაახლოებით, 50 წელიწადში ერთხელ ხდება.

მსოფლიო ამინდის პროგნოზირების ქსელის დასკვნით, ევროპაში მსგავსი ტიპის წყალდიდობების შანსი და ინტენსივობა იზრდება კლიმატის დათბობის გამო.

წყარო