ბონ ჯოვიმ გადაარჩინა ქალი, რომელიც ხიდიდან გადახტომას აპირებდა - პოლიცია ამაღელვებელ ვიდეოს ავრცელებს: "ყველას გვევალება ერთმანეთზე ზრუნვა"
როკის ლეგენდამ, ჯონ ბონ ჯოვიმ ნეშვილში, ტენესის შტატში, ხიდის კიდეზე მყოფი ქალის დახმარება შეძლო და ის სიკვდილს გადაარჩინა.
ნეშვილის მეტროპოლიტენის პოლიციის დეპარტამენტმა გაავრცელა ვიდეო, სადაც ჩანს, თუ როგორ იმყოფებოდა ბონ ჯოვი, თანმხლებ პირებთან ერთად ერთ-ერთ ხიდზე, სადაც ქალი მდინარეში გადახტომას აპირებდა.
- როგორც პოლიციაში განაცხადეს, ბონ ჯოვი და მის გვერდით მყოფი ადამიანი ქალს ესაუბრნენ და დაეხმარნენ, რომ ჯებირიდან უკან, ხიდზე გადმოსულიყო. "ყველას გვევალება ერთმანეთზე ზრუნვა", - აღნიშნა პოლიციის უფროსმა, ჯონ დრეიკმა განცხადებაში.
- როგორც ვიდეოში ჩანს, ბონ ჯოვი სხვა ადამიანთან ერთად ქალისკენ წავიდა. მომღერალმა ჯერ ხელი დაუქნია, შემდეგ კი მის გვერდით, მოაჯირს დაეყრდნო.
დაახლოებით ერთი წუთის შემდეგ ბონ ჯოვი და მისი თანმხლები პირი ქალს ხიდზე, სავალ ნაწილზე გადმოსვლაში დაეხმარნენ. ბონ ჯოვიმ ის გულში ჩაიკრა და დაამშვიდა.
სოციალურ მედიაში გამოქვეყნებულ ვიდეოს თან ახლავს ნეშვილის პოლიციის დეპარტამენტის განცხადება: "დიდი მადლობა ჯონ ბონ ჯოვის და მის გუნდს, რომლებიც ქალს ზიგენტალერის ხიდზე, დაეხმარნენ. ბონ ჯოვიმ შეძლო მისი გადარწმუნება და გადარჩენა", - აღნიშნულია პოლიციის განცხადებაში.