მედიის ცნობით, ჩეჩნეთის ინფორმაციის მინისტრის მოადგილე გაიტაცეს - გატაცებამდე კი სოციალურ ქსელებში მისი ინტიმური ვიდეო გავრცელდა
ჩეჩნეთის ინფორმაციის მინისტრის მოადგილე საიდ-მაგომედ ბაშიროვი მას შემდეგ გაიტაცეს, რაც სოციალურ ქსელებში მისი ინტიმური ვიდეო გავრცელდა. კადრებში ჩანდა, როგორ უჩვენებდა ის ერთ-ერთ მამაკაცს თავის სასქესო ორგანოს.
ტელეგრამ არხი Niyso, წყაროებზე დაყრდნობით იტყობინება, ბაშიროვი 7 სექტემბერს, იმავე დღეს, როცა ვიდეო გამოქვეყნდა, სამოქალაქო ტანსაცმელში ჩაცმულმა პირებმა გაიტაცეს.
- ვიდეო ოპოზიციონერმა ბლოგერმა ჰასან ხალიტოვმა გაავრცელა. რამდენიმე დღეში ბლოგერმა კიდევ ერთი ვიდეო გაავრცელა. მასში ასახულია მინისტრის მოადგილის საბანკო გადარიცხვების სქრინები. ეს ფული მას, სავარაუდოდ, ინფორმაციის გაუვრცელებლობისთვის გამოსძალეს. ხალიტოვი ამბობს, რომ ორივე ვიდეო მას ანონიმურმა წყარომ გამოუგზავნა.
უფლებადამცველები აცხადებენ, რომ ჩეჩნეთში ლგბტ პირებს ხშირად იტაცებენ, აწამებენ და ფიზიკურად უსწორდებიან. ცნობილია ისიც, რომ ჩეჩნეთის ხელისუფლება ჰომოსექსუალებს რუსეთ-უკრაინის ომში იძულებით აგზავნის.
ცნობისთვის, საიდ-მაგომედ ბაშიროვი ჩეჩნეთის ინფორმაციის მინისტრის მოადგილის პოსტს 2021 წლის მაისიდან იკავებდა.