"ხმას ვაძლევ კამალა ჰარისს, ის მიზნებისთვის იბრძვის, რომელთა წინ წაწევასაც, მეომარი სჭირდება" - ტეილორ სვიფტმა აშშ-ის საპრეზიდენტო არჩევნებში მხარი კამალა ჰარისს დაუჭირა
ტეილორ სვიფტმა ამერიკის შეერთებული შტატების არჩევნებში კამალა ჰარისს დაუჭირა მხარი. ეს მოხდა მას შემდეგ, რაც ჰარისისა და დონალდ ტრამპის პირველი საპრეზიდენტო სატელევიზიო დებატები დასრულდა.
- "ხმას ვაძლევ კამალა ჰარისს, რადგან ის იმ უფლებებისა და მიზნებისთვის იბრძვის, რომელთა წინ წაწევასაც, ჩემი აზრით, მეომარი სჭირდება", - წერს ტეილორ სვიფტი
სვიფტმა, რომელმაც 2020 წელსაც დემოკრატ პრეზიდენტ ჯო ბაიდენს გამოუცხადა მხარდაჭერა, ჰარისს "სტაბილური და ნიჭიერი ლიდერი" უწოდა.
მან დაამატა: "მჯერა, რომ ამ ქვეყანაში ბევრად მეტს მივაღწევთ, თუ სიმშვიდე გვმართავს და არა - ქაოსი".
ტეილორის პოსტს თან დართული აქვს ფოტო, სადაც მას კატასთან ერთად ვხედავთ - "უშვილო კატების მოყვარული ქალი", - წერს მომღერალი. ეს პასუხია ტრამპის ვიცე-პრეზიდენტობის კანდიდატის,, ვანსის განცხადებაზე, რომელმაც კამალა ჰარისს 2021 წელს სწორედ უშვილო კატების მოყვარული ქალი უწოდა.
- სვიფტი იყო ტრამპის კრიტიკოსი მისი პრეზიდენტობის პერიოდში, როდესაც ამერიკაში ჯორჯ ფლოიდის მკვლელობის გარშემო საპროტესტო აქციები გაიმართა.
მომღერალს Instagram-ზე 283 მილიონი გამომწერი ჰყავს. მის პოსტს სამ საათში 4.5 მილიონზე მეტი მოწონება ჰქონდა.
პოსტში, სვიფტმა პირველად მოუწოდა ამომრჩევლებს რეგისტრაციისკენ და თქვა, რომ მეტი საარჩევნო ინფორმაციისთვის თავის გვერდზე განათავსებს ბმულს.
"ჩავატარე ჩემი კვლევა და გავაკეთე ჩემი არჩევანი, თქვენი კვლევა და არჩევანი კი თქვენზეა", - ამბობს ტეილორ სვიფტი.