ახლობლობა ბიძინა ივანიშვილის ოჯახთან და ცნობილი მეუღლე - "ქართული ოცნების" საარჩევნო სიაში ეკა ჭიჭინაძეც მოხვდა: როგორია ნიკუშა შენგელაიას კომენტარი?
"ქართული ოცნება - დემოკრატიული საქართველომ" 2024 წლის საარჩევნო სიის პირველი ოცეული წარადგინა.
ღონისძიებაზე “ქართული ოცნების” საპარლამენტო სიის ოცეული პრემიერ-მინისტრმა , “ქართული ოცნების” საარჩევნო შტაბის ხელმძღვანელმა, ირაკლი კობახიძემ წარადგინა.
პრემიერმა სიის პირველ ნომრად ქართული ოცნების” საპატიო თავმჯდომარე, ბიძინა ივანიშვილი დაასახელა. უნდა აღინიშნოს, რომ სიის ოცეულში არიან ოლიმპიური ჩემპიონები ლაშა ტალახაძე და გენო პეტრიაშვილი.
ასევე სიის მეთხუთმეტე ნომერია მხატვარ ნიკუშა შენგელაიას მეუღლე ეკა ჭიჭინაძე, რომელიც ეკატერინე ხვედელიძის მეგობარია. ცნობილია, რომ ეკას ივანიშილის ოჯახთან ახლობლობა აკავშირებს და AMBEBI.GE-ს არქივშიც ბევრი მისი ინტერვიუ ინახება, სადაც ის "ქართული ოცნების" საპატიო თავმჯდომარის ოჯახზე საუბრობს. ის ხშირად სტუმრობდა ივანიშვილებს და ამის ამსახველი ფოტოები მის სოციალურ ქსელშიც იძებნება.
ერთ-ერთ ინტერვიუში ეკა ამბობდა, რომ თითქმის ყველა ახალ წელს ივანიშვილების ოჯახში ხვდებოდა და ეს მათი ერთგვარი ტრადიციაც იყო:
"ადრე ერთგვარი ტრადიცია გვქონდა, 2 იანვარს, ბედობას ეს ულამაზესი ოჯახი გვეპატიჟებოდა, მათი საახლობლო ვიკრიბებოდით და დაუვიწყარ დროს ვატარებდით. სამწუხაროდ, ბოლო წლებია ეს შეკრება პანდემიის გამო ვეღარ მოხერხდა. ჩვენი ბოლო საუბარი ზუსტად მაგას ეხებოდა, რომ მათთვის ძალიან მტკივნეულია, ეს შეკრება რომ ვეღარ ხერხდება... იმედია 2022 წელს პანდემია დასრულდება და ჩვენი არაჩვეულებრივი ტრადიციაც აღდგება" - იხსენებდა ეკა გასულ წელს.
"ის "ქართული ოცნებას" დაფუძვნების დღიდან გვერდში უდგას" - ასე წარადგინა კობახიძემ ჭიჭინაძე საარჩევნო სიის დასახელებისას.
AMBEBI.GE ნიკუშა შენგელაიას დაუკავშირდა, რომელმაც მეუღლის პოლიტიკაში წასვლაზე მცირე კომენტარი გააკეთა:
- ქალბატონები აქტიურები უნდა იყვნენ, როცა ქვეყანას საფრთხე ემუქრება, უნდა დაიცვან თავის შვილები და თავის შვილების მომავალი!