"ვიცოდი, რომ აჟიოტაჟი იქნებოდა ბექას მესამე ქორწინების გამო... ჩვენს მიმართ უარყოფითი კომენტარები მოდის და ეს მთრგუნავს" - სოფო ქურდიანი ბიზნესმენ მეუღლესა და სიცილიურ ქორწილზე
ივლისის თვეში ბიზნესმენმა ბექა ხოფერიამ და სოფო ქურდიანმა რამდენიმე წლიანი თანაცხოვრება ქორწილით აღნიშნეს. საქართველოდან სიცილიაში ოთხმოცდაათამდე ადამიანი გაემგზავრა. ძველ ციხე-სიმაგრეში გადახდილ ქორწილს საზოგადოების მხრიდან ყურადღება არ დაჰკლებია. ბექა და სოფო ხუთი წელია ერთად არიან და საერთო შვილს გიორგის ზრდიან.
- მათი ნაწილი ყველაზე მეტად იმ ფაქტმა გააოცა, რომ ქორწილში ბექას პირველი მეუღლე თიკა ჯამბურია, შვილ, ნინასთან ერთად იმყოფებოდა.
საკუთარი ბიზნესი ბექას მეუღლე სოფო ქურდიანსაც აქვს. ამბობს, რომ მისი კომპანია წლებია წარმატებულად ოპერირებს ბაზარზე, თუმცა საზოგადოებამ მაინც როგორც ბექას მესამე მეუღლე გაიცნო და ხმაური ქორწილსაც ამიტომ მოჰყვა.
გული სწყდება უარყოფით კომენტარებზე, რომელსაც ხანდახან საზოგადოების მხრიდან იღებს. ინტერვიუზე დათანხმებაც რთული აღმოჩნდა, არ უყვარს საუბარი და გამოჩენა. თუმცა რამდენიმე კითხვაზე, რომელიც სიცილიურ ზღაპრულ ქორწილს ეხებოდა მაინც დაგვთანხმდა...
- მე და ბექა ხუთი წელია რაც ერთად ვართ. ერთმანეთი საქართველოში გავიცანით. სამი წლის წინ დავინიშნეთ, თუმცა ქორწილი გვინდოდა, რომ საზღვარგარეთ გადაგვეხადა.
- რატომ სიცილია?
- არ გვინდოდა, რომ ქორწილი სტანდარტული ყოფილიყო. ჩვენთვის ახლო ადამიანების შეკრება და ამდენი წელი ერთად ყოფნის აღნიშვნა გვინდოდა. თავიდან სადმე კუნძულს ვფიქრობდით და რამდენიმე ვარიანტის განხილვის შემდეგ, ქორწილის ორგანიზატორმა სიცილიაზე მდებარე ციხე-სიმაგრე გვირჩია.
- გამორჩეული კაბა გეცვათ.
- დიზაინერმა ბიჭოლამ შემიკერა, ვუთხარი, სილუეტის რა ნაწილი ყოფილიყო გამოკვეთილი და დიზაინი თავის თავზე აიღო. ქორწილში საქართველოდან 90 ადამიანი გავემგზავრეთ. მე და ბექა, იქ კვირაზე მეტი დავრჩით.
- ეს იყო თქვენი ოცნების ქორწილი?
- არ მქონია არასოდეს ქორწილის სურვილი, გოგონები წინასწარ რომ წარმოიდგენენ ხოლმე, მაგრამ ოდესმე რომ მეფიქრა როგორი ქორწილი მომინდებოდა რეალურად ასეთი გამოვიდა. ყველა დეტალი გავიარეთ, ყველაფერი წინასწარ იყო ჩაფიქრებული, ხელსახოცი, მაგიდის სანიშნე, სცენაზე გართობის რა ელემენტები უნდა ყოფილიყო, რომ როგორც ჩვენთვის, ასევე სტუმრებისთვის დასამახსოვრებელი ყოფილიყო.
- მიუხედავად იმისა, რომ ზაფხულში ევროპის ჩემპიონატი მიმდინარეობდა, სადაც ჩვენი ნაკრები ყურადღების ცენტრში იყო, ყველაზე ხშირად მაინც თქვენს ქორწილზე იწერებოდა. გქონდათ ეს მოლოდინი?
- რაღაც მოლოდინი მქონდა, რადგან ბექას გარშემო ყოველთვის მსგავსი რამ ხდება. თან ვიცოდი, რომ აჟიოტაჟი იქნებოდა მესამე ქორწინების გამო. თან ვფიქრობდი, რომ ფეხბურთის თემა გადაფარავდა, მაგრამ მთლად ასეთს არ ველოდი.
- თიკას მიწვევა ქორწილში თქვენი და ბექას ერთობლივი გადაწყვეტილება იყო?
- დიახ, მე და თიკა მეგობრები ვართ. მისი და ბექას საერთო შვილი ნინა, ჩემთვის შვილივით არის. სხვა დამოკიდებულება მაქვს. გვერდიდან რომ შემეხედა ამ ფაქტისთვის შეიძლება მეც უცნაურად მომჩვენებოდა. ბექა და თიკა ბევრი წლის წინ იყვნენ დაქორწინებულები და ახლა უფრო ახლო მეგობრები არიან და მეც ჩემს ახლობლად მივიღე ეს ადამიანი. ბავშვების დაბადების დღეებზე ყველგან ერთად ვართ და სხვა დამოკიდებულება გამიჩნდა. მინდოდა რომ ნინასთან ერთად ისიც ყოფილიყო ქორწილში. თუმცა მესმის ხალხის რეაქციაც, გვერდიდან ცოტა სხვანაირად ჩანს.
- სოფო, თქვენ რას საქმიანობთ?
- 19 წლიდან დავიწყე არქიტექტურის სფეროში მუშაობა, ყოველთვის დაინტერესებული ვიყავი ინტერიერის დიზაინით. 21 წლის ვიყავი როდესაც ჩემი კომპანია გავაკეთე „შოუ რუმ ჯორჯია“, რომელიც „აპარტ შოურუმით“ არის წარმოდგენილი. რვა წელია ჩემი კომპანია მაქვს, ვაკეთებ ინტერიერის დიზაინს, რემონტს, პრემიუმ სეგმენტზე გვაქვს გათვლა და ბაზარზე ერთ-ერთ ყველაზე ხარისხიან პროდუქტს ვქმნით.
- ამის ფონზე ოჯახისთვის დრო როგორ გრჩებათ?
- დედა მეხმარება ძალიან. ასევე ბექაც რა თქმა უნდა. თან ისე მაქვს ჩემს კომპანიაში საქმე დალაგებული, რომ კომპანია ისეთ რელსებზე დგას, რომ თავის თავსაც მართავს. ყველა ხელს მიწყობს.
- სამი გოგონას შემდეგ ბექას მესამე ქორწინებაში ვაჟი შეეძინა...
- გიორგიში ალბათ უფრო თავის თავს ხედავს ბავშვობაში. საერთოდ ბექა გიჟდება თავის გოგონებზე და არც ჰქონია მოლოდინი რომ ბიჭი უნდა ყოფილიყო, სქესს არ ჰქონდა მისთვის მნიშვნელობა. ბავშვი რომ იზრდება და მოსწონს მანქანები, საათები, ბურთი უნდა, კაცური რაღაცები მოსწონს, ახლა ეს უფრო განსხვავებულია მისთვის. როგორც პატარა ძმაკაცი ისე ჰყავს. დანარჩენი ყველა შვილთან ერთნაირად არის.
- როგორია იყო წარმატებული ქალი და გვერდით გყავდეს პოპულარული მამაკაცი, რომელზეც ხშირად წერენ, ბევრს ჭორაობენ, მის გარეგნობას ხაზს უსვამენ.
- ვუსურვებდი, რომ ამდენს არ საუბრობდეს ხალხი. რაც არ უნდა კარგი დაიწეროს მედიაში, ვიღაც მაინც დაწერს ცუდ კომენტარს, ეს მთრგუნავს ხოლმე. არასოდეს მითქვამს სხვაზე ცუდი, ბავშვობიდან ასეთი ვიყავი. ახლა მე რომ შევეჩეხე და ჩვენს მიმართ რომ მოდის უარყოფითი კომენტარები. ეს ცოტა დამთრგუნველია. რაც შეეხება წარმატებას, ჩემი კარიერა ცალკეა.
როგორც ცოლისთვის არ აქვს მნიშვნელობა მის პოპულარობას, ეს შინაგანად პრივილეგიას არ მანიჭებს. ჩემთვის ჩვეულებრივი ადამიანია, რომელიც შემიყვარდა და თავი კარგად ვიგრძენი. დანარჩენი ხან სასიამოვნო ხდება ხან გულდასაწყვეტი. ვიმედოვნებდი, რომ არ ყოფილიყო ამხელა აგრესია, მაგრამ ვცდილობ გავუძლო.
წაიკითხეთ ასევე: