"კვარა“ მაღალი კლასის ფეხბურთელია, რა თქმა უნდა, პატივს ვცემთ... ორ მეურვეს მივუჩენთ" - მატჩის დღე: რას აცხადებენ მეტოქე გუნდში?

საქართველოს ეროვნული საფეხბურთო ნაკრები დღეს, "ერთა ლიგის“ მეორე ტურში ალბანეთის საფეხბურთო ნაკრებს დაუპირისპირდება. მატჩი ტირანაში შედგება და თბილისის დროით 22:45 საათზე დაიწყება.

მატჩის წინ პრესკონფერენციაზე ალბანეთის ეროვნული გუნდის მწვრთნელმა სილვინიომ და თავდამსხმელმა იასირ ასანიმ ისაუბრეს:

სილვინიო:

"ჩვენს ჯგუფში თანაბარი დონის ნაკრებებია. საქართველოს ძალიან ბალანსირებული გუნდი და ტექნიკური ფეხბურთელები ჰყავს, კარგად ორგანიზებულები არიან. მათმა მწვრთნელმა დიდი სამუშაო ჩაატარა. ყველა მწვრთნელი გუნდს გამარჯვებისთვის ამზადებს. ვფიქრობ, სავსე სტადიონზე კარგი თამაში იქნება. მოსაგებად საათში 100 კილომეტრით სირბილი მოგვიწევს. შემადგენლობაზე უნდა ვიფიქრო, ხვალ სადილის შემდეგ დავასახელებ. შედეგი? შეხვედრა ნებისმიერი ანგარიშით შეიძლება დასრულდეს“.

ასანი:

"მოდით, უკრაინის დამარცხება დავივიწყოთ. მაქსიმალურად მოტივირებულები ვართ. მოწინააღმდეგემ ჩეხეთს დამაჯერებლად სძლია, შესანიშნავი, პროგრესირებადი გუნდია, მაგრამ შიში არ გვაქვს. "კვარა“ მაღალი კლასის ფეხბურთელია, რა თქმა უნდა, პატივს ვცემთ და ფრთხილად ვეთამაშებით, ორ მეურვეს მივუჩენთ. ჩვენი მიზანი მსოფლიო ჩემპიონატზე გასვლაა“.

შეგახსენებთ, საქართველოს ნაკრებმა ჯგუფის პირველ შეხვედრაში ჩეხეთის საფეხბურთო ნაკრები ანგარიშით 4:1 დაამარცხა.

პირველი ტურის შეხვედრა უკრაინასთან გამარჯვებით დაასრულა ალბანეთის ნაკრებმაც.

პირველი ტურის შემდეგ ჯგუფში 3-3 ქულით საქართველოსა და ალბანეთის საფეხბურთო ნაკრებები ლიდერობენ.

საქართველოს ეროვნული ნაკრების უეფა-ს ერთა ლიგის ჯგუფური ეტაპის გასვლითი შეხვედრის საჯარო ჩვენება თბილისში, პირველი რესპუბლიკის მოედანზე გაიმართება.

იხილეთ ასევე:

• "ვიცით, რომ ყველა ბილეთი გაყიდულია და მეტოქეს დიდი მხარდაჭერა ექნება, მაგრამ...“ - როგორია მამარდაშვილისა და სანიოლის განწყობა ალბანეთთან შეხვედრამდე ერთი დღით ადრე
• “საქართველო ჩვენთვის ადვილი მეტოქე არასოდეს ყოფილა - მათ წარმატების სჯერათ“ - რას წერს ალბანური მედია მოსალოდნელი მატჩის შესახებ
• "დაიმახსოვრეთ, ევროპის საკვალიფიკაციო მატჩებში სახლში გოლი არ გაგვიშვია... კეთილი იყოს თქვენი მობრძანება ჯოჯოხეთში" - ალბანელი ქომაგები ქართველ ფეხბურთელებს