უკრაინული დრონების თავდასხმა ბელგოროდის, ვორონეჟისა და კურსკის ოლქებში და ოკუპანტის მორიგი შეტევა კიევზე - რა ხდება ცნობილი წუხანდელ ღამეზე?

რუსული და უკრაინული მხარეები წუხელ, ერთმანეთის ტერიტორიაზე დრონებით მიტანილ შეტევებზე ავრცელებენ ინფორმაციას.

• თავდასხმები ბელგოროდის, კურსკის და ვორონეჟის ოლქებზე

ბელგოროდის ოლქის გუბერნატორმა ვიაჩესლავ გლადკოვმა დღეს, 9 სექტემბერს დილით "ტელეგრამზე" დაწერა, რომ უკრაინის შეიარაღებულმა ძალებმა 18 უპილოტო საფრენი აპარატით შეუტიეს ბლგოროდის ოლქის ექვს რაიონს, სადაც დაზიანებულია 20-მდე მრავალბინიანი და კერძო სახლი და ხანძარი გაუჩნდა საწავავის საცავს. მსხვერპლის თაობაზე ინფორმაცია არ გავრცელებულა.

კურსკის ოლქის გუბერნატორის მოვალეობის შემრულებლის ალექსეი სმირნოვის თანახმად, რუსეთის საჰაერო თავდაცვის ძალებმა ორი უკრაინული რაკეტა მოიგერიეს. სმირნოვი შედეგების შესახებ არაფერს იუწყება.

ვორონეჟის ოლქის ოსტროგოჟსკის რაიონში დრონის ჩამოვარდნის შემდეგ საგანგებო მდგომარეობა გამოცხადდა. რეგიონული ხელისუფლება ხანძარსა და დეტონაციაზე საუბრობს, "ტელეგრამის" რუსული და უკრაინული არხები იუწყებიან, რომ საბრძოლო მასალის საცავი იწვის.

"მიმდინარეობს ტერიტორიის განაღმვის და ხანძრის ჩაქრობის აქტიური ეტაპი. მიმდებარედ მაცხოვრებლები დროებითი განსახლების ცენტრებში და ნათესავებთან რჩებიან“, - ნათქვამია გუბერნატორის ტელეგრამის არხზე.

• რუსი ოკუპანტების შეტევა

თავის მხრივ რუსეთის სამხედრო ძალებმა უკრაინაზე მორიგი იერიში მიიტანეს. თავდასხმის გამო კიევის, ხარკოვის და სხვა ოლქებში საჰაერო განგაში 9 სექტემბერს, შუაღამის შემდეგ გამოცხადდა და რამდენიმე საათს გაგრძელდა.

"მეხუთე საჰაერო თავდასხმა კიევზე სექტემბრის დასაწყისიდან. წუხელ რუსეთის არმიამ კვლავ გამოიყენა კურსკის ოლქის ტერიტორიიდან გაშვებული უპილოტო საფრენი აპარატები, წინასწარი მონაცემებით, Shahed-ები. დრონები კიევში რამდენიმე ტალღად შემოვიდა“, - განაცხადა კიევის საქალაქო-სამხედრო ადმინისტრაციის ხელმძღვანელმა, სერგეი პოპკომ.

მისი თქმით, საჰაერო თავდასხმის მაუწყებელი განგაში დედაქალაქში საათზე მეტ ხანს გაგრძელდა.

ამასთანავე, მისი ინფორმაციით, ყველა დრონი, რომელიც კიევს ემუქრებოდა, საჰაერო თავდაცვის ძალებმა და საშუალებებმა დედაქალაქის მისადგომებთან გაანადგურეს. წინასწარი მონაცემებით, ქალაქში ნგრევა და მსხვერპლი არ ყოფილა.

• რა თქვა სირსკიმ

უკრაინა ყველაფერს აკეთებს, რომ პოკროვსკი არ დაკარგოს და ამაში კურსკის ოპერაცია ეხმარება. კერძოდ, ამან ოკუპანტებს ნაწილების მანევრირების შესაძლებლობა წაართვა, - ამის შესახებ უკრაინის შეიარაღებული ძალების მთავარსარდალმა, ალექსანდრ სირსკიმ CNN-თან ინტერვიუში განაცხადა.

კითხვაზე, მოსწყვიტა თუ არა კურსკის ოპერაციამ რუსული ძალები პოკროვსკის მიმართულებას და შეიძლება თუ არა უკრაინას პოკროვსკი დაკარგოს, გენერალმა უპასუხა, რომ მტერი ბოლო 6 დღის განმავლობაში არცერთი მეტრით წინ არ წასულა, ამიტომ უკრაინის სტრატეგია მუშაობს და ახლა ისინი აძლიერებენ თავდაცვას პოკროვსკის ტერიტორიაზე.

"რა თქმა უნდა, მტერმა მოახდინა თავისი ყველაზე გაწვრთნილი ნაწილების კონცენტრირება პოკროვსკის მიმართულებით, მაგრამ ჩვენ მას წავართვით ნაწილების მანევრირებისა და ნაწილების სხვა მიმართულებებიდან გადმოსროლის შესაძლებლობა“, - განმარტა სირსკიმ.

მისი თქმით, მიუხედავად იმისა, რომ რუსეთს პოკროვსკიდან ბევრი ჯარისკაცი არ გადაუყვანია, ახლა ოკუპანტებს არ შეუძლიათ თავიანთი რეზერვების ისე მანევრირება, როგორც ადრე.

"პოკროვსკის მიმართულება, ფაქტობრივად, ჩვენთვის ყველაზე პრობლემურია, სხვა მიმართულებებით ვითარება უფრო სტაბილური გახდა, ამიტომ მიმაჩნია, რომ ეს სტრატეგია სწორად იქნა არჩეული და სასურველ შედეგს მოგვიტანს“, - აღნიშნა სირსკიმ.