უკრაინის უმაღლესმა რადამ დმიტრო კულება საგარეო მინისტრის თანამდებობიდან გაათავისუფლა, თანამდებობა დატოვა ვიცე-პრემიერმაც - რა დეტალებს ასაჯაროებს მედია
უკრაინის პარლამენტმა დმიტრო კულება უკრაინის საგარეო საქმეთა მინისტრის პოსტიდან გაათავისუფლა. ინფორმაციას უკრაინული მედია ფრაქცია “ხალხის ხმის“ დეპუტატზე, იაროსლავ ჟელეზნიაკზე დაყრდნობით ავრცელებს.
დეპუტატის თქმით, გადაწყვეტილებას ხმა 240-მა სახალხო დეპუტატმა მისცა.
შეგახსენებთ, გუშინ ცნობილი გახდა, რომ დმიტრო კულებამ საგარეო მინისტრის თანამდებობიდან გათავისუფლებასთან დაკავშირებით უმაღლეს რადას განცხადებით მიმართა. თუმცა, გუშინვე საკითხის განხილვისგან რადამ თავი შეიკავა.
ცნობილი გახდა კულებას სავარაუდო შემცვლელი. უკრაინის საგარეო საქმეთა მინისტრის თანამდებობას დმიტრო კულებას პირველი მოადგილე ანდრეი სიბიგა დაიკავებს. ამის შესახებ ინფორმაციას უკრაინის მმართველი პარტია “ხალხის მსახურის” ფრაქციის ლიდერი, დავით არახამია ავრცელებს.
რადამ დღეს ხელმეორედ განიხილა და მხარი დაუჭირა ვიცე-პრემიერის, უკრაინის დროებით ოკუპირებული ტერიტორიების რეინტეგრაციის მინისტრის ირინა ვერეშჩუკის თანამდებობიდან გადაყენებას. დავით არახამიას ცნობით, ვერეშჩუკი პრეზიდენტის ოფისში გადავა, სადაც სოციალური პოლიტიკის კუთხით იმუშავებს. თავად სამინისტრო, როგორც ცალკე ორგანო, გაუქმდება, ხოლო მისი ფუნქციონალი უკრაინის თემებისა და ტერიტორიების განვითარების სამინისტროში გადავა.
გუშინ, 4 სექტემბერს უკრაინის უმაღლესმა რადამ 3 მინისტრის განცხადებას თანამდებობიდან წასვლის შესახებ მხარი დაუჭირა. რადას გადაწყვეტილებით, თანამდებობები დატოვეს: მრეწველობის, იუსტიციის და გარემოს დაცვისა და ბუნებრივი რესურსების მინისტრებმა.
იხილეთ ასევე: